ಮಲೆ ಮಹದೇಶ್ವರ ಬೆಟ್ಟದಲ್ಲಿ ಇಂದು ದೀಪೋತ್ಸವ

ಹನೂರು: ಮಲೆ ಮಹದೇಶ್ವರಬೆಟ್ಟ ದೇಗುಲದಲ್ಲಿಕಡೆ ಕಾರ್ತಿಕ ಸೋಮವಾರವಾದ ನ. 25ರಂದು ದೀಪೋತ್ಸವ ನಡೆಯಲಿದೆ.

ಮಲೆಮಹದೇಶ್ವರ ಬೆಟ್ಟದಲ್ಲಿನಡೆಯುವ ಧಾರ್ಮಿಕ ಕಾರ್ಯಗಳಲ್ಲಿಪಾಲ್ಗೊಳ್ಳಲು ಎರಡು ದಿನಗಳಿಂದ ರಾಮನಗರ, ಹಲಗೂರು, ನಂಜನಗೂಡು, ತಿ.ನರಸೀಪುರ, ಮೈಸೂರು, ಬೆಂಗಳೂರು, ಪಿರಿಯಾಪಟ್ಟಣ, ಎಚ್‌.ಡಿ.ಕೋಟೆ, ಮಳವಳ್ಳಿ, ಮದ್ದೂರು, ಗುಂಡ್ಲುಪೇಟೆ, ಮಂಡ್ಯ ಸೇರಿದಂತೆ ವಿವಿಧ ಕಡೆಗಳಿಂದ ಸಾವಿರಾರು ಭಕ್ತರು ಕಾಲ್ನಡಿಗೆಯ ಮೂಲಕ ಆಗಮಿಸಿದ್ದಾರೆ.

ಮಲೆಮಹದೇಶ್ವರ ಬೆಟ್ಟದಲ್ಲಿಪ್ರಾಧಿಕಾರದ ವತಿಯಿಂದ ಕಡೆ ಕಾರ್ತಿಕ ಸೋಮವಾರದಂದು ವಿಶೇಷ ಪೂಜೆಗಳು ನಡೆಯಲಿವೆ. ಲಕ್ಷ ದೀಪೋತ್ಸವ ಮಹಾಜ್ಯೋತಿ ನಡೆಯಲಿದ್ದು, ದೀಪದ ಒಡ್ಡುವಿನಲ್ಲಿರುವ ದೊಡ್ಡ ದೀಪಕ್ಕೆ 8 ಟಿನ್‌ ಎಣ್ಣೆ ಹಾಕಿ ದೀಪ ಹಚ್ಚಿ ಮಹಾಜ್ಯೋತಿ ಬೆಳಗಿಸಲಾಗುತ್ತದೆ. ಭಕ್ತರು ದೇವಾಲಯ ಸೇರಿದಂತೆ ಸುತ್ತಮುತ್ತಲು ದೀಪಗಳನ್ನು ಹಚ್ಚುತ್ತಾರೆ. ಸಂಜೆ ಮಹದೇಶ್ವರ ಸ್ವಾಮಿಗೆ ಚಿನ್ನದ ರಥೋತ್ಸವ, ಹುಲಿ ವಾಹನೋತ್ಸವ, ಎಣ್ಣೆ ಮಜ್ಜನ ಸೇವೆ, ವಿಶೇಷ ಪೂಜಾ ಕೈಂಕರ್ಯಗಳೊಂದಿಗೆ ಮಹಾ ಮಂಗಳಾರತಿ ನಡೆಯಲಿದೆ. ನಂತರ ತೆಪ್ಪೋತ್ಸವ ಸಹ ಜರುಗಲಿದೆ.

ಮೈಸೂರು ವೀರಶೈವ ಮಹಾಸಭಾ ಸಂಘದ ವತಿಯಿಂದ ಭಕ್ತರಿಗೆ ದಾಸೋಹ ವ್ಯವಸ್ಥೆ ಕಲ್ಪಿಸಲಾಗಿದೆ.

ಕಾಲ್ನಡಿಗೆಯಲ್ಲಿ ಆಗಮನ

ಈ ಬಾರಿ ಮಹಿಳಾ ಸಂಘದ ಸದಸ್ಯರು ಸೇರಿದಂತೆ ಹರಕೆ ಹೊತ್ತ ಭಕ್ತರು ಸರದಿ ರೂಪದಲ್ಲಿಹಣವನ್ನು ಸಂಗ್ರಹಿಸಿ ತಂಡೋಪತಂಡವಾಗಿ ಕಾಲ್ನಡಿಗೆಯಲ್ಲಿಆಗಮಿಸಿದರು. ಮಾರ್ಗ ಮಧ್ಯೆ ಮರದ ನೆರಳಿನಲ್ಲಿಅಲ್ಲಲ್ಲಿವಿಶ್ರಾಂತಿ ಪಡೆಯುತ್ತ, ಸಹಭೋಜನವನ್ನು ಮಾಡುತ್ತ ಸಂಚರಿಸುತ್ತಿರುವುದು ಹನೂರು ಭಾಗದಲ್ಲಿಎರಡು ದಿನಗಳಿಂದ ಸಾಮಾನ್ಯವಾಗಿದೆ. ಮಾದಪ್ಪನ ದೇವರ ಗುಡ್ಡರು ಕಂಸಾಳೆ ಬಾರಿಸುತ್ತ, ಮಾದಪ್ಪನ ಮಹಿಮೆಯ ಹಾಡನ್ನು ಹಾಡುತ್ತ ಕಾಲ್ನಡಿಗೆಯಲ್ಲಿತೆರಳುತ್ತಿದ್ದಾರೆ. ಯುವಕರು ತಮಟೆ ಬಾರಿಸುತ್ತ ಅಲ್ಲಲ್ಲಿಕುಣಿದು ಕುಪ್ಪಳಿಸುತ್ತ ಆಗಮಿಸಿ ಮಾದಪ್ಪನ ಸನ್ನಿಧಿಯಲ್ಲಿಬೀಡು ಬಿಟ್ಟಿದ್ದಾರೆ.