ವಿ. ಶ್ರೀನಿವಾಸಪ್ರಸಾದ್‌ 14.17 ಕೋಟಿ ಒಡೆಯ

ಚಾಮರಾಜನಗರ : ಚಾ.ನಗರ ಲೋಕಸಭೆ ಕ್ಷೇತ್ರದಿಂದ ಬಿಜೆಪಿ ಅಭ್ಯರ್ಥಿಯಾಗಿ ನಾಮಪತ್ರ ಸಲ್ಲಿಸಿರುವ ವಿ. ಶ್ರೀನಿವಾಸಪ್ರಸಾದ್‌ ಅವರು ಒಟ್ಟು 14.17 ಕೋಟಿ ರೂ. ಒಡೆಯರಾಗಿದ್ದಾರೆ.

ಅವರು ಮಂಗಳವಾರ ಚುನಾವಣಾ ಆಯೋಗಕ್ಕೆ ಸಲ್ಲಿಸಿರುವ ಅಫಿಡವಿಟ್‌ನಲ್ಲಿ ತಮ್ಮ ಚರಾಸ್ತಿ, ಸ್ಥಿರಾಸ್ತಿ ಮೌಲ್ಯವನ್ನು ಘೋಷಿಸಿಕೊಂಡಿದ್ದಾರೆ.

2017-18ನೇ ಸಾಲಿನಲ್ಲಿ ಆದಾಯ ತೆರಿಗೆ ಇಲಾಖೆಗೆ ಸಲ್ಲಿಸಿರುವಂತೆ ಅವರ ವಾರ್ಷಿಕ ಆದಾಯ 25.77 ಲಕ್ಷ ರೂ. ಆಗಿದೆ. ಅವರ ವಿರುದ್ಧ ಯಾವುದೇ ಕ್ರಿಮಿನಲ್‌ ಪ್ರಕರಣಗಳು ದಾಖಲಾಗಿಲ್ಲ.

ಅವರ ಬಳಿ 13.40 ಕೋಟಿ ರೂ. ಮೌಲ್ಯದ ಸ್ಥಿರಾಸ್ತಿ ಹಾಗೂ 77.62 ಲಕ್ಷ ರೂ. ಮೌಲ್ಯದ ಚರಾಸ್ತಿ ಇದೆ.

ವಿವರ: ಪ್ರಸಾದ್‌ ಅವರ ಬಳಿ 8.54 ಲಕ್ಷ ರೂ. ನಗದು ಹಣವಿದೆ. ಮೈಸೂರಿನ ಕೆ.ಎಂ. ಪುರಂನ ಎಸ್‌ಬಿಐ ಶಾಖೆಯ ಉಳಿತಾಯ ಖಾತೆಯಲ್ಲಿ 2.92 ಲಕ್ಷ ರೂ., ಚಾಮುಂಡಿಪುರಂ ಎಸ್‌ಬಿಐನಲ್ಲಿ 4.20 ಲಕ್ಷ ರೂ., ಅಪೆಕ್ಸ್‌ ಬ್ಯಾಂಕ್‌ನಲ್ಲಿ 1.89 ಲಕ್ಷ ರೂ., ನಂಜನಗೂಡಿನ ಕಾರ್ಪೊರೇಷನ್‌ ಬ್ಯಾಂಕ್‌ನಲ್ಲಿ 5.22 ಲಕ್ಷ ರೂ., ಚಾಮುಂಡಿಪುರಂ ಎಸ್‌ಬಿಐನ ಕರೆಂಟ್‌ ಅಕೌಂಟಿನಲ್ಲಿ 2 ಲಕ್ಷ ರೂ. ಹಾಗೂ ವಿಶ್ವೇಶ್ವರನಗರ ಎಸ್‌ಬಿಐನಲ್ಲಿ 1.90 ಲಕ್ಷ ರೂ. ಠೇವಣಿ ಹಣವಿದೆ.

ರೇಮಂಡ್ಸ್‌ ಸಿಂಥೆಟಿಕ್‌ ಲಿಮಿಟೆಡ್‌ನ 5 ಸಾವಿರ ಮುಖಬೆಲೆಯ 500 ಶೇರ್‌ಗಳಿವೆ. ಇದರ ಮಾರುಕಟ್ಟೆ ಮೌಲ್ಯ 4 ಲಕ್ಷ ರೂ., 25 ಲಕ್ಷ ರೂ.ಗೆ 2016ರಲ್ಲಿ ಖರೀದಿಸಿದ ಇನ್ನೋವಾ ಕ್ರಿಸ್ಟಾ ಕಾರಿದೆ. 10 ಲಕ್ಷ ರೂ. ಮೌಲ್ಯದ ಪೀಠೋಪಕರಣ, ಟಿ.ವಿ. ಇತ್ಯಾದಿ ಗೃಹೋಪಯೋಗಿ ವಸ್ತುಗಳಿವೆ.

