ಕಾಡೆಮ್ಮೆ ಹಿಂಡು ಪ್ರತ್ಯಕ್ಷ , ಗ್ರಾಮಸ್ಥರ ಆತಂಕ

ಕೊಟ್ಟಿಗೆಹಾರ: ಮಾಲಿಂಗನಾಡು ಸಮೀಪ ಸೋಮವಾರ ಹಾಡುಹಗಲೇ ಕಾಡೆಮ್ಮೆಗಳು ಪ್ರತ್ಯಕ್ಷ ವಾಗಿದ್ದು ಗ್ರಾಮಸ್ಥರು ಭಯಭೀತರಾಗಿದ್ದಾರೆ.

ಕೂವೆ ಹಿರೆಬೈಲ್‌ ಮಾರ್ಗದಲ್ಲಿ ಬಿಳಗಲಿ ಸಮೀಪ ಹತ್ತು ಕಾಡೆಮ್ಮೆಗಳ ಹಿಂಡು ವಾಹನಗಳಿಗೆ ಅಡ್ಡ ಬಂದಿದ್ದು, ಮುಂದೆ ಹೋದರೆ ತಮ್ಮ ಮೇಲೆಯೇ ಮುಗಿಬೀಳುತ್ತವೆ ಎಂದು ಹೆದರಿದ ವಾಹನ ಸವಾರರು ಬೈಕ್‌ ತಿರುಗಿಸಿಕೊಂಡು ವಾಪಸ್‌ ಬಂದಿದ್ದಾರೆ.

ಹಿಂಡಿನಲ್ಲಿ ಏಳು ದೊಡ್ಡ ಕಾಡೆಮ್ಮೆಗಳು, ಮೂರ್ನಾಲ್ಕು ಮರಿಗಳು ಕಂಡುಬಂದಿವೆ. ಮಳೆಗಾಲದ ಕಾರಣ ಅರಣ್ಯ ಪ್ರದೇಶದಲ್ಲಿ ಮಂಜು ಮುಸುಕಿದ ವಾತಾವರಣವಿದ್ದು ಕಾಡೆಮ್ಮೆಗಳು ರಸ್ತೆಗೆ ಅಡ್ಡಲಾಗಿ ಬಂದರೂ ಸರಿಯಾಗಿ ಕಾಣದೇ ದುರಂತ ಎದುರಾಗುವ ಸಂಭವವಿದೆ. ಅರಣ್ಯ ಇಲಾಖೆ ಕಾಡೆಮ್ಮೆಗಳನ್ನು ಕಾಡಿಗಟ್ಟಬೇಕೆಂದು ಮಾಲಿಂಗನಾಡು ಗ್ರಾಮಸ್ಥ ಸುದೀಪ್‌ ಮತ್ತಿತರರು ಆಗ್ರಹಿಸಿದ್ದಾರೆ.