ಶಬರಿಮಲೆಯಲ್ಲಿ ಹಿಂದಿನ ಆಚರಣೆ ಮುಂದುವರಿಸಿ

ಮೂಡಿಗೆರೆ : ಶಬರಿಮಲೆಯ ಅಯ್ಯಪ್ಪಸ್ವಾಮಿ ದೇವಸ್ಥಾನಕ್ಕೆ ಮಹಿಳೆಯರ ಪ್ರವೇಶದ ಬಗ್ಗೆ ಸುಗ್ರೀವಾಜ್ಞೆ ಮೂಲಕ ಹಿಂದಿನ ಆಚರಣೆ ಮುಂದುವರಿಸಬೇಕೆಂದು ಒತ್ತಾಯಿಸಿ ಶ್ರೀ ಅಯ್ಯಪ್ಪಸ್ವಾಮಿ ಸೇವಾ ಸಮಿತಿ, ಅಯ್ಯಪ್ಪ ಭಕ್ತರು ಹಾಗೂ ವಿವಿಧ ಸಂಘ ಸಂಸ್ಥೆ ಮುಖಂಡರು ಶುಕ್ರವಾರ ಪಟ್ಟಣದಲ್ಲಿ ಪ್ರತಿಭಟನೆ ನಡೆಸಿ, ಬಳಿಕ ತಹಸೀಲ್ದಾರ್‌ ಮೂಲಕ ರಾಷ್ಟ್ರಪತಿಗಳಿಗೆ ಮನವಿ ಸಲ್ಲಿಸಿದರು.

ಈ ಸಂದರ್ಭ ವಕೀಲರಾದ ವಿಶಾಲ ಮಾತನಾಡಿ, ಶಬರಿಮಲೆ ಅಯ್ಯಪ್ಪಸ್ವಾಮಿ ದೇವಸ್ಥಾನವು ಶತಮಾನಗಳಿಂದಲೂ ಆಸ್ತಿಕರ ಶ್ರದ್ಧೆಯ ಕೇಂದ್ರವಾಗಿದೆ. ನೈಮಿಕ ನಿಷ್ಠ ಬ್ರಹ್ಮಚಾರಿ ಅಯ್ಯಪ್ಪಸ್ವಾಮಿ ದರ್ಶನಕ್ಕೆ 10 ರಿಂದ 50ನೇ ವರ್ಷದ ಯಾವ ಹಿಂದೂ ಮಹಿಳೆಯರು ಸಹ ಪ್ರವೇಶ ಬಯಸಿಲ್ಲ. ಈ ಸಂಪ್ರದಾಯವು ಶತಮಾನಗಳಿಂದಲೂ ಆಚರಿಸಿಕೊಂಡು ಬರಲಾಗುತ್ತಿದೆ. ಹಿಂದೂ ಮಹಿಳೆಯರು ಸಹ ಇದನ್ನು ಗೌರವಿಸಿಕೊಂಡು ಬಂದಿದ್ದು, ಇದೂವರೆಗೂ ಯಾವ ಹಿಂದೂ ಮಹಿಳೆಯೂ ಈ ಸಂಪ್ರದಾಯ ಮುರಿಯಲು ಯತ್ನಿಸಿಲ್ಲ. ಈ ಹಿನ್ನೆಲೆಯಲ್ಲಿ ಸುಪ್ರೀಂ ಕೋರ್ಟ್‌ ನೀಡಿರುವ ಆದೇಶ ಪುನರ್‌ ಪರಿಶೀಲಿಸಲು ಮನವಿ ಮಾಡಬೇಕೆಂದರು.

ಆಶಾ ಮೋಹನ್‌ ಮಾತನಾಡಿ, ಸಹಸ್ರಾರು ವರ್ಷಗಳಿಂದ ಆಚರಿಸಿಕೊಂಡು ಬಂದಿರುವ ಧಾರ್ಮಿಕ ಚಟುವಟಿಕೆಗಳು, ಆಚರಣೆಗಳು ಮತ್ತು ಸಂಪ್ರದಾಯದ ರಕ್ಷ ಣೆ ಮಾಡಬೇಕಾದ ಅನಿವಾರ್ಯತೆಯಿದೆ ಎಂದರು.

ಅಯ್ಯಪ್ಪ ಸ್ವಾಮಿ ಸೇವಾ ಸಮಿತಿ ಅಧ್ಯಕ್ಷ ಮಂಚೇಗೌಡ, ಮುಖಂಡರಾದ ಸುಧೀರ್‌, ಬಾಲು, ವಿಶ್ವನಾಥ್‌ ರೈ, ಉಮೇಶ್‌, ಪುಟ್ಟರಾಜು, ಗುರು ಸ್ವಾಮಿಗಳಾದ ರಮೇಶ್‌, ಲೋಕೇಶ್‌, ಮುನಿ ಸೇರಿದಂತೆ ಅಯ್ಯಪ್ಪ ಮಾಲಾಧಾರಿಗಳು, ವಿವಿಧ ಸಂಘಟನೆ ಮುಖಂಡರು ಉಪಸ್ಥಿತರಿದ್ದರು.