ಗ್ಯಾಸ್‌ ಸಿಲಿಂಡರ್‌ ದರ ಹೆಚ್ಚು ಪಡೆದರೆ ಕ್ರಮ

ಚಿಕ್ಕಮಗಳೂರು: ಕೇಂದ್ರ ಸರಕಾರ ನಿಗದಿಪಡಿಸಿರುವ ಗ್ಯಾಸ್‌ ಸಿಲಿಂಡರ್‌ ದರಕ್ಕಿಂತ ಅಧಿಕ ಹಣ ಪಡೆದರೆ ಅಂತಹ ಏಜೆನ್ಸಿಗಳ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಜಿಲ್ಲಾಧಿಕಾರಿಗಳು ತಿಳಿಸಿದ್ದಾರೆ.

ಅಡುಗೆ ಅನಿಲ ವಿತರಕರು ಗ್ಯಾಸ್‌ ಸಂಪರ್ಕ ನೀಡುವಾಗ ಅಳವಡಿಕೆಯ ವೆಚ್ಚ ಮತ್ತು ರಿಫೀಲ್‌ ಗ್ಯಾಸ್‌ ಸಿಲಿಂಡರ್‌ ನೀಡುವಾಗ ಸಾಗಣೆ ವೆಚ್ಚದ ಹೆಸರಿನಲ್ಲಿ ಗ್ರಾಹಕರಿಂದ ಹೆಚ್ಚು ಹಣ ಪಡೆದು ಶೋಷಣೆ ಮಾಡುತ್ತಿರುವ ಬಗ್ಗೆ ಅನೇಕ ದೂರುಗಳು ಬರುತ್ತಿವೆ.

ಅನಿಲ ವಿತರಕರು ಗ್ಯಾಸ್‌ ಸಂಪರ್ಕ ನೀಡಲು, ರಿಫೀಲ್‌ ಸಿಲಿಂಡರ್‌ ಸರಬರಾಜು ಮಾಡಲು ಸಾಗಣೆ ವೆಚ್ಚವೆಂದು ಸರಕಾರ ನಿಗದಿಪಡಿಸಿದ ದರಕ್ಕಿಂತ ಗ್ರಾಹಕರಿಂದ ಹೆಚ್ಚಿನ ಹಣ ಪಡೆಯುವುದು ಲಿಕ್ವಿಪೈಡ್‌ ಆಫ್‌ ಪೆಟ್ರೋಲಿಯಂ ಗ್ಯಾಸ್‌(ರೆಗ್ಯೂಲೇಷನ್‌ ಆಫ್‌ ಸಪ್ಲೈಸ್‌ ಅಂಡ್‌ಡಿಸ್ಟ್ರೀಬ್ಯೂಷನ್‌) ಆರ್ಡರ್‌ 2000ರ ಆದೇಶವನ್ನು ಉಲ್ಲಂಘಿಸಿದಂತಾಗುತ್ತದೆ. ಈ ಹಿನ್ನೆಲೆಯಲ್ಲಿ ಜಿಲ್ಲೆಯ ಯಾವುದೇ ಗ್ಯಾಸ್‌ ಏಜೆನ್ಸಿಯವರು ಗ್ರಾಹಕರಿಂದ ಹೆಚ್ಚಿನ ಹಣ ಪಡೆಯದೆ ನಿಗದಿಪಡಿಸಿದ ದರಕ್ಕೆ ಗ್ಯಾಸ್‌ ಸರಬರಾಜು ಮಾಡಬೇಕು. ತಪ್ಪಿದಲ್ಲಿ ಅಂತಹ ಗ್ಯಾಸ್‌ ಏಜೆನ್ಸಿಗಳ ವಿರುದ್ಧ ಪ್ರಕರಣ ದಾಖಲು ಮಾಡಿ ಕಾನೂನು ಕ್ರಮ ಜರುಗಿಸಲಾಗುವುದು ಎಂದು ಜಿಲ್ಲಾಧಿಕಾರಿಗಳ ಕಚೇರಿ ಪ್ರಕಟಣೆ ತಿಳಿಸಿದೆ.