ಚಾಮರಾಜನಗರ: ತೆರಕಣಾಂಬಿ ಸಮೀಪ ಹುಲಿ ಹೆಜ್ಜೆ ಪತ್ತೆ

ಗುಂಡ್ಲುಪೇಟೆ (ಚಾ.ನಗರ ಜಿಲ್ಲೆ): ತಾಲೂಕಿನ ತೆರಕಣಾಂಬಿ ಹೊರ ವಲಯದಲ್ಲಿ ಹುಲಿಹೆಜ್ಜೆ ಗುರುತು ಮೂಡಿದ್ದು, ಈ ಭಾಗದ ರೈತರು ಮತ್ತು ತೋಟದ ಮನೆ ನಿವಾಸಿಗಳು ಭೀತಿಗೊಂಡಿದ್ದಾರೆ.

ಗ್ರಾಮದ ತೋಪು (ಸ್ಮಶಾನ)ದಿಂದ ದಕ್ಷಿಣದ ಕಡೆಗೆ ಹೋಗುವ ದಾರಿಯಲ್ಲಿರುವ ಚೆಕ್‌ಡ್ಯಾಂಗೆ ಹೊಂದಿಕೊಂಡ ಪ್ರದೇಶದಲ್ಲಿ ಹುಲಿ ಅತ್ತಿತ್ತ ಅಡ್ಡಾಡಿ, ನಂತರ ಈ ಭಾಗದಲ್ಲೇ ಇರುವ ಸಂರಕ್ಷಿತ ಅರಣ್ಯ ಪ್ರದೇಶಕ್ಕೆ ಹೋಗಿರುವುದು ಮಳೆ ಕಾರಣ ಮೂಡಿರುವ ಹೆಜ್ಜೆ ಗುರುತುಗಳಿಂದ ಸ್ಪಷ್ಟವಾಗಿದೆ.

ಈ ಪ್ರದೇಶದಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಕೃಷಿ ಭೂಮಿ ಬೀಳು ಬಿದ್ದಿವೆ. ಇಲ್ಲಿಚುಕ್ಕಿ ಜಿಂಕೆಗಳು ಮತ್ತು ನವಿಲುಗಳು ಆಶ್ರಯ ಪಡೆದಿವೆ. ಮಳೆ ನೀರು ಹಳ್ಳ ಇತರೆ ಕಡೆಗಳಲ್ಲೂ ಪೊದೆಗಳು ಹೆಚ್ಚಾಗಿ ಬೆಳೆದಿರುವ ಕಾರಣ ಜನಸಂಚಾರ ವಿರಳವಾಗಿರುವುದರಿಂದ ಆಹಾರ ಅರಸಿ ಬಂದಿರುವ ಸಾಧ್ಯತೆ ಇದೆ ಎಂಬುದು ರೈತರ ಅಭಿಪ್ರಾಯವಾಗಿದೆ.

ವರ್ಷದ ಹಿಂದೆ ದೇಪಾಪುರ ತಿರುವಿನಲ್ಲಿ ವಾಯುವಿಹಾರಕ್ಕೆ ಹೋಗಿದ್ದವರಿಗೆ ಹುಲಿ ಕಾಣಿಸಿಕೊಂಡು ಜನರು ಆತಂಕಗೊಂಡಿದ್ದರು. ಇದಾದ ನಂತರ ಮೇಯಲು ಹೋಗಿದ್ದ ಜಾನುವಾರುಗಳು ಮೃತಪಟ್ಟ ಹಿನ್ನೆಲೆಯಲ್ಲಿ ಹುಲಿ ದಾಳಿಯ ಶಂಕೆ ವ್ಯಕ್ತವಾಗುತ್ತಿತ್ತು. ಆದರೆ ಹುಲಿ ಎಲ್ಲಿಯೂ ಕಾಣಿಸಿಕೊಂಡಿರಲಿಲ್ಲ. ಆದರೆ ಸೋಮವಾರ ರಾತ್ರಿ ಮಳೆ ಕಾರಣ ಮೂಡಿರುವ ಹೆಜ್ಜೆ ಗುರುತುಗಳಿಂದ ಈ ಭಾಗದಲ್ಲೇ ಹುಲಿ ಸಂಚಾರ ಇರುವುದು ಸ್ಪಷ್ಟವಾಗಿದೆ. ಇದರಿಂದ ನಮಗೆ ಆತಂಕವಾಗಿದೆ ಎಂದು ಸ್ಥಳೀಯ ರೈತರು ವಿಜಯ ಕರ್ನಾಟಕಕ್ಕೆ ತಿಳಿಸಿದ್ದಾರೆ.