ಸಂತೆ ಮೈದಾನ, ರೋಗಗಳಿಗೆ ಆಹ್ವಾನ

ಅಜ್ಜಂಪುರ: ಪಟ್ಟಣದಲ್ಲಿ ಪ್ರತಿ ಸೋಮವಾರ ನಡೆಯುವ ದನಗಳ ಸಂತೆ ಮೈದಾನದಲ್ಲಿ ಸ್ವಚ್ಛತೆ ಸಮಸ್ಯೆ ಎದುರಾಗಿದ್ದು, ಪಟ್ಟಣದ ಜನತೆ ಸಾಂಕ್ರಾಮಿಕ ರೋಗಗಳು ಹರಡುವ ಭೀತಿಯಲ್ಲಿದ್ದಾರೆ.

ಪಟ್ಟಣದ ಹೃದಯ ಭಾಗದಲ್ಲಿ ಸುಮಾರು 8 ಎಕರೆ ಖಾಲಿ ಪ್ರದೇಶದಲ್ಲಿ ರೈತರು ದನಕರು, ಎತ್ತು, ಎಮ್ಮೆ, ಜಾನುವಾರುಗಳ ಕ್ರಯ, ವಿಕ್ರಯ ನಡೆಸುತ್ತಾರೆ. ಮುಖ್ಯ ರಸ್ತೆ ಹಾಗೂ ಆಜುಬಾಜಿನ ರಸ್ತೆಗಳಿಗೆ ಹೋಲಿಸಿದರೆ ಈ ಪ್ರದೇಶ ತಗ್ಗಿನಲ್ಲಿದೆ. ಮಳೆ ಬಂದ ಸಮಯದಲ್ಲಿ ನೀರು ಚರಂಡಿಗಳಲ್ಲಿ ಹರಿಯಲಾರದೆ ಎಲ್ಲೆಂದರಲ್ಲಿ ನಿಲ್ಲುತ್ತದೆ. ಈ ನೀರಿನಲ್ಲಿ ಸಗಣಿ, ಗಂಜಲ, ಹುಲ್ಲಿನ ಕಡ್ಡಿ, ಮೇವು ಬೆರೆತು ಕ್ರಮೇಣ ಕೊಳೆತು ದುರ್ಗಂಧಕ್ಕೀಡಾಗಿದ್ದು, ಸೊಳ್ಳೆಗಳ ಆವಾಸ ಸ್ಥಾನವಾಗಿ ಬದಲಾಗಿದೆ.

ಗ್ರಾ.ಪಂ.ಆಡಳಿತ ನಿರ್ಲಕ್ಷ ್ಯ: ಕೇವಲ ಅಭಿವೃದ್ಧಿಗಾಗಿ ಟೆಂಡರ್‌ ಕರೆದು ಕೈ ತೊಳೆದುಕೊಂಡರೆ ಅದನ್ನು ಸರಿಯಾಗಿ ನಿರ್ವಹಣೆ ಮಾಡಿಕೊಳ್ಳುವ ಜವಾಬ್ದಾರಿ ಯಾರದು ಎಂಬ ಪ್ರಶ್ನೆ ಸಾರ್ವಜನಿಕರನ್ನು ಕಾಡುತ್ತಿದೆ. ಇದಕ್ಕೆ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಗಳೇ ಉತ್ತರಿಸಬೇಕು. ಸ್ವಚ್ಛತೆ ಕಾಪಾಡಬೇಕಾದ ಗ್ರಾ.ಪಂ. ಈ ಬಗ್ಗೆ ಮೌನ ವಹಿಸಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ. ಇಂತಹ ಕಡೆ ಆರೋಗ್ಯ ಇಲಾಖೆಯವರು ಸ್ಥಳ ಪರಿಶೀಲನೆ ನಡೆಸಿ ಸೂಕ್ತ ಸ್ವಚ್ಛತೆಗೆ ಕ್ರಮ ವಹಿಸಲು ಕಾರ್ಯತತ್ಪರರಾಗಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.