ಸ್ಫೋಟಕ ಸಂಗ್ರಹಿಸಿದ ಆರೋಪಿಗೆ ಜಾಮೀನು

ಚಿಕ್ಕಮಗಳೂರು : ಕಳಸದ ಮನೆಯೊಂದರಲ್ಲಿ ಸ್ಫೋಟಕ ಸಂಗ್ರಹಿಸಿದ ಆರೋಪಿಯನ್ನು ಬುಧವಾರ ಮೂಡಿಗೆರೆ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದು ಜಾಮೀನು ನೀಡಲಾಗಿದೆ.

ಕಳಸದ ಮನೆಯೊಂದರ ಟೆರೇಸ್‌ನಲ್ಲಿ ಮಂಗಳವಾರ 14 ಜಿಲೆಟಿನ್‌ ಕಡ್ಡಿಗಳು, ಡಿಟೊನೇಟರ್‌, ಪ್ಯೂಸ್‌ ಪತ್ತೆಯಾಗಿದ್ದರಿಂದ ಕಳಸ ಪೊಲೀಸರು ಆರೋಪಿ ಅಜೀಜ್‌ ಅವರನ್ನು ಬಂಧಿಸಿ ವಿಚಾರಣೆ ನಡೆಸಿ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದರು.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಹರೀಶ್‌ ಪಾಂಡೆ, ಪ್ರಕರಣದ ತನಿಖೆ ಮುಂದುವರಿದಿದೆ. ಆರೋಪಿ ಬಗ್ಗೆ ಸಂಪೂರ್ಣ ಮಾಹಿತಿ ಕಲೆ ಹಾಕಲಾಗುತ್ತಿದೆ ಎಂದರು.

ಬಂಧಿತ ಆರೋಪಿ ಯಾವುದೇ ಸಂಘಟನೆಗೆ ಸೇರಿದವನಲ್ಲ ಎಂಬುದು ವಿಚಾರಣೆಯಿಂದ ತಿಳಿದುಬಂದಿದೆ. ಸ್ಫೋಟಕಗಳು ಎಲ್ಲಿಂದ ಹೇಗೆ ಬಂದವು ಮತ್ತು ಎಲ್ಲಿಗೆ ಕೊಡಲಾಗುತ್ತಿತ್ತು ಎಂಬ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ತಿಳಿಸಿದರು.