ಆಂಬ್ಯುಲೆನ್ಸ್ ಹತ್ತಿ ಪ್ರವಾಸಕ್ಕೆ ಬಂದರು..!

ಕೊಟ್ಟಿಗೆಹಾರ (ಚಿಕ್ಕಮಗಳೂರು): ಗಾಯಾಳು, ರೋಗಿಗಳನ್ನು ಕರೆದುಕೊಂಡು ಹೋಗಬೇಕಾದ ಆಂಬ್ಯುಲೆನ್ಸ್ ಅನ್ನು ಪ್ರವಾಸಕ್ಕೆ ಬಳಸಿಕೊಂಡಿರುವ ಪ್ರಕರಣ ಬೆಳಕಿಗೆ ಬಂದಿದ್ದು, ಮಂಗಳವಾರ ಸಾರ್ವಜನಿಕ ವಲಯದಲ್ಲಿ ಚರ್ಚೆಗೂ ಗ್ರಾಸವಾಯಿತು.

ಬೆಂಗಳೂರಿನ ಶ್ರೀಸಾಯಿ ಹೆಸರಿನ ಆಂಬ್ಯುಲೆನ್ಸ್ ಕೆಲ ಕಾಲ ಪಟ್ಟಣದಲ್ಲಿ ನಿಂತಿತ್ತು. ಈ ವಾಹನದಲ್ಲಿ ಯಾವುದೇ ರೋಗಿಗಳು ಇರಲಿಲ್ಲ. ಮಹಿಳೆಯರು, ಮಕ್ಕಳು ಇದ್ದಿದ್ದು ಕಂಡು ಬಂದಿತು. ಈ ಬಗ್ಗೆ ವಿಚಾರಿಸಿದಾಗ ಹೊರನಾಡು, ಧರ್ಮಸ್ಥಳ ಪ್ರವಾಸ ಮುಗಿಸಿಕೊಂಡು ಬೆಂಗಳೂರಿಗೆ ತೆರಳುವುದಾಗಿ ಅದರಲ್ಲಿದ್ದವರು ತಿಳಿಸಿದರು. ಆರೋಗ್ಯ ಸೇವೆ ನೀಡಬೇಕಾದ ಆಂಬ್ಯುಲೆನ್ಸ್ ಪ್ರವಾಸಕ್ಕೆ ಬಳಕೆ ಆಗುತ್ತಿರುವುದರ ಬಗ್ಗೆ ಸಂಬಂಧಪಟ್ಟವರು ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳುವ ಅಗತ್ಯವಿದೆ.

-----

ವಾಹನವನ್ನು ಆಂಬ್ಯುಲೆನ್ಸ್ ಆಗಿ ಬಳಕೆ ಮಾಡುವ ಪೂರ್ವದಲ್ಲೇ ಹಲವು ನಿಬಂಧನೆಗಳನ್ನು ವಿಧಿಸಲಾಗಿರುತ್ತದೆ. ಅದರಂತೆ ರೋಗಿಗಳ ಉಪಯೋಗಕ್ಕೆ ಬಿಟ್ಟು ಅನ್ಯ ಉದ್ದೇಶಕ್ಕೆ ಬಳಸಿದರೆ ಅಂತಹ ವಾಹನವನ್ನು ದಸ್ತಗಿರಿ ಮಾಡಿ ಕ್ರಿಮಿನಲ್ ಪ್ರಕರಣ ದಾಖಲಿಸಲಾಗುತ್ತದೆ.

- ಶಿವರಾಜ್ ಪಾಟೀಲ್, ಆರ್‌ಟಿಒ, ಚಿಕ್ಕಮಗಳೂರು

ಬೆಂಗಳೂರಿನ ವಿಲ್ಸನ್‌ಗಾರ್ಡನ್‌ನಲ್ಲಿರುವ ಆಚಾರ್ಯ ನರ್ಸಿಂಗ್ ಹೋಂಗೆ ಸೇವೆ ಒದಗಿಸುತ್ತಿದ್ದೇವೆ. ಈ ಆಂಬ್ಯುಲೆನ್ಸ್ ಸೋಮವಾರ ರಾತ್ರಿ ಮಣಿಪಾಲ್‌ಗೆ ರೋಗಿಯನ್ನು ಕರೆದುಕೊಂಡು ಹೋಗಿತ್ತು. ಅಲ್ಲಿಂದ ಹಿಂದಿರುಗುವಾಗ ಚಾಲಕ ಪ್ರವಾಸಿಗರನ್ನು ಕರೆದುಕೊಂಡು ಬಂದಿರಬಹುದು. ಈ ಬಗ್ಗೆ ತಮಗೆ ಮಾಹಿತಿ ಇಲ್ಲ.

-ರಾಜು, ಮಾಲೀಕ, ಶ್ರೀಸಾಯಿ ಆಂಬ್ಯುಲೆನ್, ಬೆಂಗಳೂರು