ರೂಪಾಂತರಿ ಕೊರೊನಾ: ನಂದಿಬೆಟ್ಟಕ್ಕೆ 3 ದಿನ ನೋ ಎಂಟ್ರಿ, ರೆಸಾರ್ಟ್‌ಗಳಲ್ಲಿ ನೈಟ್‌ ಪಾರ್ಟಿಗೆ ಬ್ರೇಕ್‌

ಬೆಂಗಳೂರು: ರೂಪಾಂತರಿ ಕೊರೊನಾ ಆತಂಕದ ಹಿನ್ನೆಲೆ ರಾಜ್ಯದ ಪ್ರಮುಖ ಪ್ರವಾಸಿ ತಾಣ ನಂದಿಬೆಟ್ಟಕ್ಕೆ ಡಿ.30, ಡಿ.31 ಮತ್ತು ಜ.1ರಂದು ಪ್ರವಾಸಿಗರ ಪ್ರವೇಶವನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ನಂದಿ ತಪ್ಪಲಿನಲ್ಲಿರುವ ರೆಸಾರ್ಟ್‌ಗಳಲ್ಲೂ ನೈಟ್‌ಪಾರ್ಟಿ ಆಯೋಜನೆಗೆ ತಡೆ ಸೇರಿ ನಾನಾ ನಿರ್ಬಂಧ ವಿಧಿಸಲಾಗಿದೆ.

ನಂದಿಬೆಟ್ಟದ ತಪ್ಪಲಿನಲ್ಲಿ ಅನೇಕ ರೆಸಾರ್ಟ್‌ಗಳು ತಲೆಯೆತ್ತಿದ್ದು, ಹೊಸ ವರ್ಷಾಚರಣೆಗೆ ಪಾರ್ಟಿಗಳ ಹೆಸರಲ್ಲಿ ಮೋಜು ಮಸ್ತಿ ರಂಗೇರುವುದು ಸಾಮಾನ್ಯವಾಗಿತ್ತು. ಈ ಬಾರಿ ರೆಸಾರ್ಟ್‌ಗಳ ಪಾರ್ಟಿಗಳಿಗೆ ಬ್ರೇಕ್‌ ಹಾಕಲು ಚಿಕ್ಕಬಳ್ಳಾಪುರ, ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಪೊಲೀಸರು ನಿರ್ಧರಿಸಿದ್ದಾರೆ. ಡಿ.29ರಂದು ಸಭೆ ಮೂಲಕ ರೆಸಾರ್ಟ್‌ಗಳಿಗೂ ಪ್ರತ್ಯೇಕ ಮಾರ್ಗಸೂಚಿ ಬಿಡುಗಡೆ ಮಾಡಲಿದ್ದಾರೆ.

ಗ್ರಾಮಸ್ಥರು ನಿರಾಳ

ಪೊಲೀಸರ ಈ ನಡೆಯಿಂದ ನಂದಿಬೆಟ್ಟದ ಸುತ್ತಲಿನ ಕಣಿವೆಪುರ, ಹೆಗ್ಗಡಿಹಳ್ಳಿ, ಕಾರೇಹಳ್ಳಿ ಸೇರಿದಂತೆ ಸ್ಥಳೀಯ ಗ್ರಾಮಸ್ಥರು ನಿರಾಳರಾಗುವಂತಾಗಿದೆ. ಪ್ರತಿವರ್ಷ ಜ.1ಕ್ಕೆ ಮೂರ್ನಾಲ್ಕು ದಿನಗಳ ಹಿಂದಿನಿಂದಲೇ ಡಿಜೆ ಅಳವಡಿಕೆ, ಪ್ರವಾಸಿಗರ ಆಗಮನ, ಮಧ್ಯರಾತ್ರಿಯವರೆಗೆ ಸೌಂಡ್‌ಸಿಸ್ಟಮ್‌ ಅಳವಡಿಕೆಯಿಂದಾಗಿ ಜನರಿಗೆ ಕಿರಿಕಿರಿಯುಂಟಾಗುತ್ತಿತ್ತು. ಸ್ಥಳೀಯರು ಕಳೆದ ವರ್ಷ ಪ್ರತಿಭಟನೆಗೂ ಮುಂದಾಗಿದ್ದರು.

''ಡಿ.30, 31, ಜ.1 ರಂದು ನಂದಿಬೆಟ್ಟಕ್ಕೆ ಪ್ರವಾಸಿಗರ ಪ್ರವೇಶ ಸಂಪೂರ್ಣ ನಿರ್ಬಂಸಲಾಗಿದೆ. ರೆಸಾರ್ಟ್‌ಗಳಿಗೆ ಈಗಾಗಲೇ ನೈಟ್‌ ಪಾರ್ಟಿಗಳನ್ನು ನಡೆಸಬಾರದು ಎನ್ನುವ ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿದೆ. ನಿಯಮ ಉಲ್ಲಂಘನೆ ಮಾಡಿದರೆ ಕಾನೂನು ಕ್ರಮ ಕೈಗೊಳ್ಳಲಾಗುತ್ತದೆ.
- ಮಿಥುನ್‌ ಕುಮಾರ್‌, ಚಿಕ್ಕಬಳ್ಳಾಪುರ ಪೊಲೀಸ್‌ ವರಿಷ್ಠಾಕಾರಿ