ಬೆತ್ತಲೆ ಪ್ರಕರಣ ಖಂಡಿಸಿ ತಾಲೂಕು ಕಚೇರಿಗೆ ಮುತ್ತಿಗೆ

ಯಳಂದೂರು: ಗುಂಡ್ಲುಪೇಟೆಯ ದಲಿತ ಯುವಕನ ಬೆತ್ತಲೆ ಪ್ರಕರಣವನ್ನು ನ್ಯಾಯಾಂಗ ತನಿಖೆಗೆ ಆಗ್ರಹಿಸಿ ದಲಿತ ಸಂಘರ್ಷ ಸಮಿತಿ ಪಟ್ಟಣದ ತಾಲೂಕು ಕಚೇರಿಗೆ ಮುತ್ತಿಗೆ ಹಾಕಿ ಧರಣಿ ನಡೆಸಲಾಯಿತು.

ನಂತರ ದ.ಸಂ.ಸ ಜಿಲ್ಲಾ ಸಂಚಾಲಕ ಸಿ.ರಾಜಣ್ಣ ಮಾತನಾಡಿ, ಇಡೀ ಜಗತ್ತಿಗೆ ಶಾಂತಿ, ಸೌರ್ಹಾದತೆ, ಮಾನವೀಯತೆ, ವೈಚಾರಿಕತೆ ಬಿತ್ತಿದ ಬುದ್ದ, ಬಸವ, ಸ್ವಾಮಿ ವಿವೇಕಾನಂದರಂತಹ, ಅನೇಕ ಸಾಧು, ಸಂತರು ಸಮಾಜ ಸುಧಾರಕರು ಹುಟ್ಟಿದ ಭಾರತದಲ್ಲಿ ಜಾತಿ ಧರ್ಮದ ಹೆಸರಿನಲ್ಲಿ ಕ್ಷ ುಲ್ಲಕ ಕಾರಣಗಳಿಗಾಗಿ ಹಲ್ಲೆ, ಕೊಲೆ, ಸುಲಿಗೆ, ಅತ್ಯಾಚಾರ, ಬೆತ್ತಲೆಗೊಳಿಸಿ ಸಾರ್ವಜನಿಕವಾಗಿ ಮೆರವಣಿಗೆ ಮಾಡಿ ಅವಮಾನಿಸಿ ದೌರ್ಜನ್ಯವೆಸಗಿರುವ ಸಂವಿಧಾನ ಬಾಹೀರ. ಇಂತಹ ಅಮಾನುಷ ಕೃತ್ಯಗಳು ದೇಶದೆಲ್ಲೆಡೆ ನಿರಂತವಾಗಿ ನಡೆಯುತ್ತಿರುವುದು ಖಂಡನೀಯ. ಇಂತಹ ಘಟನೆಗೆ ಸಾಕ್ಷಿಯಾಗಿ ಚಾ.ನಗರ ಜಿಲ್ಲೆ ಗುಂಡ್ಲುಪೇಟೆ ತಾಲೂಕಿನ ಕೆಬ್ಬೆ ಕಟ್ಟೆ ಬಳಿ ಇರುವ ಶನಿ ದೇವಾಲಯವನ್ನು ಪ್ರವೇಶ ಮಾಡಿದ ಎಂಬ ಕಾರಣಕ್ಕೆ ದಲಿತ ಯುವಕನ ಮೇಲೆ ಹಲ್ಲೆ ನಡೆಸಿ ಸಾರ್ವಜನಿಕವಾಗಿ ಬೆತ್ತಲೆಗೊಳಿಸಿ ಮೆರವಣಿಗೆ ನಡೆಸಿರುವ ಪ್ರಸಂಗ ನಾಗರೀಕ ಸಮಾಜವೇ ನಾಚಿ ತಲೆ ತಗ್ಗಿಸುವಂತೆ ಮಾಡಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಕೃತ್ಯದಲ್ಲಿ ಬಾಗಿಯಾಗಿರುವ ದುಷ್ಕರ್ಮಿಗಳ ವಿರುದ್ಧ ಕಾನೂನು ಕ್ರಮ ಕೈಗೊಂಡು ನ್ಯಾಯಾಂಗ ತನಿಖೆಗೆ ಒಳಪಡಿಸಬೇಕೆಂದು ಆಗ್ರಹಿಸಿದ್ದಾರೆ.

ಈ ಸಂದರ್ಬದಲ್ಲಿ ತಾಲೂಕು ಅಂಬೇಡ್ಕರ್‌ ಸಂಘದ ಸೇವಾ ಸಮಿತಿ ಅಧ್ಯಕ್ಷ ಡಿ.ರೇವಣ್ಣ, ಕಂದಹಳ್ಳಿ ನಾರಾಯಣ, ಆಲೂರು ನಾಗೇಂದ್ರ, ಎಂ.ಪುಟ್ಟಸ್ವಾಮಿ, ಗೌಡಳ್ಳಿ ರಾಜು, ನಾಗೇಂದ್ರ ಎ.ಎನ್‌, ಸಿ.ಎಂ ಶಿವಣ್ಣ, ತಾಲೂಕು ಸಂಚಾಲಕ ಚಂದ್ರಶೇಖರ್‌, ಎನ್‌.ರಾಜು, ಎಂ.ಸಿದ್ದು ಯರಗಂಬಳ್ಳಿ, ರಾಜೇಂದ್ರ ಇತರರು ಹಾಜರಿದ್ದರು.