ಮೋದಿ ಪ್ರಮಾಣ ವಚನಕ್ಕೆ ಎಲ್‌ಇಡಿ ಶೋ

ಸಖರಾಯಪಟ್ಟಣ : ಎರಡನೇ ಬಾರಿಗೆ ಪ್ರಧಾನಿ ಆಗುತ್ತಿರುವ ನರೇಂದ್ರ ಮೋದಿಯವರ ಪ್ರಮಾಣ ವಚನಕ್ಕೆ ಪಟ್ಟಣದಲ್ಲಿ ಬಿಜೆಪಿಯ ಯುವಕರು ಎಲ್ಲರೂ ವೀಕ್ಷಿಸಲು ಅನುಕೂಲವಾಗುವಂತೆ ಕೆ.ಎಂ.ರಸ್ತೆಯ ಡಿಗ್ರಿ ಕಾಲೇಜಿನ ಮುಂಭಾಗದಲ್ಲಿ ಎಲ್‌ಇಡಿ ಟಿವಿ ವ್ಯವಸ್ಥೆ ಮಾಡಿದ್ದರು.

ಜಿ.ಪಂ. ಮಾಜಿ ಅಧ್ಯಕ್ಷ ಕಲ್ಮರುಡಪ್ಪ ಮಾತನಾಡಿ, ಮೋದಿ ಪ್ರಧಾನಿಯಾಗುತ್ತಿರುವುದು ಸಂತಸ ತಂದಿದೆ. ಇದು ಎಲ್ಲರಿಗೂ ಗೊತ್ತಿದ್ದ ವಿಚಾರ. ಭಾರತಕ್ಕೆ ಅತ್ಯುತ್ತಮ ಪ್ರಧಾನಿ ಎಂಬ ಹೆಗ್ಗಳಿಕೆಯಿಂದ ಅಭಿವೃದ್ಧಿಯ ಹರಿಕಾರರಾಗಿದ್ದಾರೆ. ಇನ್ನು ಮುಂದಿನ ಐದು ವರ್ಷಗಳಲ್ಲಿ ಇನ್ನು ಹೆಚ್ಚಿನ ಅಭಿವೃದ್ಧಿ ಸಾಧಿಸಿ ದೇಶವನ್ನು ಮೇಲ್ಪಂಕ್ತಿಗೆ ತರುತ್ತಾರೆ ಎಂದರು. ಮೋದಿ ಪ್ರಧಾನಿಯಾಗುತ್ತಿರುವ ಈ ಸಂದರ್ಭದಲ್ಲಿ ಸಿಹಿ ಹಂಚಲು 2000 ಮೈಸೂರು ಪಾಕಗಳನ್ನು ಕೊಡುತ್ತಿದ್ದೇವೆ ಎಂದರು.

ಜಿ.ಪಂ.ನ ಸದಸ್ಯ ವಿಜಯಕುಮಾರ್‌ ಮಾತನಾಡಿ, ಪ್ರಚಂಡ ಬಹುಮತದಿಂದ ಬಿಜೆಪಿ ಹೊರಹೊಮ್ಮಿದ್ದು ಎಲ್ಲರ ನಾಡೀಮಿಡಿತವೂ ಮೋದಿಯಾಗಿದ್ದಾರೆ. ಎಲ್ಲ ವಿರೋಧಿಗಳನ್ನು ಮಣ್ಣುಮುಕ್ಕಿಸಿ ಜನಾದೇಶವನ್ನು ಪಡೆದು ಪ್ರಧಾನಿಯಾಗುತ್ತಿರುವುದು ದೇಶಕ್ಕಲ್ಲದೆ ಪ್ರಪಂಚಕ್ಕೆ ಮಾದರಿಯಾಗಿದೆ ಎಂದರು.

ಈ ಸಂದರ್ಭದಲ್ಲಿ ಬಿಜೆಪಿ ಮುಖಂಡರಾದ ಲೋಕೇಶ್‌, ಪಾದಮನೆ ದಿನೇಶ್‌, ಕಿರಣ್‌, ಜೀಪ್‌ ಚಂದ್ರಣ್ಣ, ಶಿವಕುಮಾರ, ರವಿನಾಯ್ಕ, ಪ್ರದೀಪನಾಯ್ಕ ಹಾಗೂ ನೂರಾರು ಕಾರ್ಯಕರ್ತರು ಹಾಜರಿದ್ದು ಪಟಾಕಿ ಹೊಡೆದು ಸಂಭ್ರಮಿಸಿದರು.