ಅಪಘಾತ ಆರೋಪಿಗೆ ಸಜೆ ದಂಡ

ಚಿಕ್ಕಮಗಳೂರು: ರಸ್ತೆ ಅಪಘಾತದಲ್ಲಿ ಬೈಕ್‌ ಸವಾರನ ಸಾವಿಗೆ ಕಾರಣವಾದ ಲಾರಿ ಚಾಲಕನಿಗೆ ನಗರದ ಒಂದನೇ ಹೆಚ್ಚುವರಿ ಹಿರಿಯ ಸಿವಿಲ್‌ ನ್ಯಾಯಾಲಯ ಸಜೆ ಹಾಗೂ ದಂಡ ವಿಧಿಸಿದೆ.

ಪುರುಷೋತ್ತಮ ಎಂಬಾತ 2016ರಲ್ಲಿ ಜು.14ರಂದು ತನ್ನ ಸ್ನೇಹಿತ ದಿನೇಶ್‌ ಜಮೀನಿಗೆ ಹೋಗಿ ಬರುವಾಗ ಹಿರೇಮಗಳೂರು ಸಮೀಪ ಬೈಕಿಗೆ ಲಾರಿ ಡಿಕ್ಕಿಹೊಡೆದು ಪುರುಷೋತ್ತಮ ಸ್ಥಳದಲ್ಲಿಯೇ ಮೃತಪಟ್ಟಿದ್ದರು. ದಿನೇಶ ತೀವ್ರ ಗಾಯಗೊಂಡಿದ್ದರು. ಪ್ರಕರಣ ಗ್ರಾಮಾಂತರ ಪೊಲೀಸ್‌ ಠಾಣೆಯಲ್ಲಿ ದಾಖಲಾಗಿತ್ತು. ಪ್ರಕರಣದ ವಿಚಾರಣೆ ನಡೆದು ಆರೋಪ ಸಾಬೀತಾದ ಹಿನ್ನೆಲೆಯಲ್ಲಿ ಒಂದನೇ ಹೆಚ್ಚುವರಿ ಹಿರಿಯ ಸಿವಿಲ್‌ ನ್ಯಾಯಾಧೀಶರಾದ ಎನ್‌.ಎಂ.ರಮೇಶ್‌ ಆರೋಪಿ ಲಾರಿ ಚಾಲಕ ಮಂಜುನಾಥನಿಗೆ 2 ವರ್ಷ ಸಜೆ ಹಾಗೂ 2 ಸಾವಿರ ರೂ. ದಂಡ ವಿಧಿಸಿ ತೀರ್ಪು ನೀಡಿದ್ದಾರೆ. ಸರಕಾರದ ಪರವಾಗಿ ಸಹಾಯಕ ಅಭಿಯೋಜಕ ರಾಘವೇಂದ್ರ ರಾಯ್ಕರ್‌ ವಾದ ಮಂಡಿಸಿದ್ದರು.