ನೇಣು ಬಿಗಿದುಕೊಂಡು ಯುವತಿ ಆತ್ಮಹತ್ಯೆ

ಗುಡಿಬಂಡೆ: ಹೊಟ್ಟೆ ನೋವು ತಾಳಲಾರದೆ ಯುವತಿಯೊಬ್ಬಳು ನೇಣಿ ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಪಟ್ಟಣದ 4ನೇ ವಾರ್ಡ್‌ನಲ್ಲಿ ಭಾನುವಾರ ಬೆಳಗ್ಗೆ ನಡೆದಿದೆ.

ಪಟ್ಟಣದ ಕೋಟೆ ವಿವೇಕಾನಂದ ನಗರದ ಆರ್‌.ಕೆ.ಎನ್‌. ಚಿತ್ರಮಂದಿರದ ಬಳಿಯ ಮಧುಗಿರಿ ಶ್ರೀರಾಮಪ್ಪ ಅವರ ಮೊಮ್ಮಗಳು ಹರ್ಷಿತಾ (17) ಆತ್ಮಹತ್ಯೆ ಮಾಡಿಕೊಂಡ ಯುವತಿ.

ಪಟ್ಟಣದ ಸರಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಪ್ರಥಮ ಪಿಯುಸಿ ವ್ಯಾಸಂಗ ಮಾಡುತ್ತಿದ್ದಳು. ಮುಟ್ಟಾಗುವ ಸಮಯದಲ್ಲಿ ತೀವ್ರ ಹೊಟ್ಟೆ ನೋವಿನಂದ ಬಳಲುತ್ತಿದ್ದ ಆಕೆ, ಮನೆಯಲ್ಲಿ ಯಾರೂ ಇಲ್ಲದ ಸಮಯದಲ್ಲಿ ತನ್ನ ವೇಲ್‌ನಿಂದ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎಂದು ಮೃತರ ತಾಯಿ ಸಂಜೀವಮ್ಮ ದೂರು ನೀಡಿದ್ದಾರೆ.

ಮೃತಳ ತಂದೆ ಶಿವಲಿಂಗಪ್ಪ, ತಾಯಿ ಸಂಜೀವಮ್ಮ ಮಧುಗಿರಿಯಲ್ಲಿ ವಾಸವಿದ್ದು, ಹರ್ಷಿತ ಗುಡಿಬಂಡೆ ಪಟ್ಟಣದ ತಾತನ ಮನೆಯಲ್ಲಿ ಓದುತ್ತಿದ್ದಳು. ಈ ಬಗ್ಗೆ ಗುಡಿಬಂಡೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.