'ಮತ್ತೆ ಕಲ್ಯಾಣ' ಪೂರ್ವಭಾವಿ ಸಭೆ

ತರೀಕೆರೆ : ಸಹಮತ ವೇದಿಕೆ ವತಿಯಿಂದ ಆಯೋಜಿಸಿರುವ ಮತ್ತೆ ಕಲ್ಯಾಣ ಕಾರ್ಯಕ್ರಮದ ಮೂಲಕ ಸಾಮಾಜಿಕ ಅನಿಷ್ಟಗಳನ್ನು ನಿವಾರಣೆ ಮಾಡುವ ಸಂಕಲ್ಪ ಹೊಂದಲಾಗಿದೆ ಎಂದು ಸಾಣೇಹಳ್ಳಿ ಶ್ರೀ ಮಠದ ಡಾ.ಪಂಡಿತಾರಾಧ್ಯ ಶ್ರೀ ಗಳು ನುಡಿದರು.

ಅವರು ಪಟ್ಟಣದ ಅಕ್ಕನಾಗಲಾಂಬಿಕೆ ಗದ್ದುಗೆಗೆ ಭೇಟಿ ನೀಡಿ, ಆಗಸ್ಟ್‌ 1ರಂದು ನಡೆಯುವ ಮತ್ತೆ ಕಲ್ಯಾಣ ಕಾರ್ಯಕ್ರಮದ ಪ್ರಯುಕ್ತ ನಡೆದ ಪೂರ್ವಭಾವಿ ಸಭೆಯ ಸಾನಿಧ್ಯ ವಹಿಸಿ ಮಾತನಾಡಿದರು.

ಬಸವಣ್ಣನವರು 12ನೇ ಶತಮಾನದಲ್ಲಿ ಅಸಮಾನತೆ ಹೋಗಲಾಡಿಸಲು ಶ್ರಮಿಸಿದ್ದರು. ಆ ಸಂಕಲ್ಪದೊಂದಿಗೆ ಕಾರ್ಯಕ್ರಮ ಆಯೋಜಿಸಿ, ಜನರಿಗೆ ಸಮಾನತೆ ಬಗ್ಗೆ ಅರಿವು ನೀಡುವ, ಎಲ್ಲರೂ ಒಂದು ಎನ್ನುವ ಮನೋಭಾವ ಮೂಡಿಸುವ ಪ್ರಯತ್ನ ಮಾಡಲಾಗುತ್ತಿದೆ. ಇದು ಯಾವುದೇ ಒಂದು ಧರ್ಮ, ಜಾತಿ, ಪಕ್ಷ ಕ್ಕೆ ಸೀಮಿತವಾದ ಕಾರ್ಯಕ್ರಮವಲ್ಲ. ಎಲ್ಲರೂ ಸೇರಿ ಆಚರಿಸುವ ಇದೊಂದು ಆಂದೋಲನ ಎಂದು ತಿಳಿಸಿದರು.

ಸಮಾಜಕ್ಕೆ ಹೊಸ ಚಿಂತನೆ ಕೊಡಬೇಕು ಎನ್ನುವ ಉದ್ದೇಶವಿದೆ. ಈ ವಿಚಾರದಲ್ಲಿ ಎಲ್ಲರ ಹೊಣೆಗಾರಿಕೆ ಹೆಚ್ಚಿದೆ. ತರೀಕೆರೆಯಲ್ಲಿ ಮೊದಲ ಕಾರ್ಯಕ್ರಮ ನಡೆಯುತ್ತಿರುವುದರಿಂದ ಎಲ್ಲರಿಗೂ ಮುನ್ನುಡಿಯಾಗಬೇಕಿದೆ ಎಂದು ತಿಳಿಸಿದರು. ಶ್ರೀ ಮಠದ ದ್ಯಾಮೇಶ್‌ ಪ್ರಾಸ್ತಾವಿಕ ಮಾತನಾಡಿದರು.

ಶಾಸಕ ಡಿ.ಎಸ್‌.ಸುರೇಶ್‌, ಜಿ.ಪಂ.ಉಪಾಧ್ಯಕ್ಷ ಕೆ.ಆರ್‌.ಆನಂದಪ್ಪ, ತಹಸೀಲ್ದಾರ್‌ ಧರ್ಮೋಜಿರಾವ್‌, ಮುಖಂಡರಾದ ಎ.ಸಿ.ಚಂದ್ರಪ್ಪ, ಕೆ.ಆರ್‌.ಧೃವಕುಮಾರ್‌, ದೋರನಾಳು ಪರಮೇಶ್‌, ಎಂ.ರಂಗಪ್ಪ, ಗಂಗಾಧರಪ್ಪ, ಬಸವರಾಜಪ್ಪ, ಶ್ಯಾಮಲ, ಬಿ.ರಾಜಪ್ಪ, ಶಂಕರಲಿಂಗಪ್ಪ, ಚಟ್ನಹಳ್ಳಿ ಮಹೇಶ್‌ ಹಾಗೂ ಇತರರು ಹಾಜರಿದ್ದರು.