ಹಿಂದೂ ಸಮಾಜ ಒಗ್ಗೂಡಿಸಲು ಆರೆಸ್ಸೆಸ್‌ ಸ್ಥಾಪನೆ

ಕೊಪ್ಪ: ಹಿಂದೂ ಸಮಾಜ ಒಗ್ಗೂಡಿಸಿ ದೇಶಕ್ಕಾಗಿ ಬದುಕಲು ಆರೆಸ್ಸೆಸ್‌ ಸ್ಥಾಪನೆ ಮಾಡಲಾಯಿತು ಎಂದು ಆರೆಸ್ಸೆಸ್‌ನ ಮಧ್ಯಕ್ಷೇತ್ರದ ಕ್ಷೇತ್ರೀಯ ಕಾರ್ಯಕಾರಿಣಿ ಸದಸ್ಯ ಡಾ.ಪ್ರಭಾಕರ ಭಟ್‌ ಕಲ್ಲಡ್ಕ ಹೇಳಿದರು.

ಪಟ್ಟಣದಲ್ಲಿಆರೆಸ್ಸೆಸ್‌ ವತಿಯಿಂದ ಭಾನುವಾರ ಆಯೋಜಿಸಿದ್ದ ಸಂವಾದ ಕಾರ್ಯಕ್ರಮದಲ್ಲಿಅವರು ಮಾತನಾಡಿ, ಇಡಿ ಹಿಂದೂ ಸಮಾಜ ಒಂದಾಗಿ ದೇಶದ ಬಗ್ಗೆ ಯೋಚಿಸುವಂತಾಗಬೇಕು ಎಂಬ ಉದ್ದೇಶದಿಂದ ಅಂದು ಕೇಶವ ಬಲಿರಾಮ್‌ ಹೆಡೆಗೆವಾರ್‌ ರಾಷ್ಟ್ರೀಯ ಸ್ವಯಂ ಸೇವಕ ಸಂಘ ಸ್ಥಾಪಿಸಿದ್ದರು. ದಿನದಲ್ಲಿಕನಿಷ್ಟ 1 ಗಂಟೆ ದೇಶಕ್ಕಾಗಿ, ಭೂಮಿತಾಯಿಗಾಗಿ ಶ್ರಮಿಸಬೇಕೆಂದು ಅವರು ಹೇಳಿದ್ದರು. ಭಾರತ ದೇಶ ಭಿಕ್ಷೆ ಬೇಡುವ ದೇಶವಲ್ಲ. ಇಲ್ಲಿಹಿಂದೆ ಹತ್ತಾರು ವಿಶ್ವವಿದ್ಯಾಲಯವಿದ್ದವು. ಪ್ರತಿ ಗ್ರಾಮದಲ್ಲಿಗುರುಕುಲವಿತ್ತು. ಕೃಷಿ, ಖಗೋಳ ಶಾಸ್ತ್ರ, ವಿಜ್ಞಾನ, ಗ್ರಹಣ ಮತ್ತಿತರ ವೈಜ್ಞಾನಿಕ ವಿಷಯ ನಮಗೆ ಮೊದಲೆ ಗೊತ್ತಿತ್ತು. ಇಲ್ಲಿನ ಸಂಪತ್ತು ಲೂಟಿ ಮಾಡಲು ವಿದೇಶಿಯರು ಆಕ್ರಮಣ ಮಾಡಿದ್ದರು. ಪ್ರಸ್ತುತ ಪ್ರಧಾನಿ ಮೋದಿ, ಜಗತ್ತಿನ ಜನ ಭಾರತೆದೆಡೆಗೆ ನೋಡುವಂತೆ ಮಾಡಿದ್ದಾರೆ. ಸೇವಾ ಮನೋಭಾವನೆ ನಮ್ಮಲ್ಲಿಜಾಗೃತವಾಗುತ್ತಿದೆ. ಇದು ಒಬ್ಬ ವ್ಯಕ್ತಿಯ ಕಾರ್ಯವಲ್ಲ. ಇಡಿ ದೇಶ ಬದಲಾಗುತ್ತಿದೆ. ಸರ್ವರಿಗೆ ಒಳಿತು ಬಯಸುವ ಹಿಂದೂ ಸಮಾಜವು ಜಗತ್ತಿನ ಹಿತಕ್ಕಾಗಿ ಒಂದಾಗಬೇಕು. ಆರೆಸ್ಸೆಸ್‌ ಚಿಂತನೆಯೂ ಅದೆ ಆಗಿದೆ ಎಂದರು.

ವಕೀಲ ಎಂ.ನಾರಾಯಣಸ್ವಾಮಿ ಹಾಜರಿದ್ದರು. ನಂತರ ಸಂವಾದ ಕಾರ್ಯಕ್ರಮವನ್ನು ಆಯೋಜಿಸಲಾಯಿತು.