ಸಾಂಕ್ರಾಮಿಕ ರೋಗ ಭೀತಿ : ನಗರಸಭೆಗೆ ಮನವಿ

ಚಿಕ್ಕಮಗಳೂರು : ಇಂದಾವರದ ಕಸ ಸಂಗ್ರಹ ಘಟಕದಲ್ಲಿ ಸರಿಯಾಗಿ ಕಸ ವಿಲೇವಾರಿ ಮಾಡದ ಹಿನ್ನೆಲೆಯಲ್ಲಿ ಸಾಂಕ್ರಾಮಿಕ ರೋಗಗಳು ಹರಡುತ್ತಿದ್ದು ಕೂಡಲೇ ಕ್ರಮಕೈಗೊಳ್ಳಬೇಕು ಎಂದು ಗ್ರಾಮಸ್ಥರು ನಗರಸಭೆಗೆ ಮನವಿ ಸಲ್ಲಿಸಿದರು.

ಗ್ರಾಮದ ಮುಖಂಡರ ನೇತೃತ್ವದಲ್ಲಿ ಸೋಮವಾರ ಆಯುಕ್ತ ಪರಮೇಶ ಅವರನ್ನು ಭೇಟಿಯಾದ ಹಲವು ಗ್ರಾಮಸ್ಥರು ಇಂದಾವರ ಕಸ ಡಂಪ್‌ ಯಾರ್ಡ್‌ನಲ್ಲಿ ಕಸ ನಿರ್ವಹಣೆ ಕಾರ್ಯ ಸರಿಯಾಗಿ ನಡೆಯದ ಕಾರಣ ಇಡೀ ಪರಿಸರವೇ ದುರ್ನಾತ ಬೀರುತ್ತಿದೆ. ಸೊಳ್ಳೆಗಳು ಅವ್ಯಾಹತವಾಗಿ ಹಾರಾಡುತ್ತವೆ. ಮನೆಯೊಳಗೆ ಸೊಳ್ಳೆಗಳ ಹಾರಾಟ ಹೆಚ್ಚಾಗಿದೆ. ಈಗಾಗಲೇ ಗ್ರಾಮದಲ್ಲಿ ಹಲವರು ಕಾಯಿಲೆಯಿಂದ ಬಳಲುತ್ತಿದ್ದು, ಇದು ಸಾಂಕ್ರಾಮಿಕವಾಗುವ ಎಲ್ಲ ಲಕ್ಷಣಗಳಿವೆ ಎಂದು ಮನವರಿಕೆ ಮಾಡಿದರು.

ಕೂಡಲೇ ಸಮರ್ಪಕವಾಗಿ ಕಸ ವಿಲೇವಾರಿ ನಿರ್ವಹಣೆ ಮಾಡಬೇಕು. ಸೊಳ್ಳೆಗಳ ನಿಯಂತ್ರಣಕ್ಕೆ ಕ್ರಮ ವಹಿಸಬೇಕು. ಇಲ್ಲದಿದ್ದಲ್ಲಿ ಎಲ್ಲ ಗ್ರಾಮಸ್ಥರು ಸೇರಿ ತೀವ್ರ ಪ್ರತಿಭಟನೆ ಹಮ್ಮಿಕೊಳ್ಳುತ್ತೇವೆ ಎಂದು ಎಚ್ಚರಿಸಿದರು.

ಮನವಿ ಸ್ವೀಕರಿಸಿದ ಆಯುಕ್ತ ಪರಮೇಶ್‌ ಅವರು ಈ ಬಗ್ಗೆ ಸೂಕ್ತ ಕ್ರಮ ಕೈಗೊಳ್ಳುವುದಾಗಿ ಭರವಸೆ ನೀಡಿದರು. ಗ್ರಾಮಸ್ಥರಾದ ಯತೀಶ್‌, ಹರ್ಷ, ಸಂದೀಪ್‌, ಪುನೀತ್‌, ರಂಜಿತ್‌, ಕಿರಣ್‌, ವಿನಯ್‌, ಸಚಿನ್‌, ನಿತಿನ್‌, ದೀಪು ಮತ್ತಿತರರು ಹಾಜರಿದ್ದರು.