ಚಾಮರಾಜನಗರಕ್ಕೆ ವಕ್ಕರಿಸಿದ ಕೊರೊನಾ, ಪೊಲೀಸರಲ್ಲಿ ಆತಂಕ?

ಚಾಮರಾಜನಗರ: ಹಸಿರು ವಲಯವಾಗಿ ಗುರುತಿಸಿಕೊಂಡಿದ್ದ ಚಾಮರಾಜನಗರ ಜಿಲ್ಲೆಯಲ್ಲಿ ಇದೀಗ ಮತ್ತೊಂದು ಪಾಸಿಟಿವ್ ಕೇಸ್‌‌ ದೃಢಪಟ್ಟಿದೆ. ಈ ಹಿನ್ನೆಲೆ ಜಿಲ್ಲೆಯ ಗುಂಡ್ಲುಪೇಟೆ ಪಟ್ಟಣದ ಮಹದೇವಪ್ರಸಾದ್ ನಗರ ಕಂಟ್ಮೆಂಟ್ ಝೋನ್ ಎಂದು ಘೋಷಣೆ ಮಾಡಲಾಗಿದೆ.

ಈ ಬಡಾವಣೆಯ 39 ವರ್ಷದ ವ್ಯಕ್ತಿಗೆ ಕೊರೊನಾ ಸೋಂಕು ದೃಢಪಟ್ಟ ಹಿನ್ನೆಲೆ ಜಿಲ್ಲಾಧಿಕಾರಿ ಆದೇಶ ನೀಡಿದ್ದಾರೆ. ಸೋಂಕು ತಗುಲಿರುವ ವ್ಯಕ್ತಿ ಟ್ರಕ್ ಚಾಲಕನಾಗಿದ್ದು, ತಮಿಳುನಾಡಿಗೆ ತರಕಾರಿ ಸಾಗಣೆ ಮಾಡುತ್ತಿದ್ದರು. ಇವರಿಗೆ ಜೂ. 17 ರಂದು ಜ್ವರ , ನೆಗಡಿ ಕಾಣಿಸಿಕೊಂಡಿದ್ದು, ತಪಾಸಣೆಗೆ ಒಳಪಟ್ಟು, ಗಂಟಲ ದ್ರವ ಪರೀಕ್ಷೆಯಲ್ಲಿ ಜೂ.19 ರಂದು ವರದಿ ಪಾಸಿಟಿವ್ ಎಂಬುದು ದೃಢವಾಗಿದೆ.

ಈ ಹಿನ್ನೆಲೆಯಲ್ಲಿ ಆತನನ್ನು ಕೋವಿಡ್ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಇನ್ನು ಆ ಬಡಾವಣೆಯನ್ನು ಕಂಟ್ಮೆಂಟ್ ವಲಯವೆಂದು ಘೋಷಿಸಿ, ನಿವಾಸಿಗಳು ಹೊರ ಬಾರದಂತೆ ಆದೇಶಿಸಲಾಗಿದೆ. ಅವರೆಲ್ಲರಿಗೂ ಅಗತ್ಯ ಸೌಲಭ್ಯ ಕಲ್ಪಿಸಲು ಕ್ರಮ ವಹಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ತಿಳಿಸಿದ್ದಾರೆ.

ಇದು ಲಡಾಖ್‌, ದಕ್ಷಿಣ ಚೀನಾ ಸಮುದ್ರವಲ್ಲ; ಭಾರತೀಯ ಸೇನಾಧಿಕಾರಿಗಳ ಖಡಕ್‌ ಎಚ್ಚರಿಕೆ!

ಪೊಲೀಸರಿಗೆ ಆತಂಕ..?ಇನ್ನು ಸೋಂಕಿತ ಚಾಲಕ ಗಡಿಭಾಗದ ಪುಣಜನೂರು ಚೆಕ್ ಪೋಸ್ಟ್ ಮೂಲಕ ಹೋಗಿ ಬಂದಿರುವ ಟ್ರಾವಲ್ ಹಿಸ್ಟರಿ ಲಭ್ಯವಾಗಿದೆ. ಈ ಹಿನ್ನೆಲೆ ಇಲ್ಲಿ ನಿಯೋಜನೆಗೊಂಡಿದ್ದ ಪೊಲೀಸರಿಗೆ ಸಹಜವಾಗಿ ಆತಂಕ ಮೂಡಿದೆ. ಚೆಕ್‌ಪೋಸ್ಟ್‌ ಮೂಲಕ ಹಾದು ಹೋಗುವ ಸಂಧರ್ಭ ಪೊಲೀಸರನ್ನ ಸಂಪರ್ಕಿಸಿರುವ ಸಾಧ್ಯತೆ ಇದೆ ಎನ್ನಲಾಗಿದೆ. ಈ ಬಗ್ಗೆ ಜಿಲ್ಲಾಡಳಿತ ಮುಂಜಾಗ್ರತಾ ಕ್ರಮ ಕೈಗೊಳ್ಳುತ್ತಿದೆ.