ಚಿಕ್ಕಮಗಳೂರು ಯಶವಂತಪುರ ರೈಲು ಸ್ಥಗಿತ

ಕಡೂರು : ಬಹು ನಿರೀಕ್ಷಿತ ಚಿಕ್ಕಮಗಳೂರು-ಕಡೂರು ರೈಲು ಮಾರ್ಗ, ಇಲಾಖೆಯ ತೀವ್ರ ಅಸಡ್ಡೆಗೆ ತುತ್ತಾಗಿದ್ದು, ಇರುವ ಎರಡು ರೈಲಿನಲ್ಲಿ ಒಂದನ್ನು ಇಲಾಖೆ ಕಿತ್ತುಕೊಂಡಿರುವ ಪ್ರಕರಣ ಬೆಳಕಿಗೆ ಬಂದಿದೆ.

ಚಿಕ್ಕಮಗಳೂರಿನಿಂದ ಯಶವಂತಪುರಕ್ಕೆ ನಿತ್ಯ ಸಂಚರಿಸುತ್ತಿದ್ದ ಗಾಡಿ ಸಂಖ್ಯೆ 56277/278ನ್ನು ಇಲಾಖೆ ಕಳೆದ ಒಂದು ವಾರದಿಂದ ಏಕಾಏಕಿ ನಿಲ್ಲಿಸಿದ್ದು, ಚಿಕ್ಕಮಗಳೂರಿನಿಂದ ಬೆಂಗಳೂರಿಗೆ ಹಾಗೂ ಮಾರ್ಗದ ಮಧ್ಯೆ ಬರುವ ಇತರ ಊರುಗಳಿಗೆ ತೆರಳಲು ಅವಲಂಬಿಸಿದ್ದ ಪ್ರಯಾಣಿಕರು ಈಗ ಪರದಾಡುವಂತಾಗಿದೆ.

ರೈಲ್ವೆ ಇಲಾಖೆ ಮೂಲದ ಪ್ರಕಾರ ನ.21ರಿಂದ ಈ ರೈಲನ್ನು ಚಿಕ್ಕಮಗಳೂರಿನಿಂದ ಕಡೂರುವರೆಗೆ ಓಡಿಸಲಾಗುತ್ತಿದೆ. ನಂತರ ಖಾಲಿ ರೈಲನ್ನು ಬೀರೂರುವರೆಗೆ ಕೊಂಡೊಯ್ದು ಅಲ್ಲಿ ಸಂಜೆಯವರೆಗೆ ಟ್ರಾಕ್‌ನಲ್ಲಿ ನಿಲ್ಲಿಸಲಾಗುತ್ತಿದೆ. ರಾತ್ರಿ ಪುನಃ 8 ಗಂಟೆಗೆ ಚಿಕ್ಕಮಗಳೂರು ಕಡೆಗೆ ಈ ರೈಲನ್ನು ಓಡಿಸುತ್ತಿರುವ ಮಾಹಿತಿ ಲಭ್ಯವಾಗಿದೆ.

ಇದರಿಂದ ಚಿಕ್ಕಮಗಳೂರಿನಿಂದ ಬೆಂಗಳೂರಿಗೆ ನಿತ್ಯ ಪ್ರಯಾಣಿಸುತ್ತಿದ್ದ ಜನರಿಗೆ ತೊಂದರೆಯಾಗಿದೆ. ಅಲ್ಲದೆ ಇಲಾಖೆಯ ಆದಾಯಕ್ಕೂ ಕುತ್ತಾಗಿದೆ. ಜತೆಗೆ ದಿವಂಗತ ಪ್ರಧಾನಿ ಇಂದಿರಾಗಾಂಧಿ ಅವರಿಂದ ಅಡಿಗಲ್ಲು ಹಾಕಿಸಿಕೊಂಡು 33 ವರ್ಷದ ಕಾಮಗಾರಿ ಬಳಿಕ ಆರಂಭವಾದ ಚಿಕ್ಕಮಗಳೂರು-ಕಡೂರು ಮಾರ್ಗದಲ್ಲಿ ಇದ್ದ ಎರಡು ರೈಲಿನಲ್ಲಿ ಒಂದು ನಿಂತಿರುವುದು ದುದೈರ್‍ವದ ಸಂಗತಿಯಾಗಿದೆ.

ಸದ್ಯ ಚಿಕ್ಕಮಗಳೂರು-ಶಿವಮೊಗ್ಗ ಗಾಡಿ ಸಂಖ್ಯೆ 56271/272 ರೈಲು ಮಾತ್ರ ಈ ಮಾರ್ಗದಲ್ಲಿ ಸಂಚರಿಸುತ್ತಿದೆ. ಮುಂದಿನ ದಿನದಲ್ಲಿ ಈ ರೈಲು ಗಾಡಿಯೂ ನಿಂತರೆ ಏನು ಎಂಬ ಆತಂಕ ಜನರಲ್ಲಿ ಮನೆ ಮಾಡಿದೆ. ಅರಸಿಕೆರೆಯಿಂದ ತುಮಕೂರು ವರೆಗೆ ಜೋಡಿ ಮಾರ್ಗ ನಿರ್ಮಾಣವಾಗುತ್ತಿರುವುದರಿಂದ ಈ ಚಿಕ್ಕಮಗಳೂರು-ಯಶವಂತಪುರ ರೈಲಿಗೆ ಮಾರ್ಗ ಸಮಸ್ಯೆಯಾಗಿದೆ. ಅದಕ್ಕಾಗಿ ಕಡೂರುವರೆಗೆ ಓಡಿಸಲಾಗುತ್ತಿದೆ ಎನ್ನುವುದು ರೈಲು ನಿಲ್ದಾಣ ಅಧಿಕಾರಿಗಳ ಹೇಳಿಕೆ.

ಒಟ್ಟಿನಲ್ಲಿ ಕಡೂರು-ಚಿಕ್ಕಮಗಳೂರು ಮಾರ್ಗ ಒಂದು ರೀತಿಯ ಶಾಪಗ್ರಸ್ತ ಮಾರ್ಗವಾಗಿದ್ದು, ಆಟಕ್ಕುಂಟು ಲೆಕ್ಕಕ್ಕಿಲ್ಲ ಎನ್ನುವಂತಾಗಿದೆ. ಈ ಮಾರ್ಗದಲ್ಲಿ ಇನ್ನಷ್ಟು ಹೊಸ ರೈಲುಗಳು ಬರುವ ನಿರೀಕ್ಷೆಯಲ್ಲಿದ್ದ ಪ್ರಯಾಣಿಕರಿಗೆ ತೀವ್ರ ನಿರಾಸೆ ತಂದಿದೆ. ಪ್ರಯಾಣಿಕರು ಮತ್ತು ವಿವಿಧ ಸಂಘ ಸಂಸ್ಥೆಗಳ ಸದಸ್ಯರು ಬೀದಿಗಿಳಿದು ಪ್ರತಿಭಟಿಸುವ ದಿನಗಳು ದೂರವಿಲ್ಲ ಎಂಬುದು ಹಲವು ಪ್ರಯಾಣಿರ ಅಭಿಪ್ರಾಯವಾಗಿದೆ.