ಚಾಮರಾಜನಗರ: 16 ವಿಚಾರಣಾ ಕೈದಿಗಳಿಗೆ ಸೋಂಕು

ಚಾಮರಾಜನಗರ: ನಗರದ ಜಿಲ್ಲಾ ಕಾರಾಗೃಹದಲ್ಲಿರುವ 16 ಮಂದಿ ವಿಚಾರಣಾಧೀನ ಕೈದಿಗಳಿಗೆ ಕೋವಿಡ್ ಸೋಂಕು ದೃಢಪಟ್ಟಿದೆ.

ಕಾರಾಗೃಹದಲ್ಲಿ ಸದ್ಯ 120 ಮಂದಿ ಕೈದಿಗಳಿದ್ದು, ಈ ಪೈಕಿ ಮಂಗಳವಾರ 58 ಮಂದಿಗೆ ಆಂಟಿಜೆನ್‌ ಕೋವಿಡ್ ಟೆಸ್ಟ್ ಮಾಡಿಸಲಾಗಿದ್ದು, ಇವರಲ್ಲಿ 16 ಮಂದಿಗೆ ಸೋಂಕು ತಗುಲಿರುವುದು ದೃಢಪಟ್ಟಿದೆ.

ಈ ಸೋಂಕು ತಗುಲಿರುವ ಕೈದಿಗಳಲ್ಲಿ ಯಾವುದೇ ಕೋವಿಡ್ ರೋಗ ಲಕ್ಷಣ ಇಲ್ಲವಾದ್ದರಿಂದ ನಗರದ ಎಂಜಿನಿರಿಂಗ್ ಕಾಲೇಜು ಕಟ್ಟಡದಲ್ಲಿನ ಕೋವಿಡ್ ಕೇರ್ ಕೇಂದ್ರಕ್ಕೆ ದಾಖಲಿಸಲಾಗಿದೆ ಎಂದು ಕಾರಾಗೃಹ ಅಧಿಕಾರಿ ವಿಜಯ್ ತಿಳಿಸಿದರು.

ಇನ್ನುಳಿದ ಕೈದಿಗಳಿಗೂ ಟೆಸ್ಟ್ ಮಾಡಿಸಲಾಗುವುದು. ಜೈಲಿನಲ್ಲಿರುವ ಕೈದಿಗಳಿಗೆ ಹೇಗೆ ಸೋಂಕು ತಗುಲಿತು ಎಂಬುದು ತಿಳಿದಿಲ್ಲ. ಹೊಸ ಕೈದಿಗಳನ್ನು ಕಾರಾಗೃಹ ಕ್ಕೆ ಹಾಕುವ ಮುನ್ನವೇ ಟೆಸ್ಟ್ ಮಾಡಿಸಲಾಗುವುದು. ಹೀಗಿರುವಾಗ ಈ 16 ಮಂದಿಗೆ ಸೋಂಕು ತಗುಲಿರುವುದು ಕಾರಾಗೃಹ ಅಧಿಕಾರಿಗಳನ್ನು ಚಿಂತೆಗೀಡು ಮಾಡಿದೆ.