Mysuru Dasara - ಈ ಬಾರಿಯ ಜಂಬೂಸವಾರಿಯಲ್ಲಿ ಪುನೀತ್ ಸ್ತಬ್ದಚಿತ್ರ; ಯಾವ ಜಿಲ್ಲೆಯ ವಿಶೇಷವಿದು?

ಚಾಮರಾಜ ನಗರ: ಈ ಬಾರಿಯ ದಸರಾ ಹಬ್ಬದ 10ನೇ ದಿನವಾದ ವಿಜಯ ದಶಮಿಯಂದು ಬುಧವಾರ (ಅ. 5) ಮೈಸೂರಿನ ಅರಮನೆ ಮುಂಭಾಗದಲ್ಲಿ ನಡೆಯಲಿರುವ ಜಂಬೂ ಸವಾರಿಯಲ್ಲಿ ವಿವಿಧ ಜಿಲ್ಲೆಗಳ ಸ್ತಬ್ದ ಚಿತ್ರಗಳು ಸಾಗಿಹೋಗುತ್ತವೆ. ಪ್ರತಿಯೊಂದು ಸ್ತಬ್ದ ಚಿತ್ರವೂ ಆ ಜಿಲ್ಲೆಯ ಸಂಸ್ಕೃತಿ, ವಿಶೇಷತೆಗಳನ್ನು ಬಿಂಬಿಸುವಂಥವು. ಈ ಬಾರಿಯ ಜಂಬೂಸವಾರಿಯಲ್ಲಿ ಚಾಮರಾಜ ನಗರ ಜಿಲ್ಲಾಡಳಿತವು ಪುನೀತ್ ರಾಜ್ ಕುಮಾರ್ ಸ್ಮರಣಾರ್ಥ ಸ್ತಬ್ಧ ಚಿತ್ರವನ್ನು ತರಲು ಉದ್ದೇಶಿಸಿದ್ದು, ಅದರ ನಿರ್ಮಾಣದ ಕೆಲಸ ಭರದಿಂದ ಸಾಗಿದೆ.

ಪುನೀತ್ ಸ್ತಬ್ಧ ಚಿತ್ರವೇಕೆ?

ಪುನೀತ್ ರಾಜ್ ಕುಮಾರ್ ಅವರು, ಜಿಲ್ಲಾಡಳಿತ ಆರಂಭಿಸಿದ್ದ ಚೆಲುವ ಚಾಮರಾಜ ನಗರ ಅಭಿಯಾನದ ರಾಯಭಾರಿಯಾಗಿದ್ದರು. ಅವರನ್ನು ಸ್ಮರಿಸುವ ಉದ್ದೇಶದಿಂದ ಈ ಸ್ತಬ್ಧ ಚಿತ್ರ ತಯಾರಿಸಲಾಗಿದೆ ಎಂದು ಹೇಳಲಾಗಿದೆ.

Mysuru Dasara | 22 ಸಾವಿರ ಜನರಿಗೆ ಜಂಬೂಸವಾರಿ ವೀಕ್ಷಣೆಗೆ ಅವಕಾಶ: ಅರಮನೆ ನಗರಿಯಲ್ಲಿ ಅಂತಿಮ ಹಂತದ ಸಿದ್ಧತೆ
ಸ್ತಬ್ದ ಚಿತ್ರ ಎರಡು ಕೊನೆಗಳನ್ನು ಹೊಂದಿದ್ದು, ಮುಂಭಾಗದ ಕೊನೆಯಲ್ಲಿ ಪುನೀತ್ ಅವರ ಮುಖವನ್ನು ಫೈಬರ್ ನಿಂದ ರಚಿಸಲಾಗಿದೆ. ಹಿಂಭಾಗದಲ್ಲಿ ಹುಲಿಯ ಮುಖವನ್ನು ಸೃಷ್ಟಿಸಲಾಗಿದೆ. ಪುನೀತ್ ಮತ್ತು ಹುಲಿಯ ನಡುವಿನ ಸ್ತಬ್ಧಚಿತ್ರದ ಸ್ಥಳದಲ್ಲಿ ಜಿಲ್ಲೆಯ ವಿಶೇಷತೆಗಳನ್ನು ಬಿಂಬಿಸಲಾಗಿದೆ. ಹುಲಿಯ ಸವಾರಿ ಮಾಡುತ್ತಿರುವ ಮಲೆಮಹದೇಶ್ವರ ಸ್ವಾಮಿ, ಆನೆಗಳು ಹಾಗೂ ಇತರ ಪ್ರಾಣಿಗಳ ಪ್ರತಿಕೃತಿಗಳನ್ನು ನಿರ್ಮಿಸಲಾಗಿದೆ. ಸ್ತಬ್ಧಚಿತ್ರ ತಯಾರಕರಾದ ಮಹದೇವ್ ಅವರ ನೇತೃತ್ವದಲ್ಲಿ ಈ ಸ್ತಬ್ದಚಿತ್ರವನ್ನು ನಿರ್ಮಿಸಲಾಗಿದೆ.