ದ್ವೇಷದ ರಾಜಕೀಯ ಸಲ್ಲ: ನಿರಂಜನ್‌ ಕುಮಾರ್‌

ಗುಂಡ್ಲುಪೇಟೆ : ಬಿಜೆಪಿ ಶಾಸಕ ಪ್ರೀತಂಗೌಡರ ರಾಜಕೀಯ ಏಳಿಗೆ ಸಹಿಸದೇ ಅವರ ಕುಟುಂಬ ಮತ್ತು ಬೆಂಬಲಿಗರ ಮೇಲೆ ಗೂಂಡಾಗಳ ಮೂಲಕ ಮುಖ್ಯಮಂತ್ರಿಯವರು ದಾಳಿ ಮಾಡಿಸಿದ್ದಾರೆ ಎಂದು ಶಾಸಕ ಸಿ.ಎಸ್‌.ನಿರಂಜನ್‌ಕುಮಾರ್‌ ಆರೋಪಿಸಿದ್ದಾರೆ.

ಈ ಬಗ್ಗೆ ಪತ್ರಿಕಾ ಹೇಳಿಕೆ ನೀಡಿರುವ ಅವರು, ''ಮಾಜಿ ಪ್ರಧಾನಿ ದೇವೇಗೌಡರು, ಪುತ್ರರಾದ ಸಿಎಂ ಎಚ್‌.ಡಿ.ಕುಮಾರಸ್ವಾಮಿ ಮತ್ತು ಸಚಿವರಾದ ಎಚ್‌.ಡಿ.ರೇವಣ್ಣ ಹಾಸನ ಜಿಲ್ಲೆಯ ಸಂಪೂರ್ಣ ರಾಜಕೀಯ ಪ್ರಭುತ್ವ ತಮ್ಮದಾಗಬೇಕು ಎಂದು ಬಯಸಿದ್ದಾರೆ. ಈ ಕಾರಣದಿಂದ ತಮ್ಮ ದಾರಿಗೆ ಅಡ್ಡಲಾಗುತ್ತಾರೆ ಎಂದು ನಮ್ಮ ಪಕ್ಷ ದ ಯುವ ಶಾಸಕ ಪ್ರೀತಂಗೌಡರ ಕುಟುಂಬದ ಮತ್ತು ಬೆಂಬಲಿಗರ ವಿರುದ್ಧ ಕಾರ್ಯಕರ್ತರ ಹೆಸರಿನಲ್ಲಿ ಗೂಂಡಾಗಳನ್ನು ಕಳುಹಿಸಿ ದಾಂಧಲೆ ಮಾಡಿಸಿದ್ದು, ಒಬ್ಬರು ಗಾಯಗೊಂಡಿದ್ದಾರೆ. ಇಂತಹ ದ್ವೇಷದ ರಾಜಕೀಯ ಒಳ್ಳೆಯದಲ್ಲ,''ಎಂದು ಶಾಸಕರು ಪತ್ರಿಕಾ ಹೇಳಿಕೆಯಲ್ಲಿ ಒತ್ತಾಯಿಸಿದ್ದಾರೆ.