ಮೊಬೈಲ್‌ ಹೆಚ್ಚು ಬಳಕೆಯಿಂದ ಖಿನ್ನತೆ

ಚಿಕ್ಕಮಗಳೂರು : ಧಾರವಾಹಿ ವೀಕ್ಷಣೆ, ಮೊಬೈಲ್‌ ಫೋನ್‌ ಹೆಚ್ಚು ಬಳಕೆಯಿಂದ ಕಣ್ಣಿನ ಸಮಸ್ಯೆ ಜತೆಗೆ ಮಾನಸಿಕ ಖಿನ್ನತೆ ಉಂಟಾಗುತ್ತದೆ ಎಂದು ಮಾನಸಿಕ ರೋಗ ತಜ್ಞ ಡಾ. ವಿನಯ್‌ ಕುಮಾರ್‌ ಹೇಳಿದರು.

ನಗರದ ಎಸ್‌ಟಿಜೆ ಕಾಲೇಜಿನಲ್ಲಿ ವಿಶ್ವ ಮಾದಕ ವಸ್ತುಗಳ ಸೇವನೆ ಮತ್ತು ಕಳ್ಳಸಾಗಾಣೆ ವಿರೋಧಿ ದಿನಾಚರಣೆ ಅಂಗವಾಗಿ ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಸೋಮವಾರ ಏರ್ಪಡಿಸಿದ್ದ ಪ್ರಬಂಧ ಸ್ಪರ್ಧೆ ವಿಜೇತರಿಗೆ ಬಹುಮಾನ ವಿತರಿಸಿ ಅವರು ಮಾತನಾಡಿದರು.

ಮೊಬೈಲ್‌ಗಳಿಂದ ತಮ್ಮಲ್ಲಿರುವ ಪ್ರತಿಭೆ ಹೊರಹಾಕಲಾಗುವುದಿಲ್ಲ. ಪ್ರತಿನಿತ್ಯ ಯೋಗ, ಧ್ಯಾನ, ಕ್ರೀಡಾ ಮತ್ತು ಸಾಂಸ್ಕೃತಿಕ ಚಟುವಟಿಕೆಗಳು ಉತ್ತಮ ಆರೋಗ್ಯ ಪಡೆಯಲು ಸಹಕಾರಿ. ಯಾವುದೇ ಸಮಸ್ಯೆ ತಲೆದೋರಿದರೂ ತಕ್ಷಣ ವೈದ್ಯರನ್ನು ಸಂಪರ್ಕಿಸಿ ಸೂಕ್ತ ಪರಿಹಾರ ಕಂಡುಕೊಳ್ಳಬೇಕು ಎಂದರು.

ಪ್ರಬಂಧ ಸ್ಪರ್ಧೆಯಲ್ಲಿ ಮಿಥುನ ಪ್ರಥಮ, ಅನಿತ ದ್ವಿತೀಯ,ಚಾಂದಿನಿ ತೃತೀಯ ಹಾಗೂ ್ನ ದೀಪಿಕ ಸಮಾಧಾನಕರ ಬಹುಮಾನ ಗಳಿಸಿದರು.

ಈ ಸಂದರ್ಭ ತರಳಬಾಳು ಜಗದ್ಗುರು ಮಹಿಳಾ ಪದವಿ ಕಾಲೇಜು ಪ್ರಾಂಶುಪಾಲರಾದ ಜೆ.ಕೆ.ಭಾರತಿ, ಆರೋಗ್ಯ ಇಲಾಖೆಯ ಹರ್ಷ, ಅರಸ್‌, ಕಾಲೇಜಿನ ರಾ.ಸೇ.ಯೋ.ಅಧಿಕಾರಿ ಎಂ.ಆರ್‌.ಚಂದ್ರಶೇಖರ್‌, ಉಪನ್ಯಾಸಕ ಪ್ರಕಾಶ್‌ ಹಾಜರಿದ್ದರು. ನಿಖಿತ ಪ್ರಾರ್ಥಿಸಿ, ಸೌಭಾಗ್ಯ ನಿರೂಪಿಸಿದರು. ತೀರ್ಥ ಸ್ವಾಗತಿಸಿ, ಚೈತ್ರ ವಂದಿಸಿದರು.