ಉಡಿಗಾಲದಲ್ಲಿಂದು ಪಟ್ಟಲದಮ್ಮ ರಥೋತ್ಸವ

ಚಾಮರಾಜನಗರ : ತಾಲೂಕಿನ ಉಡಿಗಾಲ ಗ್ರಾಮದಲ್ಲಿ ಪಟ್ಟಲದಮ್ಮ ಜಾತ್ರಾಮಹೋತ್ಸವ ಅಂಗವಾಗಿ ಮಾ.30 ರಂದು ರಥೋತ್ಸವ ನಡೆಯಲಿದೆ.

ಜಾತ್ರೆ ಹಿನ್ನೆಲೆಯಲ್ಲಿ ಗ್ರಾಮಸ್ಥರು ತಮ್ಮ ಮನೆಗಳಿಗೆ ಸುಣ್ಣ ಬಣ್ಣ ಮಾಡಿದ್ದಾರೆ. ಜಾತ್ರೆಗೆ ಅಕ್ಕಪಕ್ಕದ ಗ್ರಾಮಗಳಿಂದ ನೆಂಟರಿಷ್ಠರು ಆಗಮಿಸಿದ್ದು, ಇಡೀ ಗ್ರಾಮದಲ್ಲಿ ಸಂಭ್ರಮ ಮನೆ ಮಾಡಿದೆ.

ದೇವಸ್ಥಾನದ ಆವರಣವನ್ನು ವಿದ್ಯುತ್‌ ದೀಪಗಳಿಂದ ಅಲಂಕಾರ ಮಾಡಲಾಗಿದೆ. ಬಸ್‌ ನಿಲ್ದಾಣದಿಂದ ಮುಖ್ಯರಸ್ತೆಗಳಲ್ಲೂ ವಿದ್ಯುತ್‌ ದೀಪಗಳನ್ನು ಅಳವಡಿಸಲಾಗಿದ್ದು, ನೋಡುಗರ ಗಮನಸೆಳೆಯುತ್ತಿದೆ. ಎರಡು ದಿನಗಳ ಜಾತ್ರೆ ಇದಾಗಿದ್ದು, ಮಾ.29 ರಂದು ಮಧ್ಯಾಹ್ನ 3.30 ರಲ್ಲಿ ಗ್ರಾಮದ ಹೊರವಲಯದಲ್ಲಿ ಬಂಡಿ ಉತ್ಸವ ಜರುಗಿತು.

ಮಾ.30 ರಂದು ಬೆಳಗಿನ ಜಾವ 5 ಕ್ಕೆ ಕೊಂಡೋತ್ಸವ ನಡೆಯಲಿದ್ದು, ಹರಕೆಹೊತ್ತ ಭಕ್ತರು ಕೊಂಡ ಹಾಯುವರು. ನಂತರ ಬೆಳಗ್ಗೆ 7.30 ಕ್ಕೆ ಕುದುರೆಯ ಅಲಂಕೃತವಾಹನದಲ್ಲಿ ಪಟ್ಟಲದಮ್ಮ ವಿಗ್ರಹವನ್ನು ಬಿಜಂಗೈದು, ಗ್ರಾಮದ ಪ್ರಮುಖಬೀದಿಗಳಲ್ಲಿ ನಂದಿಧ್ವಜ, ಕಲಾತಂಡಗಳು, ಬಿರುದು ಬಾವಲಿಗಳೊಡನೆ ಉತ್ಸವ ಜರುಗಲಿದೆ.

ಸಂಜೆ 4 ರ ನಂತರ ಅಲಂಕೃತ ರಥದಲ್ಲಿ ಪಟ್ಟಲದಮ್ಮ ದೇವಿಯನ್ನು ಕೂರಿಸಿ ಮಹಾಮಂಗಳಾರತಿ ಮಾಡುವ ಮೂಲಕ ರಥೋತ್ಸವ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ನಡೆಯಲಿದೆ.

ಈಗಾಗಲೇ ಕಳೆದ ಒಂದು ವಾರದ ಹಿಂದೆ ರಥವನ್ನು ಬಣ್ಣಬಣ್ಣದ ಬಾವುಟಗಳಿಂದ ಕಟ್ಟಿ ಸಿಂಗರಿಸಲಾಗಿದೆ. ರಥೋತ್ಸವ ಸುಗಮವಾಗಿ ನಡೆಯಲು ಗ್ರಾಮಸ್ಥರು, ಜಾತ್ರಾಸಮಿತಿಯ ಪದಾಧಿಕಾರಿಗಳು ಅಗತ್ಯ ಸಿದ್ದತೆ ಕೈಗೊಂಡಿದ್ದಾರೆ.