​ಮೊಬೈಲ್‌ ಚಾರ್ಜರ್‌ ಪಿನ್‌ ಬಾಯಿಗಿಟ್ಟ ಮಗು ಸಾವು

ಚಿಕ್ಕಮಗಳೂರು: ಮೊಬೈಲ್‌ ಚಾರ್ಜ್‌ಗಿಟ್ಟ ಬಳಿಕ ಸ್ವಿಚ್‌ ಆಫ್‌ ಮಾಡದೆ ಅಲ್ಲೇ ಬಿಟ್ಟಿದ್ದ ಚಾರ್ಜರನ್ನು ಕೈಗೆತ್ತಿಕೊಂಡು ಪಿನ್‌ ಬಾಯೊಳಗಿಟ್ಟುಕೊಂಡ ನಾಲ್ಕು ವರ್ಷದ ಮಗು ವಿದ್ಯುತ್‌ ಆಘಾತಕ್ಕೆ ಒಳಗಾಗಿ ಮೃತಪಟ್ಟ ದಾರುಣ ಘಟನೆ ಚಿಕ್ಕಮಗಳೂರಿನಲ್ಲಿ ನಡೆದಿದೆ.

ಅಲ್ದೂರ್‌ ನಿವಾಸಿಗಳಾದ ಇಂದ್ರೇಶ್‌ ಮತ್ತು ಲೀಲಾ ದಂಪತಿಯ ಪುತ್ರ ಅಭಿಮಾನ್ ಮೃತಪಟ್ಟ ಮಗು. ಪವರ್‌ ಪಾಯಿಂಟ್‌ಗೆ ಪ್ಲಗ್‌ ಆಗಿದ್ದ ಚಾರ್ಜರ್‌ನ ವೈರ್‌ ನೇತಾಡುತ್ತಿತ್ತು. ಸ್ವಿಚ್‌ ಆಫ್‌ ಕೂಡ ಆಗಿರಲಿಲ್ಲ. ಇದನ್ನು ಕಂಡು ಮಗು ಎತ್ತಿಕೊಂಡು ಪಿನ್‌ ಬಾಯಿಗಿಟ್ಟಿದೆ.

ಈ ಘಟನೆ ಸಂಭವಿಸುವ ಕೆಲವೇ ಕ್ಷಣಗಳ ಮೊದಲು ತಾಯಿ ಮಗುವನ್ನು ಸ್ನಾನ ಮಾಡಿಸಿದ್ದರು. ಮಗುವನ್ನು ನಿಲ್ಲಿಸಿದ್ದ ಕುರ್ಚಿ ಚಾರ್ಜರ್‌ ಇದ್ದ ಪವರ್‌ ಪಾಯಿಂಟ್‌ಗೆ ಹತ್ತಿರವಿತ್ತು. ವಿದ್ಯುತ್‌ ಶಾಕ್‌ ಹೊಡೆದ ತಕ್ಷಣ ಮಗು ಕೆಳಗೆ ಬಿದ್ದಿದೆ.

ಮಗುವಿಗೆ ಯಾವುದೇ ಗಾಯವಾಗಿಲ್ಲ. ಶಾಕ್‌ಗೆ ಹೃದಯ ಇಲ್ಲವೇ ಯಕೃತ್‌ ಹಾನಿಗೊಂಡು ಮಗು ಮೃತಪಟ್ಟಿರಬಹುದು ಎಂದು ವೈದ್ಯರು ತಿಳಿಸಿದ್ದಾರೆ. ಈ ಘಟನೆಯಿಂದಲಾದರೂ ಜನರು ಎಚ್ಚೆತ್ತುಕೊಳ್ಳಬೇಕು. ಮಕ್ಕಳು, ವೃದ್ಧರು ಇರುವ ಮನೆಗಳಲ್ಲಿ ಮೊಬೈಲ್‌ ಬಳಸುವವರು ಬಹಳಷ್ಟು ಎಚ್ಚರ ವಹಿಸಬೇಕು ಎಂದು ಪೊಲೀಸರು ಹೇಳಿದ್ದಾರೆ.