ಪರವಾನಗಿ ಇಲ್ಲದೆ ಆಟೊ ಚಾಲನೆ, 7ಸಾವಿರ ರೂ. ದಂಡ

ತರೀಕೆರೆ: ವಾಹನ ಪರವಾನಗಿ ಮತ್ತು ವಾಹನ ಚಾಲನಾ ಪರವಾನಗಿ ಇಲ್ಲದೆ ಆಟೊ ಚಲಾಯಿಸುತ್ತಿದ್ದ ವ್ಯಕ್ತಿಗೆ ಪಟ್ಟಣದ ನ್ಯಾಯಾಲಯ ಭಾರಿ ಮೊತ್ತದ ದಂಡ ವಿಧಿಸಿದೆ.

ಪಟ್ಟಣದ ವಾಸಿ ಗಂಗಾಧರ್‌ ಎಂಬುವರು ವಾಹನ ಪರವಾನಗಿ ಮತ್ತು ವಾಹನ ಚಾಲನಾ ಪರವಾನಗಿ ಇಲ್ಲದೆ ಆಟೊ ಚಲಾಯಿಸುತ್ತಿದ್ದರು. ಆ ಸಂದರ್ಭದಲ್ಲಿಪಟ್ಟಣದ ಪೋಲಿಸರು ತಪಾಸಣೆ ಮಾಡಿದ್ದು, ಪರವಾನಗಿಗಳು ಇಲ್ಲದಿರುವುದು ಕಂಡುಬಂದಿತ್ತು. ಪ್ರಕರಣ ದಾಖಲಿಸಿ ದೋಷಾರೋಪಣ ಪಟ್ಟಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದ್ದರು.

ಆರೋಪಿ ಬುಧವಾರ ನ್ಯಾಯಾಲಯಕ್ಕೆ ಹಾಜರಾಗಿ ತಪೊ್ಪಪ್ಪಿಕೊಂಡಿದ್ದು, ಹಿರಿಯ ಸಿವಿಲ್‌ ನ್ಯಾಯಾಧೀಶ ನಂಜೇಗೌಡ ಅವರು ಆರೋಪಿಗೆ 7ಸಾವಿರ ರೂ. ದಂಡ ಕಟ್ಟಬೇಕು. ದಂಡದ ಮೊತ್ತ ಪಾವತಿಸಲು ತಪ್ಪಿದ್ದಲ್ಲಿ5 ತಿಂಗಳ ಸಾದಾ ಜೈಲು ಶಿಕ್ಷೆ ವಿಧಿಸಿ ಆದೇಶಿಸಿದ್ದಾರೆ.

ಎಚ್ಚರಿಕೆ ಗಂಟೆ:

ನ್ಯಾಯಾಲಯದ ಆದೇಶವು ಸರಿಯಾದ ದಾಖಲೆಗಳು ಇಲ್ಲದೆ ವಾಹನಗಳನ್ನು ಚಲಾಯಿಸುತ್ತಿರುವ ಮಾಲೀಕರು, ವಾಹನ ಚಾಲಕರಿಗೆ ಎಚ್ಚರಿಕೆಯ ಗಂಟೆಯಾಗಿದೆ. ಸರಿಯಾದ ದಾಖಲೆಗಳೊಂದಿಗೆ ವಾಹನ ಚಲಾಯಿಸುವುದು ಅಗತ್ಯವಾಗಿದೆ. ಬಹುತೇಕ ಅಪ್ರಾಪ್ತರು ಯಾವುದೇ ಪರವಾನಗಿ, ದಾಖಲೆಗಳು ಇಲ್ಲದೆ ಮಾನವ ಪ್ರಾಣಹಾನಿ ಉಂಟಾಗುವಂತೆ ಟ್ರ್ಯಾಕ್ಟರ್‌ ಚಲಾಯಿಸುತ್ತಿದ್ದು ಇಂತಹವರುಗಳ ಮೇಲೆ ಪೊಲೀಸರು ನಿಗಾ ಇಡಬೇಕು ಎಂಬುದು ಸಾರ್ವಜನಿಕರ ಅಭಿಪ್ರಾಯವಾಗಿದೆ.