27 ವರ್ಷಗಳ ನಂತರ ವೀರಪ್ಪನ್‌ ಸಹಾಯಕಿ ಬಂಧನ

ಕೊಳ್ಳೇಗಾಲ: ಕಾಡುಗಳ್ಳ ವೀರಪ್ಪನ್‌ ಸಹಚರನೊಬ್ಬನ ಪತ್ನಿಯನ್ನು 27 ವರ್ಷದ ಬಳಿಕ ಡಿವೈಎಸ್‌ಪಿ ನೇತೃತ್ವದ ಅಪರಾಧ ಪತ್ತೆ ದಳ ಬಂಧಿಸಿ ನ್ಯಾಯಾಲಯಕ್ಕೆ ಒಪ್ಪಿಸಿದ್ದು, ಆರೋಪಿಗೆ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ. ಕೊಳ್ಳೇಗಾಲ ತಾಲೂಕಿನ ಮಾರ್ಟಳ್ಳಿ ಸಮೀಪದ ನಲ್ಲೂರು ಗ್ರಾಮದ ಸ್ಟೆಲ್ಲಾಅಲಿಯಾಸ್‌ ಸ್ಟೆಲ್ಲಾಮೇರಿ ಬಂಧಿತ ಆರೋಪಿ.

ಅಪ್ರಾಪ್ತೆಯಾಗಿದ್ದಾಗಲೇ ಕಾಡು ಸೇರಿದ್ದ ಈಕೆಗೆ ಈಗ 40 ವರ್ಷ. 27 ವರ್ಷಗಳ ನಂತರ ವೀರಪ್ಪನ್‌ ಸಹಚರನ ಪತ್ನಿಯನ್ನು ಪೊಲೀಸರು ಬಂಧಿಸಿರುವುದು ಅಚ್ಚರಿಗೆ ಕಾರಣವಾಗಿದೆ. ವೀರಪ್ಪನ್‌ ಗುಂಪಿಗೆ ಬಲವಂತವಾಗಿ ಈಕೆ ಸೇರಿಕೊಂಡಾಗ 13 ವರ್ಷದ ಬಾಲಕಿಯಾಗಿದ್ದಳು. 2003ರ ಏ. 9ರಂದು ಅರಣ್ಯ ಗಸ್ತು ತಂಡದ ಮೇಲೆ ದಾಳಿ ಹಾಗೂ ಪಾಲಾರ್‌ ಬಾಂಬ್‌ ಸ್ಫೋಟ ಸೇರಿದಂತೆ ಇತರ ಪ್ರಕರಣಗಳಲ್ಲಿ ಈಕೆ ಮೇಲೆ ಅಕ್ರಮ ಶಸ್ತಾ್ರಸ್ತ್ರ ಹೊತ್ತೊಯ್ದ ಆರೋಪವಿತ್ತು. ಈವರೆಗೆ ತಲೆಮರೆಸಿಕೊಂಡಿದ್ದ ಸ್ಟೆಲ್ಲಾ, ಪತಿ ಸುಂಡ ಅನಾರೋಗ್ಯದಿಂದ ಮೃತಪಟ್ಟ ನಂತರ ಕೊಳ್ಳೇಗಾಲ ತಾಲೂಕಿನ ಜಾಗೇರಿಯ ಚೆನ್ನಿಪುರದದೊಡ್ಡಿಯ ವೇಲುಸ್ವಾಮಿಯನ್ನು ವರಿಸಿ ಗುತ್ತಿಗೆ ಆಧಾರದ ಮೇಲೆ 6 ಎಕರೆ ಭೂಮಿಯಲ್ಲಿ ಬೇಸಾಯ ಮಾಡುತ್ತಿದ್ದಳು. ನಾಲ್ಕು ದಿನಗಳ ಹಿಂದೆ ಕಾಡಾನೆಗಳ ಹಿಂಡು ಇವರ ಜಮೀನಿಗೆ ಲಗ್ಗೆ ಹಿನ್ನೆಲೆಯಲ್ಲಿ ಅರಣ್ಯ ಇಲಾಖೆ ಸಿಬ್ಬಂದಿ ಫೈರ್‌ ಮಾಡಿದಾಗ ಇವರ ಜಮೀನಿಗೆ ಬೆಂಕಿ ಬಿದ್ದಿತ್ತು. ಈ ವೇಳೆ, ಪೊಲೀಸರಿಗೆ ಈಕೆ ಇರುವ ವಿಚಾರ ತಿಳಿದು ಡಿವೈಎಸ್ಪಿ ನವೀನ್‌ ಕುಮಾರ್‌ ಮಾರ್ಗದರ್ಶನದಲ್ಲಿಅಪರಾಧ ಪತ್ತೆದಳದ ಸಿಬ್ಬಂದಿಗಳಾದ ಗೋವಿಂದರಾಜು, ವೆಂಕಟೇಶ್‌, ದೊರೆಸ್ವಾಮಿ ಹಾಗೂ ವಸಂತಾ ಮತ್ತಿತರ ತಂಡ ಆರೋಪಿಯನ್ನು ಬಂಧಿಸಿತು.