ಸರಕಾರಿ ನೌಕರರ ಸಂಘಕ್ಕೆ ದೇವೇಂದ್ರ ಅಧ್ಯಕ್ಷ

ಚಿಕ್ಕಮಗಳೂರು : ಕರ್ನಾಟಕ ರಾಜ್ಯ ಸರಕಾರಿ ನೌಕರರ ಸಂಘದ ಚಿಕ್ಕಮಗಳೂರು ಜಿಲ್ಲಾ ಘಟಕಕ್ಕೆ ಮುಂದಿನ 5 ವರ್ಷಗಳ ಅವಧಿಗೆ ಅಧ್ಯಕ್ಷರಾಗಿ ಸರಕಾರಿ ಪದವಿಪೂರ್ವ ಕಾಲೇಜು ಉಪನ್ಯಾಸಕ ದೇವೇಂದ್ರಆಯ್ಕೆಯಾಗಿದ್ದಾರೆ.

ನಗರದ ಕೆ.ಎಂ.ರಸ್ತೆಯ ಸರಕಾರಿ ನೌಕರರ ಭವನದಲ್ಲಿ ಗುರುವಾರ ಅಧ್ಯಕ್ಷ, ಖಜಾಂಚಿ ಹಾಗೂ ರಾಜ್ಯ ಪರಿಷತ್‌ ಸದಸ್ಯ ಸ್ಥಾನಕ್ಕೆ ನಡೆದ ಚುನಾವಣೆಯಲ್ಲಿ ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಿದ್ದ ದೇವೇಂದ್ರ 36 ಮತಗಳನ್ನು ಗಳಿಸಿದರೆ, ಪ್ರತಿಸ್ಪರ್ಧಿಗಳಾಗಿದ್ದ ಧನಪಾಲ ನಾಯ್ಡು ಹಾಗೂ ಬಿ.ಎನ್‌.ಸುಂದರೇಶ್‌ ತಲಾ 15 ಮತಗಳನ್ನು ಪಡೆದರು. ಖಜಾಂಚಿ ಸ್ಥಾನಕ್ಕೆ ಸ್ಪರ್ಧಿಸಿದ್ದ ಎಂ.ಪಿ.ಸಂತೋಷ್‌ಕುಮಾರ್‌ 40 ಮತಗಳನ್ನು ಗಳಿಸಿ ಆಯ್ಕೆಯಾದರೆ, ಪ್ರತಿಸ್ಪರ್ಧಿ ಬಿ.ಎಸ್‌.ಸುರೇಶ್‌ 25 ಮತ ಪಡೆದರು. ರಾಜ್ಯ ಪರಿಷತ್‌ ಸದಸ್ಯ ಸ್ಥಾನಕ್ಕೆ ಸ್ಪರ್ಧಿಸಿದ್ದ ಎಸ್‌.ಟಿ.ಪೂರ್ಣೇಶ್‌ 38 ಮತ ಗಳಿಸಿ ಆಯ್ಕೆಯಾದರೆ, ಪ್ರತಿಸ್ಪರ್ಧಿ ಟಿ.ಮಹೇಶ್‌ 27 ಮತ ಪಡೆದರು. ಒಟ್ಟು 67 ಮತಗಳಲ್ಲಿ 66 ಮತಗಳು ಚಲಾವಣೆಗೊಂಡಿದ್ದವು. ಒಬ್ಬರು ಮತದಾರರು ಮತದಾನ ನಡೆಯುವ ಸ್ಥಳಕ್ಕೆ ಆಗಮಿಸಿದ್ದರೂ ಯಾವುದೇ ಅಭ್ಯರ್ಥಿಗೆ ಮತ ಚಲಾಯಿಸದೆ ತಟಸ್ಥವಾಗುಳಿದರು.