ಕ್ರೀಡಾಕೂಟಕ್ಕೆ ಅನುದಾನ ಹೆಚ್ಚಬೇಕು

ಸಖರಾಯಪಟ್ಟಣ : ಕ್ರೀಡಾಕೂಟಗಳಲ್ಲಿ ಭಾಗವಹಿಸುವುದರಿಂದ ದೇಹ ಮತ್ತು ಮನಸ್ಸು ಸದೃಢವಾಗುವುದು. ಹಾಗಾಗಿ ಸೋಲು, ಗೆಲುವಿಗಿಂತ ಭಾಗವಹಿಸುವಿಕೆ ಮುಖ್ಯವೆಂದು ಜಿಲ್ಲಾ ಪಂಚಾಯಿತಿ ಸದಸ್ಯೆ ಶಕುಂತಲಾ ಮಲ್ಲಪ್ಪ ಹೇಳಿದರು.

ಪಟ್ಟಣದಲ್ಲಿ ಸೋಮವಾರ ಕೆ.ಎಂ.ರಸ್ತೆಯ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಆಯೋಜಿಸಿದ್ದ 2018-19ನೇ ಸಾಲಿನ ಸಖರಾಯಪಟ್ಟಣ ವಲಯ ಮಟ್ಟದ ಹಿರಿಯ ಪ್ರಾಥಮಿಕ ಶಾಲೆಗಳ ಕ್ರೀಡಾಕೂಟ ಉದ್ಘಾಟಿಸಿ ಮಾತನಾಡಿದರು.

ಕ್ರೀಡೆಯಲ್ಲಿ ಇಂದು ಸೋತವರು ನಾಳೆ ಗೆಲ್ಲಬಹುದು. ಎದೆಗುಂದದೆ ದಿನವೂ ಸ್ವಲ್ಪ ಆಟೋಟಗಳಲ್ಲಿ ಭಾಗವಹಿಸುತ್ತಿದ್ದರೆ ಇಂತಹ ಕ್ರೀಡಾಕೂಟಗಳಲ್ಲಿ ಭಾಗವಹಿಸಲು ಸುಲಭವಾಗುತ್ತದೆ. ಓದಿನ ಜತೆಗೆ ಕ್ರೀಡೆಯೂ ಅಗತ್ಯವಾಗಿದೆ ಎಂದರು.

ತಾಲೂಕು ದೈಹಿಕ ಶಿಕ್ಷ ಣಾಧಿಕಾರಿ ವೇಣುಗೋಪಾಲ ಬಾಬು ಪ್ರಾಸ್ತಾವಿಕವಾಗಿ ಮಾತನಾಡಿ, ವಲಯ ಮಟ್ಟದ ಕ್ರೀಡಾಕೂಟದಲ್ಲಿ 14 ಶಾಲೆಗಳಿಂದ ಸುಮಾರು 700 ಮಕ್ಕಳು ಭಾಗವಹಿಸುತ್ತಿದ್ದಾರೆ. ತೀರ್ಪುಗಾರರು ಎಲ್ಲರೂ ಒಂದೇ ಎಂಬ ಭಾವನೆಯಲ್ಲಿ ತೀರ್ಪನ್ನು ನೀಡಿ ಸೂಕ್ತ ಪ್ರತಿಭೆಗಳನ್ನು ಆಯ್ಕೆ ಮಾಡಿ ತಾಲೂಕು ಮಟ್ಟಕ್ಕೆ ಕಳುಹಿಸಬೇಕೆಂದರು.

