ಸ್ವಯಂಪ್ರೇರಿತಾಗಿ ಬಂದ್‌ಗೆ ಸಹಕರಿಸಿ

ತರೀಕೆರೆ: ಪೆಟ್ರೋಲ್‌, ಡೀಸೆಲ್‌ ಹಾಗೂ ಅಗತ್ಯ ವಸ್ತುಗಳ ಬೆಲೆ ನಿರಂತರವಾಗಿ ಏರುತ್ತಿದ್ದು, ಕೇಂದ್ರ ಸರಕಾರದ ಧೋರಣೆ ಖಂಡಿಸಿ ಕಾಂಗ್ರೆಸ್‌, ಜೆಡಿಎಸ್‌ ಮತ್ತು ಮಿತ್ರ ಪಕ್ಷ ಗಳು ಹಾಗೂ ವಿವಿಧ ಸಂಘಟನೆಗಳ ವತಿಯಿಂದ ಸೆ.10ರಂದು ಭಾರತ್‌ ಬಂದ್‌ಗೆ ಕರೆ ನೀಡಲಾಗಿದೆ ಎಂದು ಮಾಜಿ ಶಾಸಕ ಎಸ್‌.ಎಂ.ನಾಗರಾಜ್‌ ಹೇಳಿದರು.

ತಮ್ಮ ನಿವಾಸದಲ್ಲಿ ಶನಿವಾರ ಏರ್ಪಡಿಸಿದ್ದ ಪತ್ರಿಕಾಗೋಷ್ಟಿಯಲ್ಲಿ ಅವರು ಮಾತನಾಡಿ, ಭಾರತ್‌ ಬಂದ್‌ಗೆ ತರೀಕೆರೆ ಹಾಗೂ ಅಜ್ಜಂಪುರ ತಾಲೂಕಿನ ಜನತೆ ಸಹಕರಿಸಬೇಕು ಎಂದು ಮನವಿ ಮಾಡಿದರು.

ಮಾಜಿ ಶಾಸಕ ಟಿ.ಎಚ್‌. ಶಿವಶಂಕರಪ್ಪ ಮಾತನಾಡಿ, ಭಾರತ್‌ ಬಂದ್‌ ಕರೆಗೆ ಹೋಟೆಲ್‌ ಮತ್ತು ಅಂಗಡಿ - ಮುಂಗಟ್ಟುಗಳನ್ನು ಮಾಲೀಕರು ಸ್ವಯಂಪ್ರೇರಿತವಾಗಿ ಮುಚ್ಚುವ ಮೂಲಕ ಪ್ರತಿಭಟನೆಗೆ ಬೆಂಬಲ ಸೂಚಿಸಬೇಕು. ಅಂದು ಬೆಳಗ್ಗೆ 10 ಗಂಟೆಗೆ ಪಟ್ಟಣದ ಸಾಲುಮರದಮ್ಮ ದೇವಸ್ಥಾನದಿಂದ ಮಿನಿ ವಿಧಾನಸೌಧದವರೆಗೆ ಮೆರವಣಿಗೆ ನಡೆಸಿ ಉಪ ವಿಭಾಗಾಧಿಕಾರಿಗಳಿಗೆ ಮನವಿ ಸಲ್ಲಿಸಲಾಗುವುದು ಎಂದರು.

ಬ್ಲಾಕ್‌ ಕಾಂಗ್ರೆಸ್‌ ಅಧ್ಯಕ್ಷ ರಾಮಚಂದ್ರಪ್ಪ, ಪುರಸಭೆ ಉಪಾಧ್ಯಕ್ಷ ಅಶೋಕ್‌ಕುಮಾರ್‌, ಪುರಸಭಾ ಸದಸ್ಯರಾದ ಟಿ.ಎಸ್‌.ಧರ್ಮರಾಜ್‌, ಡಿ.ವಿ.ಪದ್ಮರಾಜ್‌, ಟಿ.ಎಸ್‌. ರಮೇಶ್‌, ಮುಖಂಡರಾದ ಟಿ.ಜೆ.ಗೋಪಿಕುಮಾರ್‌, ಬಿ.ರಾಜಪ್ಪ, ಮೈಕೋ ಚಂದ್ರಣ್ಣ, ಧವನ್‌ರಾಜ್‌, ಮಂಜುನಾಥ್‌, ಸಮೀವುಲ್ಲಾ, ಇನ್ನಿತರರು ಹಾಜರಿದ್ದರು.