ದೇವರ ಆರಾಧನೆಯಿಂದ ನೆಮ್ಮದಿ

ಶೃಂಗೇರಿ: ಭಗವಂತನನ್ನು ಭಕ್ತಿಯಿಂದ ಆರಾಧಿಸಿದರೆ ಸ್ವಾಮಿಯು ಒಲಿಯುತ್ತಾನೆ ಎಂದು ಶ್ರೀಮಠದ ಸದ್ವಿದ್ಯಾ ಸಂಜೀವಿನಿ ಸಂಸ್ಕೃತ ಪಾಠಶಾಲೆಯ ನಾಗರಾಜಭಟ್‌ ಹೇಳಿದರು.

ಅವರು ಮಂಗಳವಾರ ಶ್ರೀಮಠದ ಪ್ರವಚನ ಮಂದಿರದಲ್ಲಿ ಗೀತಾಜಯಂತಿ ಅಂಗವಾಗಿ ಏರ್ಪಡಿಸಿದ್ದ ಭಗವದ್ಗೀತ ಸಮರ್ಪಣಾ ಕಾರ್ಯಕ್ರಮದಲ್ಲಿ ಉಪನ್ಯಾಸ ನೀಡಿದರು.

ಭಗವಂತನ ಅನುಗ್ರಹ ಬಯಸಿ ಪೂಜಿಸಿದರೆ ನಮ್ಮ ಕಷ್ಟ ಕಾರ್ಪಣ್ಯಗಳು ದೂರಾಗಿ ಮನಸ್ಸಿಗೆ ಶಾಂತಿ ನೆಮ್ಮದಿ ದೊರಕುತ್ತದೆ. ಆದರೆ, ಸ್ವಾಮಿಯ ಪ್ರಾರ್ಥನೆ ಸ್ವಾರ್ಥರಹಿತವಾಗಿ, ಭಕ್ತಿಯಿಂದ ಇರಬೇಕು. ಭಗವದ್ಗೀತೆಯಲ್ಲಿ ಶ್ರೀಕೃಷ್ಣನು ಅನೇಕ ವಿಚಾರವನ್ನು ತಿಳಿಸಿದ್ದಾನೆ. ಇಚ್ಛೆಯನ್ನು ಪೂರೈಸಿಕೊಳ್ಳುವುದು,ದೇವರನ್ನು ಅಪಾರವಾಗಿ ಭಕ್ತಿಯಿಂದ ಪೂಜಿಸುವುದು ಸಮರ್ಪಣಾ ಭಾವದಿಂದ ಮಾಡಿದರೆ ನಮಗೆ ಭಗವಂತ ಒಲಿಯುತ್ತಾನೆ ಎಂದರು.

ಈ ಸಂದರ್ಭ ಭಗವದ್ಗೀತೆ ಕಂಠಪಾಠ ಮಾಡಿ ಜಗದ್ಗುರುಗಳ ಎದುರು ಅರ್ಪಿಸಿದ ಭಕ್ತಾದಿಗಳು, ಮತ್ತಿತರರು ಇದ್ದರು. ಗೀತಾ ಜಯಂತಿ ಅಂಗವಾಗಿ ಮಹಿಳೆಯರು ಭಗವದ್ಗೀತೆಯ 18 ಅಧ್ಯಾಯವನ್ನು ಪಠಿಸಿದರು.