ಹಳ್ಳಕ್ಕೆ ಲಾರಿ ಬಿದ್ದು ಮೂವರು ಸಾವು

ಗುಂಡ್ಲುಪೇಟೆ : ಬಂಡೀಪುರ ರಾಷ್ಟ್ರೀಯ ಉದ್ಯಾನದ ಪ್ರವೇಶ ದ್ವಾರದ ಬಳಿ ರಾಷ್ಟ್ರೀಯ 67ರ ತಿರುವಿನಲ್ಲಿಚಾಲಕನ ನಿಯಂತ್ರಣ ತಪ್ಪಿದ ಲಾರಿ ಬೈಕ್‌ಗೆ ಡಿಕ್ಕಿ ಹೊಡೆದು ರಸ್ತೆ ಬದಿಯ ಹಳ್ಳಕ್ಕೆ ಉರುಳಿದ ಪರಿಣಾಮ ಚಾಲಕ ಮತ್ತು ಬೈಕ್‌ ಸವಾರರಿಬ್ಬರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.

ತಾಲೂಕಿನ ಶಿವಪುರ ಗ್ರಾಮದ ಆರೋಗ್ಯ ಇಲಾಖೆ ನಿವೃತ್ತ ನೌಕರ ಶಿವಪ್ಪ(67), ಜಕ್ಕಹಳ್ಳಿ ಗ್ರಾಮದ ಕಾಳಪ್ಪ(69), (ಹಾಲಿ ಶಿವಪುರದ ತೋಟದ ಮನೆ) ಮತ್ತು ಲಾರಿ ಮಾಲೀಕರೂ ಆದ ಚಾಲಕ ಈಶ್ವರ್‌(42) ಮೃತರು. ಘಟನೆಯಲ್ಲಿಲಾರಿಯಿಂದ ಜಿಗಿದ ಕ್ಲೀನರ್‌ ದೀಪಕ್‌(38) ಅವರಿಗೆ ಗಂಭೀರ ಗಾಯವಾಗಿದೆ.

ಗಾಯಾಳುಗಳನ್ನು ಪಟ್ಟಣದ ಕಬ್ಬಹಳ್ಳಿ ಸಾಹುಕಾರ್‌ ಕೆ.ಸಿ. ಸುಬ್ಬಣ್ಣ ಸಾರ್ವಜನಿಕ ಆಸ್ಪತ್ರೆಯಲ್ಲಿಚಿಕಿತ್ಸೆಗೆ ದಾಖಲಿಸಲಾಗಿದೆ. ಎಎಸ್ಪಿ ಅನಿತಾ ಹದ್ದಣ್ಣನವರ್‌, ಡಿಎಸ್ಪಿ ಮೋಹನ್‌, ಸಿಪಿಐ ಮಹದೇವಸ್ವಾಮಿ, ಪಿಎಸ್‌ಐ ಡಿ.ಕೆ.ಲತೇಶ್‌ಕುಮಾರ್‌ ಘಟನಾ ಸ್ಥಳ ಮತ್ತು ಸಾರ್ವಜನಿಕ ಆಸ್ಪತ್ರೆಗೆ ಭೇಟಿ ನೀಡಿ ಪರಿಶೀಲಿಸಿದರು.

ಘಟನೆ ವಿವರ: ಕಾಳಪ್ಪ ತಮ್ಮ ಮನೆಯ ಶುಭ ಕಾರ್ಯಕ್ಕೆ ಸಂಬಂಧಿಕರನ್ನು ಬರಮಾಡಲು ಸ್ವಗ್ರಾಮ ಜಕ್ಕಹಳ್ಳಿಗೆ ಶಿವಪುರದಿಂದ ಸ್ನೇಹಿತ ಶಿವಪ್ಪರೊಂದಿಗೆ ಬೈಕ್‌ನಲ್ಲಿಹೋಗುತ್ತಿದ್ದರು. ಈ ಸಂದರ್ಭ ಬಂಡೀಪುರ ರಾಷ್ಟ್ರೀಯ ಉದ್ಯಾನದ ಮೂಲಕ ಹಾದು ಹೋಗಿರುವ ರಾಷ್ಟ್ರೀಯ ಹೆದ್ದಾರಿ 67 ರಲ್ಲಿಬ್ರೇಕ್‌ ವೈಫಲ್ಯದ ಕಾರಣ ಕೇರಳದಿಂದ ಪ್ಲೈನ್‌ವುಡ್‌ ತುಂಬಿಕೊಂಡು ಬರುತ್ತಿದ್ದ ಲಾರಿ ತಿರುವಿನಲ್ಲಿಬೈಕ್‌ಗೆ ಡಿಕ್ಕಿಯಾದ ಪರಿಣಾಮ ಬೈಕ್‌ ಸವಾರ ಮತ್ತು ಹಿಂಬದಿ ಸವಾರರಾದ ಶಿವಪ್ಪ ಮತ್ತು ಕಾಳಪ್ಪ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ರಸ್ತೆ ಬದಿಯ ಸೇತುವೆಯಿಂದ ಲಾರಿ ಬಿದ್ದು ಚಾಲಕ ತೀವ್ರ ಗಾಯಗೊಂಡು ಮೃತಪಟ್ಟಿದ್ದಾರೆ. ಈ ವೇಳೆ ಲಾರಿಯಿಂದ ಜಿಗಿದ ಕ್ಲೀನರ್‌ ದೀಪಕ್‌ ತೀವ್ರ ಗಾಯಗೊಂಡಿದ್ದಾರೆ. ಸಾರ್ವಜನಿಕರ ಸಹಕಾರದಲ್ಲಿಮೃತದೇಹಗಳನ್ನು ಖಾಸಗಿ ವಾಹನದಲ್ಲಿಆಸ್ಪತ್ರೆಗೆ ಸಾಗಿಸಲಾಯಿತು. ಮರಣೋತ್ತರ ಪರೀಕ್ಷೆ ನಂತರ ಮೃತದೇಹಗಳನ್ನು ಕುಟುಂಬಸ್ಥರಿಗೆ ನೀಡಲಾಯಿತು.

ಈ ಸಂಬಂಧ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.