ಜಿಲ್ಲಾ ಬಸ್‌ ಮಾಲೀಕರ ಸಂಘ ರಾಜ್ಯಕ್ಕೆ ಮಾದರಿ

ಚಿಕ್ಕಮಗಳೂರು :ಜಿಲ್ಲೆಯ ಬಸ್‌ ಮಾಲೀಕರ ಸಂಘ ಪ್ರಾಮಾಣಿಕವಾಗಿ ಸೇವೆ ಸಲ್ಲಿಸುತ್ತಿದ್ದು, ರಾಜ್ಯಕ್ಕೆ ಮಾದರಿಯಾಗಿದೆ ಎಂದು ಪ್ರಾದೇಶಿಕ ಸಾರಿಗೆ ಕಚೇರಿ ಮೋಟಾರು ವಾಹನ ನಿರೀಕ್ಷಕ ಸಂತೋಷ್‌ ಶೆಟ್ಟಿ ಹೇಳಿದರು.

ನಗರದ ಖಾಸಗಿ ಹೋಟೆಲ್‌ ಸಭಾಂಗಣದಲ್ಲಿ ವರ್ಗಾವಣೆಗೊಂಡಿರುವ ಸಂತೋಷ್‌ ಶೆಟ್ಟಿ ಅವರಿಗೆ ಖಾಸಗಿ ಬಸ್‌ ಮಾಲೀಕರ ಸಂಘ ಶನಿವಾರ ಏರ್ಪಡಿಸಿದ್ದ ಬೀಳ್ಕೊಡುಗೆ ಕಾರ‍್ಯಕ್ರಮದಲ್ಲಿ ಅಭಿನಂದನೆ ಸ್ವೀಕರಿಸಿ ಅವರು ಮಾತನಾಡಿದರು.

ಜಿಲ್ಲೆಯಲ್ಲಿ ನಡೆಯುವ ದತ್ತಜಯಂತಿ, ಚುನಾವಣೆ ಹಾಗೂ ಕೆಎಸ್ಸಾರ್ಟಿಸಿ ಬಸ್‌ ನೌಕರರ ಮುಷ್ಕರ ಸಂದರ್ಭ ಬಸ್‌ ಮಾಲೀಕರ ಸಂಘ ನಮ್ಮ ಕರೆಗೆ ಹೆಚ್ಚಿನ ಸಹಕಾರ ನೀಡುವ ಜತೆಗೆ ಪ್ರಾಮಾಣಿಕ ಸೇವೆ ಸಲ್ಲಿಸಿ ಜನರ ವಿಶ್ವಾಸ ಮತ್ತು ಇಲಾಖೆಯ ಮೆಚ್ಚುಗೆ ಗಳಿಸಿದೆ ಎಂದರು.

ಜಿಲ್ಲೆಯಲ್ಲಿ ಗ್ರಾಮೀಣ ಪ್ರದೇಶ ಮತ್ತು ಮಲೆನಾಡು ಭಾಗದಲ್ಲಿ ಸರಕಾರಿ ಬಸ್‌ಗಳು ತೆರಳುವುದು ಕಷ್ಟ. ಯಾವುದೇ ರೀತಿಯ ಲಾಭವೂ ದಕ್ಕುವುದಿಲ್ಲ. ಅಂತಹ ಮಲೆನಾಡು ಭಾಗದ ಗ್ರಾಮಗಳಿಗೆ ತಮ್ಮ ಖಾಸಗಿ ಬಸ್‌ಗಳನ್ನು ಬಿಟ್ಟು ಸಮಾಜ ಸೇವೆ ಮಾಡುತ್ತಿರುವುದು ಸಂತಸದ ಸಂಗತಿ ಎಂದರು.

ಸಂಘದ ಅಧ್ಯಕ್ಷ ಕೆ.ಕೆ.ಬಾಲಕೃಷ್ಣ ಭಟ್‌ ಮಾತನಾಡಿ, ಸಂಘವು ಇಲಾಖೆಯೊಂದಿಗಿನ ಪರಸ್ಪರ ಸಹಕಾರ, ಪ್ರೀತಿ, ವಿಶ್ವಾಸದಿಂದ ಗ್ರಾಮೀಣ ಭಾಗದಲ್ಲಿ ಪ್ರಾಮಾಣಿಕವಾಗಿ ಸೇವೆ ಸಲ್ಲಿಸುತ್ತಿದ್ದೇವೆ ಎಂದರು.

ಪ್ರಾದೇಶಿಕ ಸಾರಿಗೆ ಇಲಾಖೆ ನಿವೃತ್ತ ವಾಹನ ಚಾಲಕ ರಘು ಅವರನ್ನು ಗೌರವಿಸಲಾಯಿತು. ಸಂಘದ ಉಪಾಧ್ಯಕ್ಷ ಬಿ.ಎಂ.ಕೃಷ್ಣಪ್ಪ, ಕಾರ‍್ಯದರ್ಶಿ ಬಿ.ಪಿ.ಚಂದ್ರಶೇಖರ್‌, ಸಹ ಕಾರ‍್ಯದರ್ಶಿ ಎಚ್‌.ಆರ್‌.ಷಣ್ಮುಖ, ಸದಸ್ಯರಾದ ಲೋಕೇಶ್‌, ಯದುಕುಮಾರ್‌, ಮೋಟಾರು ವಾಹನ ನಿರೀಕ್ಷಕ ನರೇಂದ್ರ, ಸೌಮ್ಯ, ಕಚೇರಿ ಅಧೀಕ್ಷಕ ರಾಮಚಂದ್ರ, ಆಟೊ ಸಂಘದ ಅಧ್ಯಕ್ಷ ಜಗದೀಶ್‌ ಹಾಜರಿದ್ದರು.