ಮಂಚನಬಲೆಯಲ್ಲಿ 150ಕ್ಕೂ ಹೆಚ್ಚು ನಾಗರ ಕಲ್ಲು ಪತ್ತೆ

ಚಿಕ್ಕಬಳ್ಳಾಪುರ: ತಾಲೂಕಿನ ಮಂಚನಬಲೆ ಗ್ರಾಮದಲ್ಲಿ ಪುರಾತನ ಕಾಲದ ಸುಮಾರು 150ಕ್ಕೂ ಅಧಿಕ ನಾಗರ ಕಲ್ಲುಗಳು ಪತ್ತೆಯಾಗಿವೆ.

ಗ್ರಾಮದ ಪಕ್ಕದಲ್ಲಿರುವ ಕೆರೆಕಟ್ಟೆಯ ಬಳಿ ಹಲವು ವರ್ಷಗಳ ಹಿಂದೆ ಸುಮಾರು 4 ನಾಗರ ಕಲ್ಲುಗಳನ್ನು ಪ್ರತಿಷ್ಠಾಪನೆ ಮಾಡಲಾಗಿತ್ತು. ಗ್ರಾಮದ ಮಹಿಳೆಯರು ಸೇರಿದಂತೆ ಹಲವು ಭಕ್ತರು ನಾಗರಪಂಚಮಿ, ಗೌರಿ-ಗಣೇಶ ಹಬ್ಬ ಸೇರಿದಂತೆ ಇತರ ಹಬ್ಬ ಹರಿದಿನಗಳಲ್ಲಿ ಅಲ್ಲಿನ ನಾಗರ ಕಲ್ಲುಗಳಿಗೆ ಪೂಜೆ ಮಾಡಿ, ತಮ್ಮ ಇಷ್ಟಾರ್ಥ ನೇರವೇರಿಸಿಕೊಳ್ಳುತ್ತಿದ್ದರು.

ಪತ್ತೆಯಾಗಿದ್ದು ಹೇಗೆ?: ಗ್ರಾಮದಲ್ಲಿರುವ ನಾಗರಕಲ್ಲು ಸುತ್ತ ಕಾಂಪೌಂಡ್‌ ನಿರ್ಮಾಣ ಮಾಡಲು ಮಂಗಳವಾರ ಕೆಲಸಗಾರರು ಪ್ರತಿಷ್ಠಾಪಿತ ನಾಗರ ಕಲ್ಲು ಸುತ್ತ ಅಗೆಯುತ್ತಿರುವಾಗ ಒಂದೊಂದೇ ನಾಗರಕಲ್ಲುಗಳು ಪತ್ತೆಯಾಗಿದ್ದು, 150ಕ್ಕೂ ಹೆಚ್ಚು ಕಲ್ಲುಗಳು ಒಂದೇ ಸ್ಥಳದಲ್ಲಿ ಸಿಕ್ಕಿವೆ. ಇದರಲ್ಲಿ 2 ವೀರಗಲ್ಲುಗಳು ಹಾಗೂ 2 ಪಾದಗಳು ಇರುವ ಕಲ್ಲುಗಳು ಪತ್ತೆಯಾಗಿರುವುದು ವಿಶೇಷ.

ಗ್ರಾಮಕ್ಕೆ ಹೊಂದಿಕೊಂಡಂತಿರುವ ಕೆರೆ ಪಕ್ಕದಲ್ಲಿ ಪ್ರತಿಷ್ಠಾಪಿಸಿದ್ದ ನಾಗರ ಕಲ್ಲುಗಳಿಗೆ ಪೂಜೆ ಮಾಡಿದರೆ ಮಕ್ಕಳಾಗುತ್ತವೆ ಎಂಬ ನಂಬಿಕೆ ರಾಜ ಮಹಾರಾಜರ ಕಾಲದಲ್ಲಿ ಇತ್ತು. ಅದಕ್ಕಾಗಿ ಮಕ್ಕಳಾದವರು ಈ ಸ್ಥಳಕ್ಕೆ ಬಂದು ನಾಗರ ಕಲ್ಲುಗಳನ್ನು ಪ್ರತಿಷ್ಠಾಪಿಸಿದ್ದರು ಎಂದು ನಮ್ಮ ಹಿರಿಯರು ಹೇಳುತ್ತಿದ್ದರು. ನಾವೆಂದೂ ಇಲ್ಲಿ ಇಷ್ಟೊಂದು ನಾಗರ ಕಲ್ಲುಗಳನ್ನು ಯಾವತ್ತೂ ನೋಡಿರಲಿಲ್ಲ. ಇದು ವಿಸ್ಮಯಕಾರಿ ಪ್ರಸಂಗವಾಗಿದ್ದು, ಈ ಹಿಂದೆ ಈ ಸ್ಥಳ ಸಾಕಷ್ಟು ಮಹತ್ವ ಪಡೆದಿತ್ತು ಎಂದು ಹೆಚ್ಚಿನ ಪ್ರಮಾಣದಲ್ಲಿ ಪತ್ತೆಯಾಗಿರುವ ನಾಗರಕಲ್ಲುಗಳಿಂದ ತಿಳಿದುಬರುತ್ತದೆ ಎನ್ನುತ್ತಾರೆ ಗ್ರಾಮದ ಹಿರಿಯ ಮುಖಂಡ ಸದಾಶಿವರೆಡ್ಡಿ.

ಇನ್ನು ಅಪಾರ ಪ್ರಮಾಣದ ನಾಗರ ಕಲ್ಲುಗಳನ್ನು ಒಂದೇ ಕಡೆ ಇದ್ದದ್ದನ್ನು ನೋಡಿದ ಗ್ರಾಮಸ್ಥರು, ದಿಗ್ಭ್ರಮೆ ವ್ಯಕ್ತಪಡಿಸಿದ್ದು, ನಾಗರಕಲ್ಲುಗಳನ್ನು ನೋಡಲು ಮುಗಿಬಿದ್ದಿದ್ದಾರೆ.

ಗ್ರಾಮದಲ್ಲಿ ಇಷ್ಟೊಂದು ನಾಗರಕಲ್ಲುಗಳು ಇವೆ ಎಂಬುದು ನಾವೆಂದು ಕಂಡಿಲ್ಲ. ಇದೊಂದು ವಿಸ್ಮಯಕಾರಿ ಘಟನೆಯಾಗಿದ್ದು, ಭೂಮಿಯಲ್ಲಿ ಇನ್ನೂ ಸಾಕಷ್ಟು ನಾಗರಕಲ್ಲುಗಳ ಇರಬಹುದು.
ಎಂ.ವಿ.ಸದಾಶಿವ | ಗ್ರಾಮಸ್ಥ