ಪಶು ಆಸ್ಪತ್ರೆಗೆ ಹೋಗಲು ಸಿಮೆಂಟ್‌ ಪೈಪ್‌ಗಳ ಅಡ್ಡಿ

ಅಜ್ಜಂಪುರ , ಪಟ್ಟಣದ ಪಶುವೈದ್ಯ ಆಸ್ಪತ್ರೆಗೆ ತೆರಳಲು ಗೇಟಿನಲ್ಲಿ ಹಾಕಿರುವ ಸಿಮೆಂಟ್‌ ಪೈಪುಗಳಿಂದ ತೀವ್ರ ತೊಂದರೆಯಾಗಿದೆ.

ಕಳೆದ ಆರೇಳು ತಿಂಗಳ ಹಿಂದೆ ಗೇಟಿಗೆ ಆತುಕೊಂಡಂತೆ ಅಗಾಧ ಪ್ರಮಾಣದ ಸಿಮೆಂಟ್‌ ಪೈಪ್‌ಗಳನ್ನು ಹಾಕಲಾಗಿದೆ. ಇದರಿಂದ ಆಸ್ಪತ್ರೆ ಒಳಗೆ ಹೋಗಲು ಅನ್ಯ ಮಾರ್ಗವಿಲ್ಲದೆ ಸುತ್ತಿ ಬಳಸಿ ಹೋಗಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.

ಗಾಂಧಿ ವೃತ್ತದಲ್ಲಿ ನಿರ್ವಹಿಸಬೇಕಾದ ಕೆಲಸ ಅಪೂರ್ಣಗೊಂಡಿದೆ. ನಾಲ್ಕು ರಸ್ತೆಗಳು ಕೂಡುವ ಮಾರ್ಗದಲ್ಲಿ ಅತಿ ಹೆಚ್ಚು ಟ್ರಾಫಿಕ್‌ ಸಮಸ್ಯೆ ಉಂಟಾಗುತ್ತಿದೆ. ಎಲ್ಲೆಂದರಲ್ಲಿ ನಿಲ್ಲುವ ವಾಹನಗಳಿಂದ ಪಾದಚಾರಿಗಳಿಗೆ ಓಡಾಡಲು ತೊಂದರೆಯಾಗಿದೆ. ಪ್ರತಿದಿನ ಆಸ್ಪತ್ರೆ ಸಿಬ್ಬಂದಿ ಕಚೇರಿಗೆ ತೆರಳಲು ಸರ್ಕಸ್‌ ಮಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಪೈಪುಗಳನ್ನು ಹಾಕಿರುವ ಜಾಗದಲ್ಲಿ ಕಸಕಡ್ಡಿ ಜತೆಗೆ ಪ್ಲಾಸ್ಟಿಕ್‌ ತ್ಯಾಜ್ಯ ನಿರ್ಮಾಣಗೊಂಡಿದೆ. ಶುಚಿಯಾಗಿರುವ ಆಸ್ಪತ್ರೆ ಪ್ರದೇಶ ಕಸದ ಗುಡ್ಡೆಯಾಗಿದೆ. ಸಂಬಂಧಿಸಿದವರು ಸಿಮೆಂಟ್‌ ಪೈಪುಗಳನ್ನು ತೆರವುಗೊಳಿಸಿ ಆಸ್ಪತ್ರೆಗೆ ಹೋಗಿ ಬರಲು ಸುಗಮ ಸಂಚಾರಕ್ಕೆ ಅನುಕೂಲ ಮಾಡಿಕೊಡಲು ಸಾರ್ವಜನಿಕರು ಆಗ್ರಹಿಸಿದ್ದಾರೆ.