ಬಿತ್ತನೆಗೆ ಸಿದ್ಧತೆ
ಪಟ್ಟಣದ ಉಪಮಾರುಕಟ್ಟೆ ಪ್ರದೇಶದಲ್ಲಿರುವ ರೈತಸಂಪರ್ಕ ಕೇಂದ್ರ ರೈತರ ಬೆಳೆಗೆ ಪೂರಕವಾಗಿ ಬಿತ್ತನೆ ಬೀಜ ವಿತರಣೆಗೆ ಕ್ರಮ ಕೈಗೊಂಡಿದೆ. ಅಂದಾಜು 7885 ಹೆಕ್ಟೆರ್‌ ಪ್ರದೇಶಕ್ಕೆ ಮುಂಗಾರು ಹಂಗಾಮಿಗೆ ಬೇಕಾಗುವ ಬಿತ್ತನೆ ಬೀಜ ವಿತರಣೆಗೆ ಮುಂದಾಗಿದ್ದು ಈಗಾಗಲೇ 11 ಕ್ವಿಂಟಾಲ್‌ ಮೆಕ್ಕೆಜೋಳ, 3 ಕ್ವಿಂಟಾಲ್‌ ಸೂರ್ಯಕಾಂತಿ, 80 ಕ್ವಿಂಟಾಲ್‌ ಶೇಂಗಾ, 2ಕ್ವಿಂಟಾಲ್‌ ಹೆಸರು, 1ಕ್ವಿಂಟಾಲ್‌ ಉದ್ದು, 30ಕೆಜಿ ತೊಗರಿ ಹಾಗೂ 1.2ಕ್ವಿಂಟಾಲ್‌ ಹಲಸಂದೆಯನ್ನು ವಿತರಿಸಿದೆ. ಸರಕಾರದ ರಿಯಾಯಿತಿ ದರದಲ್ಲಿ ರೈತರು ಈಗಾಗಲೇ ಬೀಜ ಖರೀದಿಸಿದ್ದು ಸಮರ್ಪಕ ಪ್ರಮಾಣದಲ್ಲಿ ರಸಗೊಬ್ಬರ ಪೂರೈಕೆ ಸಹ ಇದ್ದು ಹದಮಳೆಯ ನಿರೀಕ್ಷೆಯಲ್ಲಿ ಬಿತ್ತನೆ ಕಾರ್ಯಕ್ಕೆ ಸಜ್ಜಾಗುತ್ತಿದ್ದಾರೆ.
ಭರದಿಂದ ಸಾಗುತ್ತಿದೆ ಉಳುಮೆ ಕಾರ್ಯ
ಬಹುತೇಕ ಹೊಲಗಳಲ್ಲಿ ಉಳುಮೆ ಕಾರ್ಯ ಭರದಿಂದ ಸಾಗಿದೆ. ತೆಂಗು ಮತ್ತು ಅಡಕೆ ಬೆಳೆಗಾರರ ಜೀವನಾಡಿ ಮದಗದಕೆರೆ ಕೆರೆ ರಿಪೇರಿಯ ಹಿನ್ನೆಲೆಯಲ್ಲಿ ಕೆರೆಯ ನೀರು ಸಂಪೂರ್ಣ ಖಾಲಿ ಮಾಡಲಾಗಿದೆ. ಕೊರೊನಾ ಹೊಡೆತಕ್ಕೆ ಅಡಕೆ ಮತ್ತು ತೆಂಗಿನ ಉತ್ಪನ್ನಗಳು ಸಂಕಷ್ಟ ಎದುರಿಸುತ್ತಿವೆ.
ಸಾಂಪ್ರಾದಾಯಿಕ ಕೃಷಿ ಉಳುಮೆ
ಬೀರೂರು ಹೋಬಳಿಯ ಬಹುತೇಕ ಗ್ರಾಮಗಳ ರೈತರು ಪ್ರತಿಬಾರಿ ತಮ್ಮ ಸಾಂಪ್ರಾದಾಯಿಕ ಕೃಷಿ ಮೂಲಕ ಉಳುಮೆ ಮತ್ತು ಬಿತ್ತನೆ ಕಾರ್ಯ ನಡೆಸಿದ್ದು ರೈತ ಸಂಪರ್ಕಕೇಂದ್ರ ರೈತರ ಕೃಷಿ ಚಟುವಟಿಕೆಗಳಿಗೆ ಸರಕಾರದ ವತಿಯಿಂದ ಸಿಗುವ ಎಲ್ಲ ಸೌಲಭ್ಯಗಳನ್ನು ಸಕಾಲದಲ್ಲಿ ದೊರಕಿಸಿ ಕೊಡುವಲ್ಲಿ ಶ್ರಮಿಸುತ್ತಿದೆ. ಕೀಟನಾಶಕ ಮತ್ತು ಕೃಷಿ ಪರಿಕರಗಳನ್ನು ವಿತರಿಸಲು ಕ್ರಮವಹಿಸುತ್ತಿದೆ.
ಸೋಮಲಿಂಗಪ್ಪ, ಕೃಷಿ ಅಧಿಕಾರಿ ರೈತಸಂಪರ್ಕ ಕೇಂದ್ರ, ಬೀರೂರು
ಭರವಸೆಯಿಂದ ಉಳುಮೆ
ಪ್ರತಿ ಬಾರಿ ಆರಂಭದ ಮಳೆ ನಮಗೆ ಕೃಷಿ ಚಟುವಟಿಕೆಗೆ ಪ್ರೇರಣೆ ನೀಡುತ್ತಿದ್ದರೂ ನಂತರ ಮುಂಗಾರು ಕೈಕೊಟ್ಟು ಬೆಳೆನಾಶ ಮತ್ತು ಬೆಲೆಯಿಲ್ಲದೇ ಕಂಗಾಲಾಗುವಂತೆ ಮಾಡುತ್ತಿದೆ. ಈ ಬಾರಿ ನಂಬಿರುವ ಕೃಷಿ ನಮ್ಮನ್ನು ರಕ್ಷಿಸುವುದೆಂಬ ಭರವಸೆಯಿಂದ ಉಳುಮೆ ಮಾಡುತ್ತಿದ್ದೇವೆ.
ಬಸವರಾಜಪ್ಪ, ರೈತ