ವಾಟ್ಸ್‌ಆ್ಯಪ್‌ ಮನವಿಗೆ ಸ್ಪಂದಿಸಿದ ಡಿಸಿ: ಶಿಡ್ಲಘಟ್ಟ ನಾಗರಿಕರಿಂದ ಮೆಚ್ಚುಗೆ

ಶಿಡ್ಲಘಟ್ಟ: ಮ್ಯಾನ್‌ ಹೋಲ್‌ಗಳು ಬಂದ್‌ ಆಗಿದ್ದು ದುರಸ್ತಿ ಕೈಗೊಳ್ಳುವಂತೆ ನಗರಸಭೆ ಅಧಿಕಾರಿಗಳಿಗೆ ಹೇಳಿ ಹೇಳಿ ಸುಸ್ತಾದ ನಾಗರಿಕರು ಕೊನೆಗೆ ಡಿಸಿಗೆ ಮ್ಯಾನ್‌ ಹೋಲ್‌ನ ಚಿತ್ರ ಸಮೇತ ಸಮಸ್ಯೆಯನ್ನು ವಾಟ್ಸ್‌ಆ್ಯಪ್‌ ಮಾಡಿದ್ದು, ಕೂಡಲೇ ಸ್ಪಂದಿಸಿದ ಡಿಸಿ ಕ್ರಮ ನಾಗರಿಕರ ಮೆಚ್ಚುಗೆಗೆ ಪಾತ್ರವಾಗಿದೆ.

ನಗರದ ದಿಬ್ಬೂರಹಳ್ಳಿ ಮಾರ್ಗದ ಆಸುಪಾಸಿನ ವಾರ್ಡ್‌ 16ರಲ್ಲಿನ ಟಿಎಂಸಿ ಲೇಔಟ್‌, ಬಿಸಿಎಂ ಹಾಸ್ಟೆಲ್‌ ಪ್ರದೇಶ, ಬಿಲಾಲ್‌ ಮಸೀದಿ ಇರುವ ಭಾಗದಲ್ಲಿ ಒಳ ಚರಂಡಿಯ ಮ್ಯಾನ್‌ ಹೋಲ್‌ಗಳು ಬ್ಲಾಕ್‌ ಆಗಿದ್ದವು. ಇತ್ತೀಚೆಗೆ ಈ ಭಾಗದಲ್ಲಿ ಡಾಂಬರೀಕರಣ ಮಾಡಲಾಗಿತ್ತು. ಮ್ಯಾನ್‌ ಹೋಲ್‌ಗಳ ಮೇಲ್ಭಾಗ ಕಾಣದಂತೆ ಡಾಂಬರಿನಿಂದ ಮುಚ್ಚಿ ಹಾಕಲಾಗಿತ್ತು.

ಮ್ಯಾನ್‌ ಹೋಲ್‌ಗಳಲ್ಲಿ ತ್ಯಾಜ್ಯ ನೀರು ಹರಿಯದೆ ಮನೆ ಮಠಕ್ಕೆ ನುಗ್ಗಿ ಇನ್ನಿಲ್ಲದ ಸಮಸ್ಯೆಗಳು ಎದುರಾಗಿತ್ತು. ಈ ಬಗ್ಗೆ ಆ ಭಾಗದ ನಾಗರಿಕರು ನಗರಸಭೆ ಅಧಿಕಾರಿಗಳಿಗೆ ಮನವಿಗೆ ಸ್ಪಂದಿಸಿರಲ್ಲಿಲ್ಲ. ಇದರಿಂದ ಬೇಸತ್ತ ಸ್ಥಳೀಯರು ಜಿಲ್ಲಾಧಿಕಾರಿ ಆರ್‌. ಲತಾಗೆ ಸಮಸ್ಯೆ ಬಿಂಬಿಸುವ ಚಿತ್ರಗಳನ್ನು ವಾಟ್ಸ್‌ಆ್ಯಪ್‌ ಮಾಡಿ, ಸಮಸ್ಯೆ ನಿವಾರಿಸುವಂತೆ ಮನವಿ ಮಾಡಿದ್ದರು.

ತಕ್ಷಣ ಸ್ಪಂದಿಸಿದ ಜಿಲ್ಲಾಧಿಕಾರಿ, ನಗರಸಭೆ ಪೌರಾಯುಕ್ತರಿಗೆ ಕೂಡಲೇ ಸ್ಥಳಕ್ಕೆ ತೆರಳಿ ಮ್ಯಾನ್‌ ಹೋಲ್‌ಗಳನ್ನು ದುರಸ್ತಿಪಡಿಸಿ, ಸಮಸ್ಯೆ ಬಗೆಹರಿದಿರುವ ಬಗ್ಗೆ ಖಾತ್ರಿಪಡಿಸುವಂತೆ ಸೂಚಿಸಿದ್ದಾರೆ. ಪೌರಾಯುಕ್ತ ಜಿ.ಎನ್‌.ಚಲಪತಿ ಅವರು, ಪರಿಸರ ಅಭಿಯಂತರ ಆಂಜಿನಪ್ಪ, ಆರೋಗ್ಯ ನಿರೀಕ್ಷಕ ದಿಲೀಪ್‌ ಕುಮಾರ್‌ ಹಾಗೂ ಒಳ ಚರಂಡಿ ಕಾರ್ಯ ನಿರ್ವಹಣೆಯ ಸಿಬ್ಬಂದಿ ಮ್ಯಾನ್‌ ಹೋಲ್‌ಗಳ ದುರಸ್ತಿ ನಡೆಸಿ ಸಮಸ್ಯೆ ಬಗೆಹರಿಸಿ, ಜಿಲ್ಲಾಧಿಕಾರಿಗಳಿಗೆ ಖಾತ್ರಿಪಡಿಸಿದ್ದಾರೆ.