ಚಿಕ್ಕಬಳ್ಳಾಪುರ: ಆರೋಗ್ಯ ಇಲಾಖೆ ಎಲ್ಲಾ ಖರೀದಿಯನ್ನು ಅತ್ಯಂತ ಪಾರದರ್ಶಕವಾಗಿ ಮಾಡಿದೆ. ಕಾಂಗ್ರೆಸ್‌ನವರು ಮೊಸರಲ್ಲಿ ಕಲ್ಲು ಹುಡುಕುವ ಚಾಳಿಯನ್ನು ಮೊದಲು ಬಿಡಬೇಕು. ಕಾಮಾಲೆ ಕಣ್ಣಿಗೆ ಕಾಣೋದೆಲ್ಲಾ ಹಳದಿ ಬಣ್ಣ ಅನ್ನುವ ಹಾಗೆ ಈಗ ಆರೋಗ್ಯ ಇಲಾಖೆಯಲ್ಲಿ ಕಲ್ಲು ಹುಡುಕಲು ಬಂದಿದ್ದಾರೆ ಎಂದು ವೈದ್ಯಕೀಯ ಶಿಕ್ಷಣ ಸಚಿವ ಡಾ.ಕೆ. ಸುಧಾಕರ್‌ ವಾಗ್ದಾಳಿ ನಡೆಸಿದರು.

ಚಿಕ್ಕಬಳ್ಳಾಪುರದಲ್ಲಿ ಮಾಧ್ಯಮಗಳ ಜೊತೆಗೆ ಮಾತನಾಡಿದ ಅವರು, “ಅವರಿಗೆ ಅವರ ಆಡಳಿತವಿದ್ದಾಗ ಬರೀ ಹಗರಣ ಮಾಡಿ ಮಾಡಿ ಎಲ್ಲವೂ ಹಾಗೇ ಕಾಣಿಸುತ್ತದೆ. ಮೊದಲು ಆ ಕಾಯಿಲೆಯಿಂದ ಹೊರಬರಲಿ,” ಎಂದು ಲೇವಡಿ ಮಾಡಿದರು.

ಆರೋಗ್ಯ ಇಲಾಖೆಯವರು ಅತ್ಯಂತ ಪಾರದರ್ಶಕವಾಗಿ ಎಲ್ಲವನ್ನೂ ನಿರ್ವಹಿಸಿದ್ದಾರೆ. ಪ್ರಾರಂಭದಲ್ಲಿ ಪಿಪಿಇ ಕಿಟ್ ಮತ್ತು ಸ್ಯಾನಿಟೈಜರ್‌ಗೆ ಹೆಚ್ಚಿನ ಬೇಡಿಕೆ ಇತ್ತು. ಹಾಗಾಗಿ ಟೆಂಡರ್ ಕರೆದರೆ ವಿಳಂಬವಾಗುತ್ತದೆ ಎಂಬ ಕಾರಣಕ್ಕೆ ಹೆಚ್ಚು ಬೆಲೆ ಕೊಟ್ಟು ಖರೀದಿಸಿರಬಹುದು ಎಂದು ಅವರು ಸಮಜಾಯಿಷಿ ನೀಡಿದರು.
'ರಾಜಕೀಯ ಲಾಭಕ್ಕೆ ನನ್ನ ಹೆಸರು ಬಳಸಿಕೊಳ್ಳಬೇಡಿ' - ಮುರುಗೇಶ್ ನಿರಾಣಿ

ಕೋವಿಡ್-19 ಟಾಸ್ಕ್ ಪೋರ್ಸ್ ಕಮಿಟಿಯಲ್ಲಿ ನಾನೂ ಇದ್ದೇನೆ. ಡಿಸಿಎಂ, ಗೃಹ ಸಚಿವರು ಇದ್ದಾರೆ. ವೈದ್ಯರಾದ ಡಾ.ಮಂಜುನಾಥ್ ಇದ್ದಾರೆ. ಹಾಗಾಗಿ ಖರೀದಿಯಲ್ಲಿ ಯಾವುದೇ ಅಕ್ರಮ ನಡೆದಿಲ್ಲ. ವಿಪಕ್ಷದವರು ವಾಸ್ತವತೆ ತಿಳಿದುಕೊಂಡು ಆರೋಪ ಮಾಡಬೇಕು ಎಂದು ಸುಧಾಕರ್‌ ಹೇಳಿದರು.