ಅಂತೂ ಜಿಲ್ಲೆಗೆ ಮೆಡಿಕಲ್‌ ಕಾಲೇಜು ಮಂಜೂರು

ಚಿಕ್ಕಮಗಳೂರು :ಜಿಲ್ಲೆಯಲ್ಲಿಮೆಡಿಕಲ್‌ ಕಾಲೇಜು ಸ್ಥಾಪಿಸುವ ಬಹುದಿನದ ಬೇಡಿಕೆ ಈಡೇರುವ ಕಾಲ ಕೂಡಿ ಬಂದಿದ್ದು ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಜಿಲ್ಲೆಗೆ ವೈದ್ಯಕೀಯ ಕಾಲೇಜು ಮಂಜೂರು ಮಾಡಿದೆ.

ದೆಹಲಿಯಲ್ಲಿಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಅಧ್ಯಕ್ಷ ಡಾ.ಅಥಣಿ ಅವರ ಅಧ್ಯಕ್ಷತೆಯಲ್ಲಿಗುರುವಾರ ಸಭೆ ನಡೆದಿದ್ದು ಚಿಕ್ಕಮಗಳೂರಿನಲ್ಲಿಮೆಡಿಕಲ್‌ ಕಾಲೇಜು ಸ್ಥಾಪನೆಗೆ ಈಗಾಗಲೇ ಸಿದ್ಧತೆ ನಡೆದಿರುವುದುದನ್ನು ಗಮನಿಸಿ ನಗರದಲ್ಲಿಕಾಲೇಜು ಸ್ಥಾಪನೆಗೆ ಇಲಾಖೆ ಪ್ರಥಮಾದ್ಯತೆ ನೀಡಿದೆ.

ರಾಜ್ಯ ಸರಕಾರದ ಸಹಭಾಗಿತ್ವದೊಂದಿಗೆ ಒಟ್ಟು 75 ವೈದ್ಯಕೀಯ ಕಾಲೇಜು ತೆರೆಯಲು ಕೇಂದ್ರ ಸರಕಾರ ಉದ್ದೇಶಿಸಿದ್ದು ಮೊದಲು ಮುಂದೆ ಬಂದ ರಾಜ್ಯಕ್ಕೆ ಕಾಲೇಜು ಮಂಜೂರು ಮಾಡಲು ನಿರ್ಧರಿಸಿತ್ತು. ಅದರಂತೆ ಚಿಕ್ಕಮಗಳೂರು ಜಿಲ್ಲೆಈ ಸೌಲಭ್ಯವನ್ನು ಕೇವಲ 1 ತಿಂಗಳ ನಿರಂತರ ಶ್ರಮದಿಂದ ಪಡೆಯುವಲ್ಲಿಯಶಸ್ವಿಯಾಗಿದೆ.ಒಟ್ಟು 365 ಕೋಟಿ ರೂ. ವೆಚ್ಚದಲ್ಲಿಈಗಿರುವ ಜಿಲ್ಲಾಸ್ಪತ್ರೆಯ ಉನ್ನತೀಕರಣ,ವೈದ್ಯಕೀಯ ಕಾಲೇಜು ಕಟ್ಟಡ ನಿರ್ಮಾಣ ಹಾಗೂ ಪೂರಕ ಸೌಲಭ್ಯಗಳನ್ನು ನಿರ್ಮಿಸಲಾಗುವುದು.ಇದಕ್ಕೆ ಕೇಂದ್ರ ಶೇ.70 ರಷ್ಟು ಅನುದಾನ ನೀಡಲಿದ್ದು ಉಳಿದ ಶೇ.30 ರಷ್ಟು ಅನುದಾನವನ್ನು ರಾಜ್ಯ ಸರಕಾರ ಭರಿಸಬೇಕಿದೆ.

ಸಚಿವ ಸಿ.ಟಿ.ರವಿ ಅವರು ಈ ಹಿಂದೆ ಉನ್ನತ ಶಿಕ್ಷಣ ಸಚಿವರಾಗಿದ್ದಾಗ ಜಿಲ್ಲೆಯಲ್ಲಿಮೆಡಿಕಲ್‌ ಕಾಲೇಜು ಸ್ಥಾಪಿಸಲು ಸಚಿವ ಸಂಪುಟದಲ್ಲಿಒಪ್ಪಿಗೆ ಪಡೆಯುವಲ್ಲಿಯಶಸ್ವಿಯಾಗಿದ್ದರು. ನಂತರ ರಾಜ್ಯದಲ್ಲಾದ ರಾಜಕೀಯ ಬದಲಾವಣೆಯಿಂದ ಇಲ್ಲಿಯವರೆಗೂ ವೈದ್ಯಕೀಯ ಕಾಲೇಜು ಆಗುವ ಸೂಚನೆಗಳು ಕಂಡು ಬಂದಿರಲಿಲ್ಲ.ಈಗಾಗಲೆ ನಗರದ ಮಲ್ಲೇಗೌಡ ಜಿಲ್ಲಾಸ್ಪತ್ರೆಯು 410 ಬೆಡ್‌ ಹೊಂದಿದ್ದು ವೈದ್ಯಕೀಯ ಕಾಲೇಜು ಸ್ಥಾಪನೆಗೆ ಕೇವಲ 300 ಬೆಡ್‌ ಇದ್ದರೆ ಸಾಕು.ಸಮೀಪದ ಕದ್ರಿಮಿದ್ರಿಯಲ್ಲಿ35 ಎಕರೆ ಜಾಗ ಗುರುತಿಸಿದ್ದು ಅಲ್ಲಿಮೆಡಿಕಲ್‌ ಕಾಲೇಜು ಕಟ್ಟಡ ನಿರ್ಮಿಸಲು ಉದ್ದೇಶಿಸಲಾಗಿದೆ. ನಗರದ ಜಿಲ್ಲಾಸ್ಪತ್ರೆಯಿಂದ ಕದ್ರಿಮಿದ್ರಿಗೆ ಕೇವಲ 6 ಕಿಮೀ ದೂರವಿದೆ.ಇದೆಲ್ಲವನ್ನು ಪರಿಗಣಿಸಿರುವ ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಲ್ಯಾಣ ಇಲಾಖೆ ಸರಕಾರಿ ವೈದ್ಯಕೀಯ ಕಾಲೇಜು ಸ್ಥಾಪಿಸುವ ಕೇಂದ್ರ ಸರಕಾರದ ನಿರ್ಧಾರದಂತೆ ಪ್ರಥಮ ಪ್ರಾಶಸ್ತ್ಯವನ್ನು ಚಿಕ್ಕಮಗಳೂರು ಜಿಲ್ಲೆಗೆ ನೀಡಿದೆ.