ವರಮಹಾಲಕ್ಷ್ಮಿ ಹಬ್ಬಕ್ಕೆ ಖರೀದಿ ಬಲು ಜೋರು

ಚಾಮರಾಜನಗರ: ಹಣ್ಣು-ಹಂಪಲು, ಹೂವು ಸೇರಿದಂತೆ ಅಗತ್ಯ ವಸ್ತುಗಳ ಬೆಲೆ ಏರಿಕೆ ನಡುವೆಯೂ ವರ ಮಹಾಲಕ್ಷ್ಮಿ ಹಬ್ಬದ ಸಂಭ್ರಮಕ್ಕೆ ತೊಡಕಾಗಿಲ್ಲ. ಹಬ್ಬಕ್ಕೆ ಪೂಜಾ ಸಾಮಗ್ರಿ ಖರೀದಿಸುವಲ್ಲಿ ಜನತೆ ಹಿಂದೆ ಬೀಳಲಿಲ್ಲ.

ನಗರದ ಪೇಟೆ ಬೀದಿಯಲ್ಲಿ ಹಬ್ಬದ ಮುನ್ನಾ ದಿನವಾದ ಗುರುವಾರ ಹೂವು, ಹಣ್ಣು ಇತರೆ ಪದಾರ್ಥಗಳನ್ನು ಖರೀದಿಸಲು ಜನತೆ ಹೆಚ್ಚಾಗಿಯೇ ಜಮಾಯಿಸಿದ್ದರು.. ಈ ಪೈಕಿ ಹೆಂಗಳೆಯರ ದಂಡೇ ಹೆಚ್ಚು.

ಪೇಟೆ ಬೀದಿಯಲ್ಲಂತೂ ಖರೀದಿ ಭರಾಟೆ ಹೆಚ್ಚಾಗಿತ್ತು. ಎತ್ತ ನೋಡಿದರೂ ಹೂವು, ಹಣ್ಣುಗಳನ್ನು ರಾಶಿ ಇಟ್ಟ ಕೈ ಗಾಡಿಗಳ ಸಾಲು ಕಂಡು ಬಂತು.

ಜನರೂ ಅಷ್ಟೆ ಸಂಜೆ ವೇಳೆಗೆ ಸಾಕಷ್ಟು ಸಂಖ್ಯೆಯಲ್ಲಿ ನೆರೆದು ಪದಾರ್ಥಗಳನ್ನು ಖರೀದಿಸುವ ದೃಶ್ಯ ಸಾಮಾನ್ಯವಾಗಿತ್ತು. ಬೆಲೆ ಹೆಚ್ಚಾದರೇನಂತೆ ಹಬ್ಬ ಮಾಡುವುದನ್ನು ಬಿಡುವುದುಂಟೇ ಎಂಬಂತೆ ಇತ್ತು ಜನರ ಮೂಡು.

ಹಣ್ಣಿನ ಅಂಗಡಿಗಳು, ಹೂವಿನ ಮಾರಾಟ ಕೇಂದ್ರಗಳು, ತರಕಾರಿ ಮಾರುಕಟ್ಟೆ, ಬಳೆ ಅಂಗಡಿಗಳಲ್ಲಿ ಹೆಚ್ಚಿನ ಜನಸಂದಣಿ ಹೆಚ್ಚಾಗಿ ಕಂಡು ಬಂತು.

ಒಟ್ಟಾರೆ ಈ ಅಂಗಡಿಗಳು ಹೆಚ್ಚಿರುವ ರಥ ಬೀದಿ, ದೊಡ್ಡಂಗಡಿ ಬೀದಿ ಹಾಗೂ ಮಾರುಕಟ್ಟೆ ವೃತ್ತ ಗುರುವಾರ ಸಂಜೆ ಸ್ವಲ್ಪ ಬಿಜಿಯಾಗಿತ್ತು. ಗುರುವಾರ ಸಂಜೆಯಿಂದಲೇ ಶುಕ್ರವಾರದ ಲಕ್ಷ್ಮಿ ಹಬ್ಬದ ಸಂಭ್ರಮದಲ್ಲಿ ಜನರಿದ್ದರು.

ಬಕ್ರೀದ್‌ ನಂತರ ಲಕ್ಷ್ಮೇ: ನಿನ್ನೆಯಷ್ಟೇ ಬಕ್ರೀದ್‌ ವ್ಯಾಪಾರದಲ್ಲಿ ಬಿಜಿಯಾಗಿದ್ದ ನಗರದ ವ್ಯಾಪಾರಿಗಳಿಗೆ ಅದರ ಮಾರನೇ ದಿನವೇ ಮತ್ತೊಂದು ಹಬ್ಬದ ವಹಿವಾಟು ಉತ್ತಮವಾಗಿ ನಡೆಯುವ ಮೂಲಕ ಆ ವರ್ಗದಲ್ಲಿ ಖುಷಿ ನೀಡಿತು.

ಇನ್ನು ಲಕ್ಷ್ಮೇ ಹಬ್ಬಕ್ಕೆ ಬಾಳೆ ದಿಂಡು, ತೋರಣಕ್ಕೆ ಮಾವಿನ ಸೊಪ್ಪು ಸೇರಿದಂತೆ ಅಲಂಕಾರಿಕ ವಸ್ತುಗಳ ಮಾರಾಟವು ನಡೆದಿತ್ತು.