ಯುವ ಸಂಘಗಳ ನಿರ್ವಹಣೆ ಅಗತ್ಯ

ಚಿಕ್ಕಮಗಳೂರು: ಯುವಕ ಸಂಘಗಳು, ಮಂಡಳಿಗಳು ಅಗತ್ಯ ದಾಖಲೆಗಳನ್ನು ನಿರ್ವಹಿಸುವ ಜತೆಗೆ ಅಭಿವೃದ್ಧಿಯತ್ತ ಹೆಜ್ಜೆ ಹಾಕಬೇಕು ಎಂದು ಜಿಲ್ಲಾ ಸ್ಕೌಟ್ಸ್‌ ಮತ್ತು ಗೈಡ್ಸ್‌ ಆಯುಕ್ತ ಎ.ಎನ್‌.ಮಹೇಶ್‌ ಸಲಹೆ ಮಾಡಿದರು.

ನಗರದ ನೆಹರು ಯುವ ಕೇಂದ್ರದಿಂದ ಗುರುವಾರ ಆಯೋಜಿಸಿದ್ದ ಯುವ ಸಂಘಗಳ ಅಭಿವೃದ್ಧಿ ಕಾರ‍್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿ, ಯುವಕ ಸಂಘ, ಮಹಿಳಾ ಮಂಡಳಿಗಳು ಸೌಲಭ್ಯ ಮತ್ತು ಮಾಹಿತಿ ಕೊರತೆ ಎದುರಿಸುತ್ತಿದೆ. ಬಹಳಷ್ಟು ಸಂಘ, ಮಂಡಳಿಗಳು ನವೀಕರಣವಾಗದೆ ನಶಿಸುತ್ತಿವೆ. ದಾಖಲೆಗಳನ್ನೂ ಸಮರ್ಪಕವಾಗಿ ನಿರ್ವಹಿಸುವುದಿಲ್ಲ. ಈ ಹಿನ್ನೆಲೆಯಲ್ಲಿ ನೆಹರು ಯುವ ಕೇಂದ್ರ ಯುವ ಸಂಘ, ಮಂಡಳಿಗಳ ಅಭಿವೃದ್ಧಿಗೆ ಆದ್ಯತೆ ನೀಡಬೇಕು ಎಂದರು.

ಅಕ್ಕನ ಬಳಗ ಅಧ್ಯಕ್ಷೆ ಹೇಮಲತ ಮಾತನಾಡಿ, ಯುವಕ ಸಂಘ, ಮಂಡಳಿಗಳಿಗೆ ನಿರಂತರವಾಗಿ ಕ್ರಿಯಾತ್ಮಕ ಕಾರ‍್ಯಕ್ರಮಗಳನ್ನು ದೊರಕಿಸಿ ಅವು ಅಭಿವೃದ್ಧಿ ಹೊಂದಲು ನೆಹರು ಯುವ ಕೇಂದ್ರ ಶ್ರಮಿಸುತ್ತಿದೆ ಎಂದು ಹೇಳಿದರು.

ಶಾಂತಿನಿಕೇತನ ಚಿತ್ರಕಲಾ ಮಹಾ ವಿದ್ಯಾಲಯ ಪ್ರಾಂಶುಪಾಲ ವಿಶ್ವಕರ್ಮ ಆಚಾರ‍್ಯ ಮಾತನಾಡಿ, ಯುವಜನರ ಬೆಳವಣಿಗೆಯಲ್ಲಿ ನೆಹರು ಯುವ ಕೇಂದ್ರ ಪ್ರಮುಖ ಪಾತ್ರ ವಹಿಸುತ್ತಿದೆ. ಯುವ ಸಂಘ, ಮಂಡಳಿಗಳು ನೆಹರು ಯುವ ಕೇಂದ್ರದಿಂದ ಅಗತ್ಯ ಮಾಹಿತಿ, ಸವಲತ್ತುಗಳನ್ನು ಪಡೆದುಕೊಂಡು ಪ್ರಗತಿ ಸಾಧಿಸಬೇಕು ಎಂದರು.ನೆಹರು ಯುವ ಕೇಂದ್ರದ ಎಂ.ಎನ್‌.ಮಂಜುನಾಥರಾವ್‌ ಪ್ರಾಸ್ತಾವಿಕ ಮಾತನಾಡಿದರು. ಭಾರತ್‌ ಸ್ಕೌಟ್ಸ್‌ ಮತ್ತು ಗೈಡ್ಸ್‌ ಜಿಲ್ಲಾ ಸಂಘಟಕ ಬಿ.ಎನ್‌.ಕಿರಣ್‌ಕುಮಾರ್‌, ಮಲ್ಲೇಶಪ್ಪ ಹಾಜರಿದ್ದರು. ತಾಲೂಕು ರಾಷ್ಟ್ರೀಯ ಯುವದಳ ಕಾರ‍್ಯಕರ್ತೆ ಎಚ್‌.ಕೆ.ವಿದ್ಯಾಶ್ರೀ ಸ್ವಾಗತಿಸಿ, ರವಿಚಂದ್ರ ವಂದಿಸಿದರು.