ಪಾಕಿಸ್ತಾನ ಪರ ಘೋಷಣೆ: ದೂರು ದಾಖಲು

ಚಿಕ್ಕಮಗಳೂರು : ಪ್ರವಾಸ ಬಂದಿದ್ದ ಯುವಕನ ವಿರುದ್ಧ ಪುಲ್ವಾಮದಲ್ಲಿ ಹುತಾತ್ಮರಾದ ಸೈನಿಕರ ಫ್ಲೆಕ್ಸ್‌ ಬಳಿ ಪಾಕಿಸ್ತಾನ ಜಿಂದಾಬಾದ್‌, ಹಿಂದೂಸ್ತಾನ ಮುರ್ದಾಬಾದ್‌ ಎಂದು ಘೋಷಣೆ ಕೂಗಿದ ಆರೋಪದ ಮೇಲೆ ಗ್ರಾಮಾಂತರ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿದೆ.

ಚಿತ್ರದುರ್ಗದಿಂದ ಬಾಬಾಬುಡನ್‌ಗಿರಿಗೆ ಪ್ರವಾಸ ಬಂದಿದ್ದ ಯುವಕರಲ್ಲಿ ಯೂನಸ್‌ ಎಂಬಾತ ತಾಲೂಕಿನ ಕೈಮರ ಬಳಿ ಅಳವಡಿಸಿದ್ದ ಹುತಾತ್ಮ ಸೈನಿಕರ ಫ್ಲೆಕ್ಸ್‌ ಬಳಿ ಪಾಕಿಸ್ತಾನ ಪರ ಘೋಷಣೆ ಕೂಗಿದ್ದ. ಇದನ್ನು ಸ್ಥಳೀಯರು ಪ್ರಶ್ನಿಸಿದಾಗ ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದ ಎನ್ನಲಾಗಿದೆ.

ಚಿತ್ರದುರ್ಗದಿಂದ ಬೆಳಗಿನ ಜಾವ 4ಕ್ಕೆ ಕೈಮರ ಬಳಿಗೆ ಈ ಯುವಕರು ಬಂದಿದ್ದರು. ಆ ಸಮಯದಲ್ಲಿ ಗಿರಿಗೆ ಪ್ರವೇಶ ಇಲ್ಲದ ಕಾರಣ, ಕೈಮರ ಬಳಿ ನಿಂತಿದ್ದರು. ಆ ಸ್ಥಳದಲ್ಲಿ ಇತ್ತೀಚೆಗಷ್ಟೇ ಪುಲ್ವಾಮದಲ್ಲಿ ಹುತಾತ್ಮರಾದ ಸೈನಿಕರಿಗೆ ಫ್ಲೆಕ್ಸ್‌ ಅಳವಡಿಸಿ ಶ್ರದ್ಧಾಂಜಲಿ ಸಲ್ಲಿಸಿದ್ದು, ಆ ಫ್ಲೆಕ್ಸ್‌ ಬಳಿ ಯೂನಸ್‌ ಪಾಕಿಸ್ತಾನ ಪರ ಘೋಷಣೆ ಕೂಗಿದ್ದಾನೆ ಎಂದು ಸ್ಥಳೀಯರು ದೂರಿದ್ದಾರೆ. ಯೂನಸ್‌ ವಿರುದ್ಧ ದೇಶದ್ರೋಹದ ಘೋಷಣೆ ಕೂಗಿದ ಆರೋಪದಡಿ ಗ್ರಾಮಾಂತರ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. ಸ್ಥಳೀಯರಾದ ರಾಘವೇಲು ಈತನ ವಿರುದ್ಧ ದೂರು ದಾಖಲಿಸಿದ್ದಾರೆ.