ಸೂರ್ಯ ನಮಸ್ಕಾರದಿಂದ ಉತ್ತಮ ಆರೋಗ್ಯ

ಶೃಂಗೇರಿ : ಪ್ರತಿ ದಿನ ಮುಂಜಾನೆ ಸೂರ್ಯ ನಮಸ್ಕಾರ ಮಾಡುವುದರಿಂದ ಸದೃಢ ಆರೋಗ್ಯ ಸಾಧ್ಯ ಎಂದು ರಾಜೀವ್‌ ಗಾಂಧಿ ಸಂಸ್ಕೃತ ಕಾಲೇಜಿನ ಮೀಮಾಂಸ ವಿಭಾಗದ ಮುಖ್ಯಸ್ಥ ಸೂರ್ಯ ನಾರಾಯಣಭಟ್‌ ಹೇಳಿದರು.

ಶ್ರೀಮಠದ ಆವರಣದಲ್ಲಿ ಪತಂಜಲಿ ಯೋಗ ಶಿಕ್ಷ ಣ ಸಮಿತಿ ರಥಸಪ್ತಮಿ ಪ್ರಯುಕ್ತ ಮಂಗಳವಾರ ಏರ್ಪಡಿಸಿದ್ದ ಸಾಮೂಹಿಕ 108 ಸೂರ್ಯ ನಮಸ್ಕಾರ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಪ್ರಾತಃ ಕಾಲದಲ್ಲಿ ಸೂರ್ಯದೇವನು ಸೃಷ್ಟಿಕರ್ತ ಬ್ರಹ್ಮನಂತೆ ಕಾರ್ಯ ನಿರ್ವಹಿಸುತ್ತಾನೆ. ಮಧ್ಯಾಹ್ನ ಲಯಕರ್ತ ಮಹೇಶ್ವರನಂತೆ ಕಂಗೊಳಿಸಿ, ಸಂಧ್ಯಾ ಕಾಲದಲ್ಲಿ ಮಹಾ ವಿಷ್ಣುವಿನಂತೆ ಪ್ರಶಾಂತವಾಗಿ ಕಾರ್ಯ ನಿರ್ವಹಿಸುತ್ತಾನೆ. ಭಗವಾನ್‌ ಸೂರ್ಯದೇವ ಕಣ್ಣಿಗೆ ಗೋಚರಿಸುವ ದೇವನಾಗಿದ್ದು, ರಥ ಸಪ್ತಮಿ ದಿನದಂದು ಅವನ ಪ್ರಥಮ ಕಿರಣ ದೇಹದ ಮೇಲೆ ಬೀಳುವುದರಿಂದ ಉಲ್ಲಾಸ ಹಾಗೂ ಉತ್ತಮ ಆರೋಗ್ಯ ನೀಡುತ್ತದೆ ಎಂದರು.

ಪತಂಜಲಿ ಯೋಗ ಶಿಕ್ಷ ಣ ಸಂಸ್ಥೆಯ ಅಧ್ಯಕ್ಷ ಡಾ.ವೀರಪ್ಪಗೌಡ ಮಾತನಾಡಿ, ಯೋಗದಿಂದ ಉತ್ತಮ ಆರೋಗ್ಯ , ಮಾನಸಿಕ ನೆಮ್ಮದಿ ಪಡೆಯಬಹುದು. ಕಳೆದ ಒಂದು ದಶಕದಿಂದ ಪತಂಜಲಿ ಯೋಗ ಶಿಕ್ಷ ಣ ಸಂಸ್ಥೆಯು ರಥ ಸಪ್ತಮಿ ದಿನದಂದು ಸೂರ್ಯ ನಮಸ್ಕಾರ ಆಯೋಜಿಸುತ್ತಿದೆ ಎಂದರು.

ಸಂಸ್ಥೆಯ ಎ.ಡಿ.ಉಮೇಶ್‌, ನಾಗೇಶ್‌ ಕಾಮತ್‌ ಮತ್ತಿತರರು ಇದ್ದರು.