ಸರಕಾರ ಹಿಂದೂಗಳಿಗೆ ದತ್ತಪೀಠ ಒಪ್ಪಿಸಲಿ

ಚಿಕ್ಕಮಗಳೂರು: ಹಿಂದುನಿಷ್ಠ ಸರಕಾರ ರಾಜ್ಯದಲ್ಲಿದೆ. ಟಿಪ್ಪು ಸುಲ್ತಾನ್‌ ಜಯಂತಿ ರದ್ದು ಮಾಡಿದಂತೆ ದತ್ತಪೀಠವನ್ನು ಹಿಂದೂಗಳ ಪೀಠ ಎಂದು ಘೋಷಿಸಲಿ ಎಂದು ವಿಶ್ವ ಹಿಂದೂ ಪರಿಷತ್‌ ಕ್ಷೇತ್ರಿಯ ಸಂಘಟನಾ ಕಾರ್ಯದರ್ಶಿ ಕೇಶವ ಹೆಗಡೆ ಮನವಿ ಮಾಡಿದರು.

ದತ್ತಜಯಂತಿ ಅಂಗವಾಗಿ ನಗರದಲ್ಲಿಬುಧವಾರ ನಡೆದ ಶೋಭಾಯಾತ್ರೆಯ ಬಹಿರಂಗ ಸಭೆಯಲ್ಲಿಅವರು ಮಾತನಾಡಿದರು. ಮುಖ್ಯಮಂತ್ರಿ ಯಡಿಯೂರಪ್ಪ ಅವರು ಹಿಂದೂ ವಿರೋಧಿಯಾಗಿದ್ದ ಟಿಪ್ಪು ಸುಲ್ತಾನ್‌ ಜಯಂತಿ ನಿಲ್ಲಿಸಿ ಗಟ್ಟಿತನ ತೋರಿದ್ದಾರೆ. ಅದೇ ರೀತಿ ದತ್ತಪೀಠವನ್ನು ಹಿಂದೂಗಳ ಪೀಠ ಎಂದು ಘೋಷಿಸಲಿ ಎಂದು ಆಗ್ರಹಿಸಿದರು.

ಇನಾಂ ದತ್ತಾತ್ರೇಯ ಪೀಠ ಎಂದು ಕಂದಾಯ ದಾಖಲೆಯಲ್ಲೇ ಇದೆ. ಮುಜರಾಯಿ ಇಲಾಖೆ ವ್ಯಾಪ್ತಿಗೆ ಯಾವ ದೇವಾಲಯ ಒಳಪಟ್ಟಿರುತ್ತದೋ ಅದು ಹಿಂದೂ ದೇವಾಲಯ ಆಗಿರುತ್ತದೆ. ಇದಕ್ಕೆ ಯಾವ ಪುರಾವೆ, ನ್ಯಾಯಾಲಯದ ತೀರ್ಪು ಬೇಡ. ಹಿಂದೂ ಸಮಾಜ ಹಿಂದಿನಿಂದಲೂ ಸತ್ಯದ ಅನ್ವೇಷಣೆಯಲ್ಲೇ ಬಂದಿದೆ. ಇಸ್ಲಾಂ ಅಥವಾ ಮುಸಲ್ಮಾನರ ವಿರುದ್ಧ ಸಂಘರ್ಷಕ್ಕೆ ಇಳಿಯದೆ ದತ್ತಪೀಠ ಹಿಂದೂಗಳಿಗೆ ಸೇರಬೇಕು ಎಂದು ಹೋರಾಟ ಮಾಡುತ್ತಾ ಬಂದಿದ್ದೇವೆ. ಮುಂದೊಂದು ದಿನ ಸತ್ಯಕ್ಕೆ ಜಯ ದೊರೆಯಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಬಜರಂಗದಳ ಪ್ರಾಂತೀಯ ಸಹ ಸಂಘಟನಾ ಸಂಚಾಲಕ ರಘು ಸಕಲೇಶಪುರ ಪ್ರಾಸ್ತಾವಿಸಿ, ಮುಂದಿನ ದತ್ತ ಜಯಂತಿ ವೇಳೆಗೆ ಹಿಂದೂಗಳಿಗೆ ದತ್ತಪೀಠದಲ್ಲಿನ ತುಳಸಿ ಕಟ್ಟೆ ಬಳಿ ಹೋಮ, ಹವನ ಮಾಡಲು ಅವಕಾಶ ನೀಡಬೇಕು ಎಂದು ಜಿಲ್ಲಾಡಳಿತವನ್ನು ಆಗ್ರಹಿಸುತ್ತೇವೆ ಹಾಗೂ ಸಂಕಲ್ಪ ಮಾಡುತ್ತೇವೆ. ದತ್ತಪೀಠದಲ್ಲಿಹಿಂದೂ ಅರ್ಚಕರ ನೇಮಕ ಮಾಡುವ ಬಗ್ಗೆ ಸದನದಲ್ಲಿದನಿ ಎತ್ತಬೇಕು ಎಂದು ಸಚಿವ ಸಿ.ಟಿ.ರವಿ ಅವರಲ್ಲಿಮನವಿ ಮಾಡಿದರು. ವಿಶ್ವಹಿಂದೂ ಪರಿಷತ್‌, ಬಜರಂಗದಳ ರಾಷ್ಟ್ರೀಯ ಸಹ ಸಂಯೋಜಕ ಸೂರ್ಯನಾರಾಯಣ ಮಾತನಾಡಿದರು. ಶಂಕರದೇವರ ಮಠದ ಶ್ರೀ ಚಂದ್ರಶೇಖರ ಶಿವಾಚಾರ್ಯ ಸ್ವಾಮೀಜಿ, ವಿಎಚ್‌ಪಿ ಮಹಿಳಾ ಘಟಕದ ಜಿಲ್ಲಾಪ್ರಮುಖ್‌ ಸಂಧ್ಯಾ ಪೈ, ಜಿಲ್ಲಾಧ್ಯಕ್ಷ ಶಿವಶಂಕರ್‌, ಸಚಿವ ಸಿ.ಟಿ.ರವಿ, ಮಾಜಿ ಸಚಿವ ಡಿ.ಎನ್‌.ಜೀವರಾಜ್‌ ಮತ್ತಿತರರು ಹಾಜರಿದ್ದರು.