ಮೈತ್ರಿಯನ್ನು ಮತದಾರ ತಿರಸ್ಕರಿಸಿದ್ದಾರೆ: ಶಿವಶಂಕರರೆಡ್ಡಿ

ಗೌರಿಬಿದನೂರು: ಕಾಂಗ್ರೆಸ್‌ ಮತ್ತು ಜೆಡಿಎಸ್‌ ಮೈತ್ರಿಯನ್ನು ರಾಜ್ಯದ ಮತದಾರರು ತಿರಸ್ಕರಿಸಿದ್ದಾರೆ ಎಂದು ಈ ಚುನಾವಣೆ ತೀರ್ಪು ಸ್ಪಷ್ಟಪಡಿಸಿದ್ದು, ಜನಾದೇಶಕ್ಕೆ ತಲೆಬಾಗುತ್ತೇವೆ ಎಂದು ಕೃಷಿ ಸಚಿವ ಎನ್‌.ಎಚ್‌.ಶಿವಶಂಕರರೆಡ್ಡಿ ಹೇಳಿದರು.

ವಿಕ ದೊಂದಿಗೆ ಮಾತನಾಡಿದ ಅವರು, ಮೋದಿ ಅಲೆ ಈ ರೀತಿಯ ಫಲಿತಾಂಶ ಊಹಿಸಿರಲಿಲ್ಲ, ಮುಖ್ಯವಾಗಿ ಯುವ ಮತದಾರರು ಮೋದಿ ಕಡೆ ವಾಲಿದ್ದಾರೆ. ಒಟ್ಟಾರೆ ಕಾಂಗ್ರೆಸ್‌ ಪಕ್ಷ ಕ್ಕೆ ಈ ಚುನಾವಣೆ ದೊಡ್ಡ ಸೋಲಾಗಿದೆ ಎಂಬುದನ್ನು ಒಪ್ಪಿಕೊಳ್ಳುತ್ತೇನೆ. ಮೈತ್ರಿ ಸರಕಾರದ ಬಗ್ಗೆ ಪಕ್ಷ ದ ವರಿಷ್ಠರು ಚರ್ಚಿಸಲಿದ್ದಾರೆ, ಒಟ್ಟಾರೆ ಸೋಲಿನ ಬಗ್ಗೆ ಎರಡೂ ಪಕ್ಷ ದವರೂ ಆತ್ಮಾವಲೋಕನ ಮಾಡಿಕೊಳ್ಳಬೇಕಿದೆ ಎಂದರು.

ಜೆಡಿಎಸ್‌ ಮೈತ್ರಿ ಧರ್ಮ ಪಾಲಿಸಿಲ್ಲ: ತಾಲೂಕಿನಲ್ಲಿ ಜೆಡಿಎಸ್‌ ಮೈತ್ರಿ ಧರ್ಮವನ್ನು ಕಿಂಚಿತ್ತೂ ಪಾಲಿಸಿಲ್ಲ ಎಂಬುದಕ್ಕೆ ಈ ಚುನಾವಣೆ ಫಲಿತಾಂಶದಿಂದ ತಿಳಿಯುತ್ತದೆ. ಈ ಹಿಂದೆ ಲೋಕಸಭೆ ಚುನಾವಣೆಯಲ್ಲಿ ಮುಖ್ಯಮಂತ್ರಿ ಹೆಚ್‌.ಡಿ.ಕುಮಾರಸ್ವಾಮಿ ಸ್ಪರ್ಧಿಸಿದ್ದ ಸಂದರ್ಭದಲ್ಲಿ ಅವರಿಗೆ ಬಿದ್ದ ಮತಗಳು ಎಲ್ಲಿಗೆ ಹೋದವು, ಕಾಂಗ್ರೆಸ್‌ ಮತಗಳು ಎಲ್ಲವೂ ಮೊಯ್ಲಿಗೆ ಬಿದ್ದಿವೆ. ಆದರೆ ಮೈತ್ರಿ ಧರ್ಮ ಪಾಲನೆಯಾಗಿದ್ದಲ್ಲಿ ಮೊಯ್ಲಿ ಗೆಲವು ನಿಶ್ಚಿತವಾಗುತ್ತಿತ್ತು ಎಂದು ಪ್ರಶ್ನೆಯೊಂದಕ್ಕೆ ಸಚಿವರು ಉತ್ತರಿಸಿದರು.