ಸಾಲಬಾಧೆ: ರೈತ ಆತ್ಮಹತ್ಯೆ

ಚಿಕ್ಕಮಗಳೂರು : ತಾಲೂಕಿನ ಮಲ್ಲೇನಹಳ್ಳಿ ಸಮೀಪದ ನಿಂಗೇನಹಳ್ಳಿಯ ರೈತ ಮೋಹನ್‌ಗೌಡ (39) ಸಾಲ ಬಾಧೆಯಿಂದ ಬೇಸತ್ತು ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ತಾಯಿ ಕಾಳಮ್ಮ, ಹೆಂಡತಿ ನಾಗರತ್ನ, ಮಕ್ಕಳಾದ ವಿಜಯ (17), ಲೋಕೇಶ್‌ (13) ಹಾಗೂ ಚೇತನ್‌ (11) ಮಕ್ಕಳಿದ್ದಾರೆ. ಮೋಹನ್‌ಗೌಡ ವ್ಯವಸಾಯಕ್ಕಾಗಿ ಮಲ್ಲೇನಹಳ್ಳಿಯ ಕಾವೇರಿ ಗ್ರಾಮೀಣ ಬ್ಯಾಂಕ್‌ನಲ್ಲಿ ತಾಯಿ ಹೆಸರಲ್ಲಿ 50 ಸಾವಿರ, ಹೆಂಡತಿ ನಾಗರತ್ನ ಹೆಸರಿನಲ್ಲಿ ಸ್ವಸಹಾಯ ಸಂಘದಿಂದ 30 ಸಾವಿರ, ಸ್ನೇಹಿತರು, ಸಂಬಂಧಿಕರಿಂದ 3 ಲಕ್ಷ ಸಾಲ ಪಡೆದಿದ್ದರು.

ಜಮೀನಿನಲ್ಲಿ ಕಳೆದ 2 ವರ್ಷದಿಂದ ಸರಿಯಾಗಿ ಬೆಳೆ ಬಾರದೆ ಸಾಲ ತೀರಿಸಲು ಸಾಧ್ಯವಾಗಿರಲಿಲ್ಲ. ಇದರಿಂದ ತೀವ್ರ ಮನನೊಂದಿದ್ದ ಮೋಹನ್‌ಗೌಡ ಶುಕ್ರವಾರ ರಾತ್ರಿ ಜಮೀನಿಗೆ ಹೋಗುವುದಾಗಿ ಹೇಳಿ ಪುನಃ ಹಿಂಬಾಗಿಲಿನಿಂದ ಮನೆಗೆ ಬಂದು ತನ್ನ ಕೋಣೆಯಲ್ಲಿ ಪಕಾಸಿಗೆ ವೇಲ್‌ನಿಂದ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಗ್ರಾಮಾಂತರ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿದೆ.