ಉದ್ಯೋಗ ಕೊಡುವುದಾಗಿ ನಂಬಿಸಿ 1.09 ಲಕ್ಷ ರೂ. ಪಂಗನಾಮ!

ಚಿಕ್ಕಬಳ್ಳಾಪುರ: ಉದ್ಯೋಗ ಕೊಡುವುದಾಗಿ ನಂಬಿಸಿ ನಿರುದ್ಯೋಗಿ ಯುವಕನಿಂದ ಬರೋಬ್ಬರಿ 1.09 ಲಕ್ಷ ರೂ. ಲಪಟಾಯಿಸಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.

ನಗರದ ನಿರುದ್ಯೋಗಿ ಯುವಕನೊಬ್ಬ ಶೈನ್‌ ಡಾಟ್‌ ಕಾಮ್‌ ವೆಬ್‌ಸೈಟ್‌ನಲ್ಲಿ ಉದ್ಯೋಗಕ್ಕಾಗಿ ಒಂದು ವರ್ಷದ ಹಿಂದೆ ಹೆಸರನ್ನು ನೋಂದಾಯಿಸಿದ್ದ. ಮೇ 21ರಂದು ಆತನ ಮೊಬೈಲ್‌ಗೆ ಅಪರಿಚಿತ ಸಂಖ್ಯೆ(9720812536)ಯಿಂದ ಕರೆ ಮಾಡಿ, ಎಎಐನಿಂದ ಮಾತಾಡುತ್ತಿದ್ದೇವೆ ಎಂದು ಪರಿಚಯ ಮಾಡಿಕೊಂಡು, ನಮ್ಮ ಕಂಪನಿಯಲ್ಲಿ ಅಕೌಂಟೆಟ್‌ ಹುದ್ದೆ ಖಾಲಿ ಇರುತ್ತದೆ. ಅದನ್ನು ಭರ್ತಿ ಮಾಡಲು ನೀವು ಆನ್‌ಲೈನ್‌ ಪರೀಕ್ಷೆಯನ್ನು ತೆಗದುಕೊಳ್ಳಬೇಕು ಅಂತ ಹೇಳಿ, 1750 ರೂ. ಶುಲ್ಕವಾಗಿ ಕಟ್ಟಬೇಕು ಎಂದು ತಿಳಿಸಿದ್ದಾರೆ. ಅದರಂತೆ ಯುವಕ ಮೇ 24ರಂದು ಎಚ್‌ಡಿಎಫ್‌ಸಿ ಬ್ಯಾಂಕ್‌ ಖಾತೆ ನಂಬರ್‌ 50100248964776ಗೆ ಹಣ ಜಮೆ ಮಾಡಿದ್ದಾನೆ. ನಂತರ ಲೈನ್‌ ಪರೀಕ್ಷೆ ನೀಡಿದ್ದು, ಅದರಲ್ಲಿ ನೀನು ಆಯ್ಕೆ ಆಗಿದ್ದೀಯ. ಟ್ರೈನಿಂಗ್‌ ಫೀಸ್‌ 8900 ರೂ.ಗಳನ್ನು ಖಾತೆಗೆ ಜಮೆ ಮಾಡುವಂತೆ ತಿಳಿಸಿದ್ದಾರೆ.

ಅದರಂತೆ ಮತ್ತೆ ಹಣವನ್ನು ಖಾತೆಗೆ ಜಮೆ ಮಾಡಿದ್ದಾನೆ. ಅದೇ ರೀತಿ ಡ್ರೆಸ್‌, ಐಡಿ ಕಾರ್ಡ್‌, ಇಂಟರ್‌ನ್ಯಾಷನಲ್‌ ಟ್ರೈನಿಂಗ್‌ ಫೀಸ್‌, ರೀಫಂಡ್‌ ಅಮೌಂಟ್‌ ಅಂತ ನಾನಾ ಪ್ರಕ್ರಿಯೆಗಳಿಗೆ ಹಂತ ಹಂತವಾಗಿ 13,900 ರೂ. 15,900 ರೂ., 15,900 ರೂ., 10,900 ರೂ., 15,900 ರೂ., 25,900 ರೂ. ಸೇರಿ ಒಟ್ಟು 1,09,050 ರೂ.ಗಳನ್ನು 8 ಕಂತುಗಳಲ್ಲಿ ಜಮೆ ಮಾಡಿಸಿಕೊಂಡಿದ್ದಾರೆ.

ಪುನಃ 25,000 ರೂ. ಕಳುಹಿಸಿದರೆ ನಿಮಗೆ ಉದ್ಯೋಗದ ಆದೇಶ ಬರುತ್ತದೆ. ಹಾಗೂ ನೀವು ಕಟ್ಟಿರುವ ಹಣವು ನಿಮಗೆ ರೀಫಂಡ್‌ ಆಗುತ್ತದೆ ಎಂದಿದ್ದಾರೆ. ಆಗ ತನಗೆ ಮೋಸ ಮಾಡಿರುವುದಾಗಿ ತಿಳಿದುಬಂದಿದೆ ಎಂದು ದೂರಿನಲ್ಲಿ ತಿಳಿಸಿದ್ದಾನೆ.

ಈ ಸಂಬಂಧ ಜಿಲ್ಲಾ ಅಪರಾಧ ವಿಭಾಗದ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.