ಸಿ.ಟಿ.ರವಿ ಕುಡಿಯಲ್ಲ.. ಡ್ರೈವಿಂಗ್‌ ಮಾಡಲ್ಲ

ಚಿಕ್ಕಮಗಳೂರು : ಶಾಸಕ ಸಿ.ಟಿ.ರವಿ ಕಾಫಿಯನ್ನೇ ಕುಡಿಯುವುದಿಲ್ಲ.. ಇನ್ನು ಡ್ರಿಂಕ್ಸ್‌ ಹೇಗೆ ಮಾಡ್ತಾರೆ? ಅವ್ರು ಡ್ರೈವಿಂಗ್‌ ಮಾಡೋದು ಬಿಟ್ಟು 15 ವರ್ಷಗಳೇ ಆಗಿವೆ ಎಂದು ಸಿ.ಟಿ.ರವಿ ಪತ್ನಿ ಪಲ್ಲವಿ ಹೇಳಿದ್ದಾರೆ.

ಸುದ್ದಿಗಾರರೊಂದಿಗೆ ಮಂಗಳವಾರ ಮಾತನಾಡಿ, ಅಪಘಾತದಿಂದ ದುರ್ಮರಣ ಹೊಂದಿದವರ ಕುಟುಂಬದವರಿಗೆ ಸಾಂತ್ವನ ಹೇಳಲು ಬಯಸುತ್ತೇನೆ. ಶಾಸಕ ಸಿ.ಟಿ.ರವಿ ಮದ್ಯ ಸೇವಿಸಿದ್ದರು ಎಂಬುದು ಶುದ್ಧ ಸುಳ್ಳು. ಅವರು ಡ್ರೈವಿಂಗ್‌ ಕೂಡ ಮಾಡುತ್ತಿರಲಿಲ್ಲ ಎಂದು ಸಮರ್ಥಿಸಿಕೊಂಡರು.

ರವಿ ನೀರು ಕುಡಿಯುವುದು ಬಿಟ್ಟರೆ ಬೇರೆ ಏನನ್ನೂ ಕುಡಿದಿರುವುದು ನನಗೆ ಗೊತ್ತಿಲ್ಲ. ಸೋಮವಾರ ರಾತ್ರಿ 12ಕ್ಕೆ ಮನೆ ಬಿಟ್ಟಿದ್ರು. ಬೆಳಗ್ಗೆ 6ಕ್ಕೆ ಅವರಿಗೆ ಚೆನ್ನೈಗೆ ಹೋಗಲು ಫ್ಲೈಟ್‌ ಇತ್ತು. ಈ ಹಿನ್ನೆಲೆಯಲ್ಲಿ ಕಾರಿನಲ್ಲಿ ಹೊರಟಿದ್ದರು. ನನ್ನ ಪತಿ ಕಾರು ಡ್ರೈವ್‌ ಮಾಡೋದು ಬಿಟ್ಟು 15 ವರ್ಷ ಆಗಿದೆ. ಎದೆಗೆ ಸ್ವಲ್ಪ ಪೆಟ್ಟು ಬಿದ್ದಿದೆ ಎಂದು ಹೇಳಿದ್ದಾರೆ ಎಂದರು.

ಮೃತರ ಮನೆಗಳಿಗೆ ತೆರಳಿ ಸಾಂತ್ವನ ಹೇಳುತ್ತೇವೆ. ನಮ್ಮ ಕೈಯಲ್ಲಿ ಏನಾಗುತ್ತದೋ ಆ ರೀತಿಯ ಸಹಾಯ ಮಾಡುತ್ತೇವೆ. ಅಪಘಾತದಿಂದ ನನಗೂ ಶಾಕ್‌ ಆಯ್ತು. ಇಬ್ಬರು ಯುವಕರು ಜೀವ ಕಳೆದುಕೊಂಡಿರುವುದು ನಿಜವಾಗಿಯೂ ಬೇಸರವಾಗಿದೆ. ಈ ಅಪಘಾತ ಆಕಸ್ಮಿಕ. ಕಾರನ್ನು ಚಾಲಕ ಓಡಿಸುತ್ತಿದ್ದರು ಎಂದು ಹೇಳಿದರು.