ಕ್ರೀಡಾ ಜ್ಯೋತಿ ಸ್ವೀಕರಿಸಿದ ತಾ.ಪಂ.ಸದಸ್ಯ ಆನಂದನಾಯ್ಕ ಮಾತನಾಡಿ, ಕ್ರಿಡೆಯಲ್ಲಿ ಭಾಗವಹಿಸಲು ಭಯ ಪಡಬೇಕಿಲ್ಲ. ಧೈರ್ಯ ಬೇಕಷ್ಟೇ. ಶಿಸ್ತಿನ ಶಿಕ್ಷ ಣದೊಂದಿಗೆ ದೈಹಿಕವಾಗಿಯೂ ದೃಢತೆಯನ್ನು ನೀಡಬಲ್ಲ ಇಂತಹ ಕ್ರೀಡಾಕೂಟಗಳಲ್ಲಿ ಭಾಗವಹಿಸಬೇಕು. ಕನಸಗಳನ್ನು ಸಾಕಾರಗೊಳಿಸುವತ್ತ ಹೆಜ್ಜೆ ಇಡಬೇಕೆಂದರು. ಕ್ರೀಡಾಕೂಟಕ್ಕೆ ಸರಕಾರ ಬರಿ 3000 ರೂ. ಅನುದಾನ ನೀಡುತ್ತಿರುವುದು ಹಾಸ್ಯಾಸ್ಪದವಾಗಿದೆ. ಇನ್ನಷ್ಟು ಪ್ರೋತ್ಸಾಹ ಅಗತ್ಯವಾಗಿದ್ದು, ಪದಾಧಿಕಾರಿಗಳು ಇದನ್ನು ಕ್ಷೇತ್ರ ಶಾಸಕರ ಗಮನಕ್ಕೆ ತರಬೇಕೆಂದರು.

ಗ್ರಾ.ಪಂ.ಅಧ್ಯಕ್ಷ ಯೋಗೀಂದ್ರ ಧ್ವಜಾರೋಹಣ ನೆರವೇರಿಸಿ ಮಾತನಾಡಿ, ಕ್ರೀಡಾಕೂಟಗಳಲ್ಲಿ ಭಾಗವಹಿಸಿ ವಿಜೇತರಾದ ಹಲವಾರು ಸ್ಪರ್ಧಾಳುಗಳು ಇಂದು ನಾನಾ ರೀತಿಯ ಹುದ್ದೆಗಳನ್ನು ಪಡೆದಿದ್ದಾರೆ. ವಿದ್ಯಾರ್ಥಿಗಳು ಇಂತಹ ಅಂಶಗಳನ್ನೂ ಗಮನಿಸಬೇಕೆಂದರು.

ಗ್ರಾ.ಪಂ.ಸದಸ್ಯ ಬಸವರಾಜ್‌ ತಿರ್ಪುಗಾರರಿಗೆ, ಪ್ರದೀಪನಾಯ್ಕ ವಿದ್ಯಾರ್ಥಿಗಳಿಗೆ ಪ್ರತಿಜ್ಞಾವಿಧಿ ಬೋಧಿಸಿದರು. ಈ ಸಂದರ್ಭದಲ್ಲಿ ಗ್ರಾ.ಪಂ.ಸದಸ್ಯರಾದ ಇಂದಿರಾಬಾಯಿ, ರಾಜಮ್ಮ, ದಾಕ್ಷಾಯಣಮ್ಮ, ಸಿಆರ್‌ಪಿಗಳಾದ ವಿನೋದ್‌, ರವಿನಾಯ್ಕ, ಶಿಕ್ಷ ಕರ ಸಂಘದ ಜಿಲ್ಲಾ ಉಪಾಧ್ಯಕ್ಷ ಜಗದೀಶ್‌, ಶಿಕ್ಷ ಕರ ಸಂಘದ ಅಧ್ಯಕ್ಷ ಅಜ್ಜಯ್ಯ ಮತ್ತಿತರರು ಭಾಗವಹಿಸಿದ್ದರು. ಮುಖ್ಯ ಶಿಕ್ಷ ಕ ಪ್ರಕಾಶ್‌ ಸ್ವಾಗತಿಸಿ, ರವಿಕುಮಾರ್‌ ನಿರೂಪಿಸಿದರು. ಜಗದೀಶ್‌ ವಂದಿಸಿದರು.