ಸ್ಥಿರಾಸ್ತಿ: ಮೈಸೂರಿನ ಇಂಡಸ್ಟ್ರಿಯಲ್‌ ಸಬರ್ಬ್‌ನಲ್ಲಿ 2.94 ಕೋಟಿ ರೂ. ಮೌಲ್ಯದ ಎಲ್‌ಪಿಜಿ ಗ್ಯಾಸ್‌ ಗೋದಾಮು, ಮೈಸೂರಿನ ಜಯಲಕ್ಷ್ಮಿ ಪುರಂನಲ್ಲಿ 3.48 ಕೋಟಿ ರೂ. ಮೌಲ್ಯದ ಮನೆ ಹಾಗೂ ಬೆಂಗಳೂರಿನ ಡಾಲರ್ಸ್‌ ಕಾಲನಿಯಲ್ಲಿ 6.96 ಕೋಟಿ ರೂ. ಮೌಲ್ಯದ ಮನೆ ಹೊಂದಿದ್ದಾರೆ. ಎಸ್‌ಬಿಐನಲ್ಲಿ 3.25 ಲಕ್ಷ ರೂ. ವಾಹನ ಸಾಲ ಬಾಕಿ ಇದೆ.

ಚಿನ್ನಾಭರಣ ಇಲ್ಲ: ಶ್ರೀನಿವಾಸಪ್ರಸಾದ್‌ ಅವರ ಪತ್ನಿ ಭಾಗ್ಯಲಕ್ಷ್ಮಿ ಅವರು 1.42 ಲಕ್ಷ ರೂ. ನಗದು ಹೊಂದಿದ್ದಾರೆ. ನಾನಾ ಬ್ಯಾಂಕ್‌ಗಳಲ್ಲಿರುವ ಠೇವಣಿಗಳು ಸೇರಿ ಒಟ್ಟು 20.54 ಲಕ್ಷ ರೂ. ಚರಾಸ್ತಿ ಹೊಂದಿದ್ದಾರೆ.

ಪ್ರಸಾದ್‌ ಅವರು ಯಾವುದೇ ಚಿನ್ನಾಭರಣ ಹೊಂದಿಲ್ಲ. ಅವರ ಪತ್ನಿ 175 ಗ್ರಾಂನ 5.25 ಲಕ್ಷ ರೂ.ನ ಚಿನ್ನಾಭರಣ ಹೊಂದಿದ್ದಾರೆ. 4 ಕೆಜಿ ತೂಕದ 1.64 ಲಕ್ಷ ರೂ.ಗಳ ಬೆಳ್ಳಿ ಪದಾರ್ಥಗಳಿವೆ ಎಂದು ತಿಳಿಸಲಾಗಿದೆ.


ಬಿಎಸ್ಪಿ ಅಭ್ಯರ್ಥಿ ಶಿವಕುಮಾರ್‌ ಕೋಟಿ ರೂ. ಸಾಲಗಾರ !

ಚಾಮರಾಜನಗರ: ಬಹುಜನ ಸಮಾಜ ಪಕ್ಷದ ಅಭ್ಯರ್ಥಿಯಾಗಿ ನಾಮಪತ್ರ ಸಲ್ಲಿಸಿರುವ ಡಾ.ಶಿವಕುಮಾರ್‌ ಅವರ ಒಟ್ಟು ಘೋಷಿತ ಆಸ್ತಿ 1.27 ಕೋಟಿ ರೂ. ಆದರೆ, ಅವರು 1.16 ಕೋಟಿ ರೂ. ಸಾಲ ಪಡೆದಿದ್ದಾರೆ.

ಅವರ ಚರಾಸ್ತಿ ಮೌಲ್ಯ 49 ಲಕ್ಷ ರೂ., ಸ್ಥಿರಾಸ್ತಿ ಮೌಲ್ಯ 88.75 ಲಕ್ಷ ರೂ. ಆಗಿದೆ. ಅವರು 1.50 ಲಕ್ಷ ರೂ. ಮೌಲ್ಯದ 50 ಗ್ರಾಂ. ಚಿನ್ನ ಹೊಂದಿದ್ದಾರೆ. 2 ಲಕ್ಷ ರೂ. ನಗದು ಹೊಂದಿದ್ದಾರೆ. ಪಿಎಚ್‌ಡಿ ಪದವಿ ಪಡೆದಿರುವ ಶಿವಕುಮಾರ್‌, ಅವಿವಾಹಿತರು.