ಕುಡಿವ ನೀರಿಗೆ ಹೊಸ ಪೈಪ್‌ಲೈನ್‌ ನಿರ್ಮಿಸಲು ಒತ್ತಾಯ

ಲಿಂಗದಹಳ್ಳಿ: ಹೋಬಳಿ ವ್ಯಾಪ್ತಿಯ ಉಡೇವಾ ಗ್ರಾಮಕ್ಕೆ ಕುಡಿಯುವ ನೀರು ಒದಗಿಸುವ ಕಲ್ಲತ್ತಿಗಿರಿಯಿಂದ ನೂತನ ಪೈಪ್‌ ಲೈನ್‌ ಅಳವಡಿಸುವಂತೆ ಉಡೇವಾ ಗ್ರಾಮಸ್ಥರು ವಿಧಾನಪರಿಷತ್‌ ಸದಸ್ಯ ಎಸ್‌.ಎಲ್‌ ಧರ್ಮೇಗೌಡ ಅವರಿಗೆ ಮನವಿ ಮಾಡಿದರು.

ಖಾಸಗಿ ಕಾರ್ಯನಿಮಿತ್ತ ಧರ್ಮೇಗೌಡ ರವರು ಉಡೇವಾ ಗ್ರಾಮಕ್ಕೆ ಆಗಮಿಸಿದ್ದ ಸಂದರ್ಭದಲ್ಲಿ ಉಡೇವಾ ಗ್ರಾಮದ ಮುಖಂಡರುಗಳು ಅವರನ್ನು ಭೇಟಿ ಮಾಡಿ ತಮ್ಮ ಬೇಡಿಕೆ ಹೇಳಿಕೊಂಡರು.

ಕಳೆದ 10 ವರ್ಷಗಳ ಹಿಂದೆ ಕಲ್ಲತ್ತಿಗಿರಿಯಿಂದ ಉಡೇವಾ ಗ್ರಾಮಕ್ಕೆ ಕುಡಿಯುವ ನೀರಿಗಾಗಿ ಪೈಪ್‌ಲೈನ್‌ ಅಳವಡಿಸಿದ್ದು, ಈಗ ಹಳೆಯದಾಗಿದೆ. ಪೈಪ್‌ನೊಳಗೆ ಮಣ್ಣು ತುಂಬಿಕೊಂಡಿದ್ದು ಪಾಚಿ ಕಟ್ಟಿರುವುದರಿಂದ ನೀರು ಸಮರ್ಪಕವಾಗಿ ಪೂರೈಕೆಯಾಗುತ್ತಿಲ್ಲ. ಉಡೇವಾ ಗ್ರಾಮ ದೊಡ್ಡದಾಗಿದ್ದು, ಜನ ಹಾಗೂ ಜಾನುವಾರುಗಳ ಸಂಖ್ಯೆ ಹೆಚ್ಚಾಗಿದೆ. ನೀರು ಸಮಪರ್ಕವಾಗಿ ಪೂರೈಕೆಯಾಗಬೇಕಿರುವುದರಿಂದ ನೂತನ ಪೈಪ್‌ಲೈನ್‌ ಆಳವಡಿಸಿ ಸೂಕ್ತ ಕುಡಿಯುವ ನೀರು ಪೂರೈಕೆಗೆ ಕ್ರಮಕೈಗೊಳ್ಳಬೇಕೆಂದು ಒತ್ತಾಯಿಸಿದರು.

ಗ್ರಾಮಸ್ಥರ ಮನವಿಗೆ ಸ್ಪಂದಿಸಿದ ಎಸ್‌.ಎಲ್‌. ಧರ್ಮೇಗೌಡ, ಗ್ರಾಮದ ಜನತೆಗೆ ಸಮಪರ್ಕ ಕುಡಿಯುವ ನೀರಿನ ಪೂರೈಕೆಗೆ ನೂತನ ಪೈಪ್‌ಲೈನ್‌ ಆಳವಡಿಸಲು ಸಂಬಂಧಪಟ್ಟ ಇಲಾಖೆಯ ಅಧಿಕಾರಿಗಳು ಹಾಗೂ ಜಿಲ್ಲಾಧಿಕಾರಿಯೊಂದಿಗೆ ಚರ್ಚಿಸಲಾಗುವುದು ಎಂದು ತಿಳಿಸಿದರು.

ಗ್ರಾಮ ಪಂಚಾಯಿತಿ ಸದಸ್ಯ ಯು.ಗಿರೀಶ್‌, ಮಾಜಿ ಸದಸ್ಯ ವಿ.ಸತೀಶ್‌, ಜೆಡಿಎಸ್‌ ಕ್ಷೇತ್ರ ಸಮಿತಿ ಪ್ರಧಾನ ಕಾರ್ಯದರ್ಶಿ ಅರಿಶಿನಗುಪ್ಪೆ ಸಿದ್ದೇಶ್‌, ಗ್ರಾಮಸ್ಥರಾದ ಯುದಿಷ್ಟರಪ್ಪ, ಬಸವರಾಜ್‌, ಓಂಕಾರಪ್ಪ, ಜಿ.ಮೂರ್ತಪ್ಪ, ಶಾಂತಕುಮಾರ್‌, ಉಮೇಶ್‌ ಹಾಗೂ ಇತರರು ಹಾಜರಿದ್ದರು.