ಗ್ರಾಹಕರಿಗೆ ಹೆಚ್ಚು ಬಿಲ್‌: ಸೆಸ್ಕ್‌ ವಿರುದ್ಧ ಆರೋಪ

ಕೊಳ್ಳೇಗಾಲ: ಕೊಳ್ಳೇಗಾಲ ಪಟ್ಟಣದಲ್ಲಿ ಸೆಸ್ಕ್‌ (ಚಾಮುಂಡೇಶ್ವರಿ ವಿದ್ಯುತ್‌ ಸರಬರಾಜು ಕಂಪನಿ) ತನ್ನ ಗ್ರಾಹಕರಿಗೆ ಬಳಕೆಗಿಂತ ಹೆಚ್ಚು ಬಿಲ್‌ ನೀಡುವ ಮೂಲಕ ಶಾಕ್‌ ನೀಡುತ್ತಿದೆ ಎಂದು ವಿದ್ಯುತ್‌ ಬಳಕೆದಾರರ ಸಂಘದ ಪ್ರಧಾನ ಕಾರ್ಯದರ್ಶಿ ಸುಂದರ್‌ರಾಜ್‌ ಆರೋಪಿಸಿದ್ದಾರೆ.

''ಕೊಳ್ಳೇಗಾಲದ ದತ್ತ ಮೆಡಿಕಲ್‌ ಮಾಲೀಕ ವಿನಯ್‌ ಅವರಿಗೆ ಈ ಬಾರಿ ಸೆಸ್ಕ್‌ ಬಿಲ್‌ ಶಾಕ್‌ ನೀಡಿದೆ. ಇವರ ವಿದ್ಯುತ್‌ ಬಿಲ್‌ 11 ಸಾವಿರ ಬಂದಿದೆ.

ವಿನಯ್‌ ಅವರು ತಮ್ಮ ಮನೆಯ ಆರ್‌ಆರ್‌ ಸಂಖ್ಯೆ ಡಿಜಿಎಲ್‌ 12 ಐಡಿ ಖಾತೆ 5061139000ಗೆ ಸೆಪ್ಟೆಂಬರ್‌ ಬಿಲ್‌ 2,254 ಬಿಲ್‌ , ಅದರೊಂದಿಗೆ ಹಳೇ ಬಾಕಿ ಎಂದು ನಮೂದಿಸಿ 11,201 ರೂ. ಸೇರಿ ಒಟ್ಟು ವಿದ್ಯುತ್‌ ಬಿಲ್‌ ಪಾವತಿಸುವಂತೆ ಸೂಚಿಸಲಾಗಿದೆ,'' ಎಂದಿದ್ದಾರೆ.

''ಏಕಾಏಕಿ ಈ ಬಗೆಯಲ್ಲಿ ಬಿಲ್‌ ಬಂದ ಹಿನ್ನೆಲೆಯಲ್ಲಿ ಗ್ರಾಹಕರಾದ ವಿನಯ್‌ ಅವರು, ಈ ಬಾಕಿ ಬಿಲ್‌ ಯಾವುದು ? ಎಂದು ಸೆಸ್ಕ್‌ ಶಾಖೆಯಲ್ಲಿವಿಚಾರಿಸಲು ಹೋದರೆ, ಅಷ್ಟೂ ಮಾಹಿತಿ ನೀಡಲು ಸಮಯಬೇಕಾಗುತ್ತದೆ ಎಂದು ಹೇಳುತ್ತಿದ್ದಾರೆ. ಇತ್ತ ವಿದ್ಯುತ್‌ ಬಿಲ್‌ ಪಾವತಿಸದಿದ್ದರೆ ಸಂಪರ್ಕ ಕಡಿತಗೊಳಿಸಲಾಗುವುದು ಎಂದು ಎಚ್ಚರಿಸಲಾಗಿದೆ. ಹೀಗಾದರೆ ಗ್ರಾಹಕರು ಮಾಡುವುದಾದರೂ ಏನು,''ಎಂದು ಸುಂದರ್‌ರಾಜ್‌ ಪತ್ರಿಕಾ ಹೇಳಿಕೆಯಲ್ಲಿಅಸಮಾಧಾನ ವ್ಯಕ್ತಪಡಿಸಿದ್ದಾರೆ.